નિલેશ વાઘેલા
મુંબઈ: આજે સોમવારે ભારતીય શેરબજારોમાં વેચવાલીનું ભારે દબાણ જોવા મળ્યું, શુક્રવારે બેન્ચમાર્ક્સે 25 વર્ષના રેકોર્ડ સાપ્તાહિક ઘટાડાનો સિલસિલો તોડ્યા બાદ રોકાણકારોએ નફો બુક કર્યો હોવાથી સેન્સેક્સ તેના ઇન્ટ્રાડે ઉચ્ચતમ સ્તરથી 900 પોઈન્ટથી વધુ નીચે ખાબક્યો છે.

ભારતીય ક્ષેત્રીય સૂચકાંકોમાં મિશ્ર કામકાજનો દોર છે, જેમાં મીડિયા વૃદ્ધિમાં આગળ છે, ત્યારબાદ ઓટો, રિયલ્ટી અને મેટલ શેરો આવે છે. ફાર્મા, હેલ્થકેર અને પસંદગીના નાણાકીય સેવાઓ સૂચકાંકો પણ ઊંચા મથાળે ટ્રેડ થઈ રહ્યા છે. દરમિયાન, PSU બેંકો, IT, FMCG અને ખાનગી બેંકો દબાણ હેઠળ છે.

વ્યાપક બજાર સૂચકાંકો સાધારણ વૃદ્ધિ દર્શાવે છે, જે મુખ્ય હેવીવેઇટ ક્ષેત્રોમાં નબળાઈ હોવા છતાં પસંદગીના ખરીદી રસ દર્શાવે છે.
બજારના જાણકારો અનુસાર આગામી સમય માટે ટેક્નિકલ સંકેતો નબળા છે. નિષ્ણાતો માને છે કે આ સપ્તાહમાં નિફ્ટી માટે ૨૨,૬૦૦નું સ્તર મહત્વપૂર્ણ રહેશે.જો નિફટી આ સ્તરથી ઉપર રહેશે, તો તે ૨૨,૮૦૦ તરફ આગળ વધી શકે છે. પરંતુ જો ૨૨,૪૦૦થી નીચે સરકશે તો ૨૨,૦૦૦ તરફ ગબડવાનું જોખમ વધી શકે છે. 

એ પણ ખરું કે ક્રૂડ ઓઇલના ભાવમાં ઘટાડો અને અપેક્ષિત કોર્પોરેટ કમાણી વૃદ્ધિ બજારની રિકવરીને મજબૂત બનાવી શકે છે. જોકે ટોચના બ્રોકરેજ ફર્મના રિસર્ચ એનાલિસ્ટ અનુસાર, નિફ્ટીના સાપ્તાહિક ચાર્ટ પર ડોજી કેન્ડલસ્ટિક રચાઈ છે. આ લાંબા ઘટાડા પછી ખરીદદારો અને વેચાણકર્તાઓ વચ્ચે અનિશ્ચિતતા દર્શાવે છે. 

ડોજી કેન્ડલસ્ટિકની રચના આપમેળે વલણમાં ફેરફારની પુષ્ટિ કરતી નથી, પરંતુ આગામી ટ્રેડિંગ સત્રોમાં બજારની દિશાનું નિરીક્ષણ કરવું મહત્વપૂર્ણ છે.

ટેક્નિકલ નિષ્ણાતો અનુસાર, નિફ્ટી હજુ પણ તેના પચાસ સપ્તાહની એક્સ્પોનેન્શિયલ મૂવિંગ એવરેજ (ઇએમએ)ની નીચે ટ્રેડ કરી રહ્યો છે. ૨૦૦ અઠવાડિયાનો ઇએમએ ૨૨,૩૮૨ની આસપાસ છે, જે એક મુખ્ય ટેકનિકલ સ્તર છે. શુક્રવારે, નિફ્ટી આ સ્તરથી ઉપર બંધ થયો હતો.

આ સ્તર જાળવી રાખવું બજારની સ્વસ્થતા માટે મહત્વપૂર્ણ રહેશે. 
રિલેટિવ સ્ટ્રેન્થ ઇન્ડેક્સ (આરએસઆઇ) પણ નબળાઈ દર્શાવે છે. નિફ્ટીનો આરએસઆઇ હજુ પણ પચાસના તટસ્થ સ્તરથી નીચે છે. તેથી, રિકવરીને ટકાઉ ગણવા માટે આરએસઆઇમાં સતત સુધારો જરૂરી રહેશે.
એક અન્ય નિષ્ણાતે પણ આ બાબતને સમર્થન આપતાં કહ્યું કે, નિફ્ટીને તેની રિકવરી ચાલુ રાખવા માટે ૨૨,૬૦૦થી ઉપર રહેવું જરૂરી છે, જો આવું થાય, તો ઇન્ડેક્સ ૨૨,૮૦૦ તરફ આગળ વધી શકે છે. તેનાથી વિપરીત, જો નિફ્ટી ૨૨,૪૦૦ના સ્તરને જાળવવામાં નિષ્ફળ જાય, તો તેનો ઘટાડો ૨૨,૦૦૦ સુધી લંબાઈ શકે છે.

 જોકે એક પીઢ નિરીક્ષકે જણાવ્યું કે તાજેતરના ઘટાડા પછી બજારને ટેકનિકલ સ્તરે ટેકો મળવાની શક્યતા છે. તેમણે કહ્યું કે જો કોર્પોરેટ કમાણી વૃદ્ધિ બજારની અપેક્ષાઓ સાથે સુસંગત હોય અને ક્રૂડ ઓઇલના ભાવ પ્રતિ બેરલ ૧૦૦ ડોલરથી નીચે આવે, તો નિફ્ટી સંભવિત રીતે લગભગ પાંચેક ટકા વધી શકે છે.