મુંબઈઃ કલ્યાણ-ડોંબિવલી મ્યુનિસિપલ કોર્પોરેશનમાં મહાયુતિનો મેયર હશે, કારણ કે પાંચ મનસે કોર્પોરેટરોએ મહાનગરપાલિકામાં ભાજપના સાથી શિવસેનાને ટેકો આપવાની ઓફર કરી છે, એમ મહારાષ્ટ્ર ભાજપના વડા રવિન્દ્ર ચવ્હાણે ભારપૂર્વક જણાવ્યું છે. ચવ્હાણે એમ પણ કહ્યું હતું કે ઉલ્હાસનગર અને થાણે મ્યુનિસિપલ કોર્પોરેશનમાં પણ મહાયુતિના મેયર હશે.

ગયા અઠવાડિયે તેમની અને શિવસેનાના નેતા શિંદેની ત્રણ મ્યુનિસિપલ કોર્પોરેશનોમાં મેયર પદો પર વિગતવાર ચર્ચા થઈ હતી, પરંતુ મુખ્ય પ્રધાન  દેવેન્દ્ર ફડણવીસ દાવોસથી પાછા ફર્યા પછી તેમની અને નાયબ મુખ્ય પ્રધાન એકનાથ શિંદે વચ્ચે મુંબઈમાં સંયુક્ત બેઠકમાં અંતિમ નિર્ણય લેવામાં આવશે, એમ ચવ્હાણે ઉમેર્યું.

કલ્યાણ-ડોંબિવલીમાં મનસે કોર્પોરેટરોએ શિંદે જૂથને જાહેર કરેલો ટેકો ઉદ્ધવ ઠાકરેની શિવસેના (યુબીટી) માટે એક આંચકા સમાન છે, કારણ કે બંને પક્ષોએ તાજેતરની બૃહન્મુંબઈ મ્યુનિસિપલ કોર્પોરેશનની ચૂંટણી સાથે મળીને લડી હતી.

122 સભ્યોની કલ્યાણ-ડોંબિવલી મ્યુનિસિપલ કોર્પોરેશનમાં, શિવસેના 53 બેઠકો જીતીને સૌથી મોટી પાર્ટી તરીકે ઉભરી આવી છે, જ્યારે સાથી પક્ષ ભાજપ 50 બેઠકો સાથે બીજા ક્રમે છે. પાંચ મનસે કોર્પોરેટરોના ટેકા સાથે, ગઠબંધનમાં હવે 108 સભ્યો છે.  શિવસેના (યુબીટી), કોંગ્રેસ અને એનસીપી  (એસપી) એ અનુક્રમે 11, 2 અને 1 બેઠક જીતી છે.

131 સભ્યોના થાણે મ્યુનિસિપલ કોર્પોરેશનમાં શિવસેનાએ 75 બેઠક જીતી છે, જ્યારે તેના સાથી ભારતીય જનતા પાર્ટીએ 28 બેઠકો જીતી, જે નાગરિક સંસ્થા પર નિયંત્રણ મેળવવા માટે જરૂરી 66 ના બહુમતી આંકને આરામથી વટાવી ગઈ છે.

78 સભ્યોની ઉલ્હાસનગર મ્યુનિસિપલ કોર્પોરેશનમાં, ભાજપ અને શિવસેના બંને શાસક મહાયુતિ ગઠબંધનના ઘટક પક્ષો સ્વતંત્ર રીતે ચૂંટણી લડ્યા અને અનુક્રમે ૩૭ અને ૩૬ બેઠકો જીતી. શિવસેનાએ પાછળથી પ્રકાશ આંબેડકરની વંચિત બહુજન આઘાડીના બે નવા ચૂંટાયેલા કોર્પોરેટરોનો ટેકો મેળવીને પોતાનો પક્ષ મજબૂત કર્યો.
(પીટીઆઈ)