ગુજરાત ભાજપના સંગઠનમાં ફેરફારો જાહેર કરવામાં આવ્યા છે. જેમાં  ભાજપ દ્વારા સંગઠનના 106 સભ્યોની  પ્રદેશ કારોબારીની જાહેરાત કરવામાં આવી છે. જેમાં 79 કારોબારી સભ્યો તેમજ 26 વિશેષ આમંત્રિત સભ્યોનો સમાવેશ કરવામાં આવ્યો છે. ભાજપ પ્રદેશ પ્રવકતા ડો.અનિલ પટેલે જણાવ્યુ હતું કે, ભાજપ પ્રદેશ અધ્યક્ષ જગદીશ વિશ્વકર્મા દ્વારા આજે  પ્રદેશ કારોબારી સભ્યોની તેમજ પ્રદેશ વિશેષ આમંત્રીત સભ્યોની સંગઠનાત્મક નિમણુકોની જાહેરાત કરવામાં આવી છે.

ભાજપના રાષ્ટ્રીય અધ્યક્ષની ચૂંટણી માટેની પ્રક્રિયા આજથી શરૂ થઇ છે. જેમાં ભાજપના કાર્યકરી  નીતિન નબીને રાષ્ટ્રીય અધ્યક્ષ પદ માટે પોતાનું ઉમેદવારીપત્ર ભર્યું છે. આ પ્રસંગે ભાજપ મુખ્યાલયમાં પાર્ટીના અનેક વરિષ્ઠ નેતાઓ હાજર હતા.

નોબેલ શાંતિ પુરસ્કાર ન મળતા નારાજ અમેરિકાના રાષ્ટ્રપતિ  ડોનાલ્ડ ટ્રમ્પે વિવાદીત નિવેદન આપ્યું છે. જેમાં તેમણે નોર્વેના વડા પ્રધાન જોનાસ ગાહર સ્ટોરને લખેલા પત્રમાં આ બાબતમાં ખુલાસો થયો છે. જેમાં તેમણે લખ્યું છે કે વિશ્વ શાંતિ વિશે વિચારવાની તેમની જવાબદારી નથી. તેમણે સ્વીકાર કર્યો છે કે ગ્રીનલેન્ડ પર કબજો કરવાનો તેમનો પ્રયાસ નોબેલ શાંતિ પુરસ્કાર ન મળવાની નિરાશા છે.

ભારત માટે આર્થિક મોરચે સારા સમાચાર આવ્યા છે. જેમાં આઇએમએફ દ્વારા નાણાકીય વર્ષ 2025-26 માટે ભારતના GDP વૃદ્ધિ દરનો અંદાજ 0.7 ટકા વધારીને 7.3 ટકા કર્યો છે. આઇએમએફ દ્વારા ચાલુ નાણાકીય વર્ષના ત્રીજા ક્વાર્ટરમાં અપેક્ષા કરતા સારા પરિણામો અને ચોથા ક્વાર્ટરમાં મજબૂત ગતિને ધ્યાનમાં રાખીને દેશના GDP વૃદ્ધિ દરમાં આ ફેરફાર કર્યો છે.

તમિલનાડુના કરૂર ભાગદોડ કેસમાં અભિનેતા થલાપતિ વિજય આજે બીજી વખત સીબીઆઇ સમક્ષ હાજર થયા છે. આ કેસમાં વિજયની બીજી વાર પૂછતાછ કરવામાં આવી રહી છે.  આ પૂર્વે 12 જાન્યુઆરીના રોજ પૂછતાછ કરવામાં આવી હતી.

અમદાવાદ શહેરમાં ફરી સેવન્થ ડે જેવી ઘટના બની છે. ઘાટલોડિયામાં નેશનલ સ્કૂલ બહાર એક વિદ્યાર્થીએ બીજા વિદ્યાર્થીને છરીના ઘા ઝીંક્યા હતા. બનાવની જાણ થતાં પોલીસે ઘટનાસ્થળે પહોંચી તપાસ શરૂ કરી હતી.

સમાજવાદી પાર્ટીના નેતા મુલાયમ સિંહ યાદવના પુત્ર પ્રતીક યાદવે પત્ની અપર્ણા યાદવને છૂટાછેડા આપવાની જાહેરાત કરી છે. પ્રતીક યાદવ, મુલાયમ સિંહ યાદવ  અને તેની બીજી પત્ની સાધના ગુપ્તાનો પુત્ર છે. તે સપા પ્રમુખ અખિલેશ યાદવનો પિતરાઈ ભાઈ છે.

આઈસીસીએ બાંગ્લાદેશ ક્રિકેટ બોર્ડને અલ્ટીમેટમ આપ્યું છે. ભારતમાં રમવા પર 21 જાન્યુઆરી સુધી જવાબ માંગવામાં આવ્યો છે.

અમદાવાદના એસજી હાઇવે પર એએમટીએસ બસમાં આગ લાગી હોવાની ઘટના બની હતી. મિનિટોમાં જ આખી બસ ભડકે બળી ગઇ હતી. ફાયર વિભાગની ટીમે તાત્કાલિક આગ પર કાબૂ મેળવી લીધો હતો. સદનસીબે જાનહાનિ ટળી હતી.

ભાજપના રાષ્ટ્રીય અધ્યક્ષ પદ માટે નીતિન નબીન આજે ઉમેદવારી પત્ર ભરશે. તેમનું બિનહરીફ ચૂંટાવું નક્કી છે. રાષ્ટ્રીય અધ્યક્ષની ચૂંટણીની આ પ્રક્રિયામાં ભાગ લેવા ભાજપના તમામ મુખ્ય પ્રધાન, રાજ્યોના પ્રદેશ પ્રમુખ અને અન્ય અગ્રણી નેતાઓ ઉપસ્થિત રહેશે.