સુરતઃ ટોલ પ્લાઝા પર ટોલ ટેક્સ માટે હવે અટકવું નહીં પડે. મળતી વિગત પ્રમાણે, સુરતના ચોર્યાસી ટોલ પ્લાઝા પર ફેબ્રુઆરીથી નોન-સ્ટોપ એન્ટ્રી મળશે. આ નવી સિસ્ટમ વાહનચાલકોને થોભ્યા વિના ટોલ ચૂકવવાની સુવિધા આપશે, જે દેશમાં આ પ્રકારનું પ્રથમ 'અનમેન્ડ' ટોલ પ્લાઝા મોડેલ બનશે. નવી ટેક્નોલોજી હેઠળ, વાહનો સામાન્ય ઝડપે ટોલ લેનમાંથી પસાર થઈ શકશે. ઓટોમેટિક નંબર પ્લેટ રેકગ્નિશન કેમેરા વાહનની રજીસ્ટ્રેશન પ્લેટને સ્કેન કરશે અને ફાસ્ટેગ આધારિત પેમેન્ટ સિસ્ટમ દ્વારા સેકન્ડોમાં ટોલની રકમ આપોઆપ કપાઈ જશે. આ સમગ્ર પ્રક્રિયા માણસ રહિત રહેશે, જેનાથી વાહનોને ઉભા રાખવાની જરૂરિયાત દૂર થશે.
સૂત્રોએ જણાવ્યું હતું કે, કામરેજના ચોર્યાસી ખાતે ભારતનો પ્રથમ 'મલ્ટી-લેન ફ્રી ફ્લો ટોલ રોડ પ્રોજેક્ટ' પૂર્ણ થવાને આરે છે. તેઓએ ઉમેર્યું કે, મોટાભાગનું કામ પૂર્ણ થઈ ગયું છે અને ફેબ્રુઆરીના અંત સુધીમાં આ સિસ્ટમ શરૂ થવાની શક્યતા છે.
મલ્ટી-લેન ફ્રી ફ્લો સિસ્ટમ કેવી રીતે કામ કરે છે?
ઓપરેશનના નિરીક્ષણ માટે ચોર્યાસી ટોલ પ્લાઝા પાસે એક સમર્પિત કંટ્રોલ રૂમ સ્થાપવામાં આવ્યો છે. આ સિસ્ટમ અંદાજે ₹ 16 કરોડના ખર્ચે વિકસાવવામાં આવી છે, જેમાં લેન પર મોટા કમાનો લગાવવામાં આવ્યા છે.
* હાઈ-સ્પીડ સ્કેનર્સ: આ કમાનો પર હાઈ-સ્પીડ સ્કેનર્સ ફીટ કરવામાં આવ્યા છે.
* એડવાન્સ્ડ કેમેરા: અંદાજે 30 જેટલા અદ્યતન કેમેરા લગાવવામાં આવ્યા છે, જેમાં દરેક લેન દીઠ બે કેમેરા હશે.
* સેન્સર ટેકનોલોજી: લિડર, રડાર અને એન્ટેના આધારિત ટેકનોલોજીનો ઉપયોગ કરીને મોનિટરિંગ કરવામાં આવશે.
* તકનીકી સહયોગ: આ પ્રોજેક્ટ માટે તાઈવાનની કંપની ટેકનિકલ સપોર્ટ પૂરો પાડી રહી છે.
આ નવા ટોલ મોડેલથી વાહનચાલકોના સમય અને ઈંધણ બંનેની બચત થવાની અપેક્ષા છે. ધીમે ધીમે આ સમસ્યા સમગ્ર રાજ્યમાં લાગુ કરવામાં આવી શકે છે.
