મુંબઈઃ બોલિવુડ સુપરસ્ટાર અજય દેવગન સ્ટારર મલ્ટિસ્ટારર કોમેડી ફિલ્મ ‘ધમાલ 4’ બોક્સ ઓફિસ પર અટકવાનું નામ નથી લઈ રહી. વીકએન્ડ બાદ વર્કિંગ ડેઝ શરૂ થવા છતાં આ ફિલ્મની કમાણીમાં મોટો ઉછાળો જોવા મળ્યો છે. રિલીઝના પાંચમા દિવસે આ ફિલ્મે સોમવાર કરતાં પણ વધુ કમાણી કરીને ટ્રેડ એનાલિસ્ટ્સને ચોંકાવી દીધા છે. મંગળવારે વર્કિંગ ડે હોવાના કારણે ટિકિટના દરો ઓછા હતા, જેનો સીધો ફાયદો ફિલ્મને મળ્યો અને સિનેમાઘરોમાં પ્રેક્ષકોની ભારે ભીડ જોવા મળી હતી.

ભારતીય બોક્સ ઓફિસ પર 100 કરોડની નજીક

કમાણીની વાત કરવામાં આવે તો, ‘ધમાલ 4’ એ તેના પાંચમા દિવસે ભારતમાં 9.50 કરોડ રૂપિયાનું શાનદાર નેટ કલેક્શન કર્યું છે. આ સાથે જ ફિલ્મનું કુલ ભારતીય નેટ કલેક્શન 83.25 કરોડ રૂપિયા અને ગ્રોસ કલેક્શન 99.44 કરોડ રૂપિયા પર પહોંચી ગયું છે. ટ્રેડ નિષ્ણાતોના મતે, આ ફિલ્મ આગામી 24 કલાકમાં જ ઘરેલું બોક્સ ઓફિસ પર 100 કરોડનો આંકડો વટાવી જશે.

વર્લ્ડવાઈડ કલેક્શન 115 કરોડને પાર

ભારતની સાથે-સાથે વિદેશમાં પણ આ કોમેડી ફિલ્મને દર્શકો ભરપૂર પ્રેમ આપી રહ્યા છે. ઓવરસીઝ માર્કેટમાં ફિલ્મે મંગળવારે 1.50 કરોડ રૂપિયાની કમાણી કરી છે, જેથી ફિલ્મનું કુલ વિદેશી ગ્રોસ કલેક્શન 16 કરોડ રૂપિયા થઈ ગયું છે. ભારત અને વિદેશની કમાણી મળીને ‘ધમાલ 4’ નું કુલ વર્લ્ડવાઈડ ગ્રોસ કલેક્શન હવે 115.44 કરોડ રૂપિયાના આંકડાને સ્પર્શી ગયું છે.

નાઈટ શોમાં દર્શકોનો ભારે ધસારો

મંગળવારે ફિલ્મના 2D શોમાં સરેરાશ 20.78% ઓક્યુપન્સી જોવા મળી હતી. દિવસ દરમિયાન અલગ-અલગ સમયે દર્શકોની સંખ્યા આ મુજબ બદલાતી રહી. વિગતે વાત કરવામાં આવે તો મોર્નિંગ શોમાં 9.31% ઓક્યુપન્સી, બપોરના શોઝમાં 19.69% ઓક્યુપન્સી, સાંજના શોમાં 22.46% ઓક્યુપન્સી અને નાઇટ શોમાં 29.31% ઓક્યુપન્સી રહી હતી. એટલે કે, રાત્રિના સમયે સૌથી વધુ લોકો આ ફિલ્મ જોવા માટે પહોંચ્યાં હતાં. આગામી સેકન્ડ વીકએન્ડમાં પણ આ ફિલ્મ બોક્સ ઓફિસ પર નવા રેકોર્ડ સર્જવા માટે તૈયાર હોય તેવું લાગી રહ્યું છે.