મુંબઈ: મુંબઈને ભારતની 'આર્થિક' રાજધાની કહેવામાં આવે છે અને શહેર અને તેના ઉપનગરોમાં હાલમાં મોટી સંખ્યામાં માળખાગત પ્રોજેક્ટ્સ ચાલી રહ્યા છે. તાજેતરમાં MMRDAએ નાણાકીય વર્ષ 2026-27 માટે 48,072 કરોડ રૂપિયાના બજેટને મંજૂરી આપી છે, તેમાંથી લગભગ 87 ટકા ભંડોળ વિવિધ વિકાસ કાર્યો માટે અનામત રાખવામાં આવ્યું છે.

નવી મુંબઈ પછી ત્રીજા મુંબઈને વિકસાવવા માટે લગભગ 4,000 કરોડ રૂપિયાની જોગવાઈ કરવામાં આવી છે. મહત્વનું છે કે રોડ અને એક્સપ્રેસ વે પ્રોજેક્ટ્સ માટે 42,026 કરોડ રૂપિયાની જંગી રકમ ફાળવવામાં આવી છે. 

બાંદ્રા-વરલી સી લીન્કથી છત્રપતિ શિવાજી મહારાજ આંતરરાષ્ટ્રીય એરપોર્ટના ટર્મિનલ 2 વચ્ચેના અંડરપાસ પ્રોજેક્ટ માટે રૂ. 24,000 કરોડની વહીવટી મંજૂરી આપવામાં આવી છે, અને આ વર્ષે રૂ. 1,189 કરોડની જોગવાઈ કરવામાં આવી છે.

થાણે-બોરીવલી અને ઓરેન્જ ગેટ-મરીન ડ્રાઇવ ટનલ પ્રોજેક્ટ્સ માટે 5,543 કરોડ રૂપિયાથી વધુની ફાળવણી કરવામાં આવી છે, ઉપરાંત અટલ સેતુથી મુંબઈ-પુણે એક્સપ્રેસવે કનેક્શન, થાણે કોસ્ટલ રોડ, કલ્યાણ રિંગ રોડ, ઇસ્ટર્ન ફ્રીવે એક્સટેન્શન અને મુંબઈ-વાઢવણ એક્સપ્રેસવે જેવા ઘણા મહત્વપૂર્ણ પ્રોજેક્ટ્સનો સમાવેશ થાય છે.

MMRDA આ પ્રોજેક્ટ્સ માટે લોન, જમીન વિકાસ અને શહેરી પરિવહન ભંડોળ દ્વારા મોટું ભંડોળ એકત્ર કરશે. આ કાર્યોથી મુંબઈ અને આસપાસના વિસ્તારોમાં પરિવહન વ્યવસ્થા ઝડપી અને સરળ બનવાની અપેક્ષા છે.

કયા પ્રોજેક્ટ માટે કેટલું ભંડોળ?
. મુખ્ય પરિવહન માર્ગો અને મલ્ટી-રિંગ રોડ નેટવર્કનું જોડાણ - રૂ.12,816.53 કરોડ
. અટલ સેતુથી મુંબઈ-પુણે એક્સપ્રેસવે કનેક્શન - રૂ.603 કરોડ
. આનંદનગરથી સાકેત એલિવેટેડ રોડ - રૂ.880.12 કરોડ
. થાણે કોસ્ટલ રોડ ( બાલકુમ-ગાયમુખ) - રૂ.1,025.77 કરોડ
. ફાઉન્ટેન હોટેલથી ભાયંદર ઉન્નત માર્ગ - રૂ.75 કરોડ
. કલ્યાણ રિંગ રોડ - રૂ.600 કરોડ
. વરલી-શિવડી એલિવેટેડ કોરિડોર - રૂ. 936.07 કરોડ
. વિસ્તૃત મુંબઈ શહેરી માળખાગત પ્રોજેક્ટ - રૂ.2,362.20 કરોડ
. મુંબઈ-વાઢવણ એક્સપ્રેસવે કોરિડોર (ઉત્તન-વિરાર સી લિંક) - રૂ. 2,000 કરોડ
. મુંબઈથી સમૃદ્ધિ એક્સપ્રેસવે લિંક રોડ (સાકેતથી આમણે) - રૂ. 500 કરોડ
. ઇસ્ટર્ન ફ્રીવે વિસ્તરણ (છેડાનગર, ઘાટકોપરથી થાણે) - રૂ. 1,106.75 કરોડ
. કલ્યાણ-મુરબાડથી બદલાપુર રોડ (વાલધુની નદી કિનારે એલિવેટેડ રોડ) - રૂ.200 કરોડ
. ગાયમુખથી પાયગાવ ક્રીક બ્રિજ - રૂ.682.10 કરોડ
. કાસરવડવલી, થાણેથી ખારબાવ ક્રીક બ્રિજ - રૂ. 840.71 કરોડ
. કોલશેત, થાણેથી કાલ્હેર, ભિવંડી ક્રીક બ્રિજ - રૂ. 105.51 કરોડ
. રાષ્ટ્રીય ધોરીમાર્ગ ૪થી કાટઇ નાકા સુધીનો એલિવેટેડ રોડ - રૂ.900 કરોડ