અમદાવાદ: દેશભરમાં હાડ થીજવતી ઠંડીની વચ્ચે હવામાન વિભાગે કમોસમી વરસાદની આગાહી વ્યક્ત કરી છે. સતત બદલાતી હવામાનની પેટર્નને કારણે આગામી 24 કલાકમાં 13 રાજ્યોમાં ગાજવીજ સાથે ભારે વરસાદ અને તોફાન આવવાની શક્યતા છે. ખાસ કરીને ઉત્તર ભારત અને પશ્ચિમ ભારતના વિસ્તારોમાં 50 થી 60 કિલોમીટર પ્રતિ કલાકની ઝડપે પવન ફૂંકાઈ શકે છે, જેને પગલે જનજીવન પ્રભાવિત થવાની ભીતિ છે. હવામાનમાં આ અણધાર્યા ફેરફારને કારણે વહીવટી તંત્ર દ્વારા લોકોને બિનજરૂરી બહાર ન નીકળવા અને સાવચેત રહેવા અપીલ કરવામાં આવી છે.
ગુજરાતમાં વરસાદી માહોલની શક્યતા
સમગ્ર દેશમાં જે 13 રાજ્યો માટે એલર્ટ જારી કરાયું છે, તેમાં પડોશી રાજ્યોની અસર હેઠળ ગુજરાતના વાતાવરણમાં પણ મોટો પલટો જોવા મળી શકે છે. ખાસ કરીને રાજસ્થાન અને મધ્યપ્રદેશને અડીને આવેલા સરહદી વિસ્તારોમાં વાદળછાયું વાતાવરણ અને હળવા વરસાદી ઝાપટાની શક્યતા છે. વેસ્ટર્ન ડિસ્ટર્બન્સ સક્રિય થવાને કારણે ફૂંકાતા ઠંડા પવનોને લીધે ગુજરાતના શહેરોમાં લઘુત્તમ તાપમાન ગગડશે, જેનાથી વહેલી સવારે અને રાત્રે કડકડતી ઠંડીનો અનુભવ થશે. ખેડૂતોને પણ પોતાના પાકને સુરક્ષિત રાખવા માટે આગોતરી તૈયારી રાખવાની સલાહ અપાઈ છે.
દિલ્હી-NCR અને પડોશી રાજ્યોમાં 'યલો એલર્ટ'
રાષ્ટ્રીય રાજધાની દિલ્હી અને તેની આસપાસના વિસ્તારોમાં ઠંડીએ છેલ્લા ચાર વર્ષના રેકોર્ડ તોડ્યા છે. દિલ્હીમાં પારો 3.6°C સુધી પહોંચી ગયો છે, જ્યારે આગામી 12 કલાકમાં મધ્યમ વરસાદની પણ સંભાવના છે. ઉત્તર પ્રદેશ, હરિયાણા અને પંજાબના લગભગ 23 જિલ્લાઓમાં કોલ્ડવેવની ચેતવણી આપવામાં આવી છે. હિમાચલ અને ઉત્તરાખંડ જેવા પહાડી રાજ્યોમાં ભારે હિમવર્ષા અને વરસાદને કારણે માર્ગ વ્યવહાર ખોરવાઈ શકે છે, જ્યારે મનાલી જેવા પ્રવાસન સ્થળોએ તાપમાન માઈનસ 8 ડિગ્રી સુધી પહોંચવાની વકી છે.
વરસાદી માહોલ અને ઠંડા પવનોને કારણે વાયુ પ્રદૂષણમાં (AQI) વધઘટ જોવા મળી રહી છે. દિલ્હીમાં પ્રદૂષણ ફરી 'ખરાબ' શ્રેણીમાં પહોંચ્યું છે, જે શ્વસન સંબંધી સમસ્યાઓ ધરાવતા લોકો માટે જોખમી સાબિત થઈ શકે છે. ડોક્ટરોએ નાના બાળકો અને વૃદ્ધોને ઠંડી અને પ્રદૂષણથી બચવા માટે ગરમ કપડાં પહેરવા અને પૌષ્ટિક આહાર લેવાની સલાહ આપી છે. આગામી 28 અને 29 જાન્યુઆરી સુધી આ સ્થિતિ યથાવત રહેવાની શક્યતા હોવાથી મુસાફરી કરતા લોકોએ હવામાનની અપડેટ મેળવીને જ આગળ વધવું હિતાવહ છે.
