ન્ચૂ ચંડીગઢઃ રાજસ્થાન રૉયલ્સના ટીનેજ ઓપનિંગ બૅટ્સમૅન વૈભવ સૂર્યવંશીએ બુધવારે આઇપીએલના એલિમિનેટરમાં અનેક વિક્રમ તોડીને સનસનાટી મચાવી દીધી હતી. એ સાથે, 15 વર્ષના વૈભવે દિગ્ગજ બૅટ્સમેનોને ઝાંખા પાડી દીધા હતા.

27મી મે વૈભવ (Vaibhav) માટે સુવર્ણ અક્ષરે લખાશે, કારણકે આ દિવસે તે સેન્ચુરી ચૂકી ગયો, પરંતુ 29 બૉલમાં બનાવેલા 97 રનની ઇનિંગ્સમાં બાર છગ્ગા અને પાંચ ચોગ્ગા ફટકારીને તેણે આ દિવસને યાદગાર બનાવી દીધો. એક સમયે તેણે ચાર બૉલમાં ફક્ત સાત રન બનાવ્યા હતા, પણ પછીના 12 બૉલમાં તેણે 41 રન ફટકારી દીધા હતા. 

15 વર્ષના વૈભવે આઇપીએલ-2026માં 600 રન પૂરા કર્યા, 16 બૉલમાં હાફ સેન્ચુરી ફટકારી અને ક્રિસ ગેઇલનો એક આઇપીએલ સીઝનમાં 59 છગ્ગા મારવાનો રેકૉર્ડ (Record) તોડી નાખ્યો. વૈભવના નામે હાલમાં આ સીઝનમાં 65 સિક્સર છે.

વૈભવે 16 બૉલમાં 50 રન પૂરા કરીને આઇપીએલના પ્લે-ઑફના ઇતિહાસમાં સૌથી ઝડપે હાફ સેન્ચુરી ફટકારવાના સુરેશ રૈનાના વિક્રમ (16 બૉલમાં ફિફટી)ની બરાબરી કરી હતી. ગિલક્રિસ્ટ આ રેકૉર્ડ-બુકમાં ત્રીજા નંબરે છે. તેણે 17 બૉલમાં 50 રન પૂરા કર્યા હતા.

વૈભવ એક આઇપીએલ સીઝનમાં 600-પ્લસ રન બનાવનાર સૌથી નાની ઉંમરનો ખેલાડી બન્યો છે. તે 15 વર્ષનો છે અને અગાઉ 21મા વર્ષે આ સિદ્ધિ મેળવનાર રિષભ પંતનો રેકૉર્ડ તોડી નાખ્યો છે.

વૈભવે આઇપીએલમાં પાંચમી વખત પાવરપ્લેની છ ઓવર પૂરી થતાં પહેલાં જ હાફ સેન્ચુરી પૂરી કરી લીધી હતી. આ રેકૉર્ડ ડેવિડ વૉર્નરના નામે છે જેણે છ વખત પાવરપ્લેની ઓવર્સમાં 50 રન પૂરા કર્યા હતા.

વૈભવે આઇપીએલની એક મૅચમાં પાવરપ્લેની અંદર કુલ આઠ છગ્ગા ફટકારીને નવો વિક્રમ સ્થાપિત કર્યો. તેણે સાત-સાત છગ્ગા ફટકારનાર સનથ જયસૂર્યા અને જૉસ બટલર જેવા મહારથીઓને ઝાંખા પાડી દીધા છે.