વડોદરા: માંજલપુર વિસ્તારમાં સામાન્ય રહેણાંક જેવા દેખાતા એક ફ્લેટમાં ચાલતા હાઈટેક ન્યૂડ વીડિયો કોલ સેન્ટરનો પર્દાફાશ થયો હતો. અહીં પૈસા ચૂકવતા સબસ્ક્રાઇબર્સ સામે કેમેરા આગળ કપડાં ઉતારવા માટે યુવતીઓને નોકરીએ રાખવામાં આવી હતી. પોલીસે આ ગેરકાયદેસર પ્રવૃત્તિનો પર્દાફાશ કરીને 26 વર્ષીય મનીષ પઢિયારની ધરપકડ કરી હતી. છેલ્લા એક વર્ષથી આ રેકેટ ચાલતું હોવાનું સામે આવ્યું હતું.

ચોક્કસ બાતમીના આધારે કામગીરી કરતા માંજલપુર પોલીસે દરબાર ચોકડી નજીકના ફ્લેટ પર દરોડો પાડી મનીષ પઢિયારની ધરપકડ કરી હતી. પોલીસે જણાવ્યું હતું કે તેણે 19 થી 21 વર્ષની વયજૂથની કેટલીક યુવતીઓને સ્ટ્રિપચેટ નામના ઓનલાઇન પ્લેટફોર્મ પર આવવા માટે રાખી હતી, જ્યાં સબસ્ક્રાઇબર્સ તેમની સાથે વીડિયો કોલ કરવા માટે પૈસા ચૂકવતા હતા.

પોલીસે  જણાવ્યું કે, એકવાર સબસ્ક્રાઇબર ચૂકવણી કરે એટલે યુવતીઓમાંથી એક વીડિયો કોલમાં જોડાતી અને કેમેરા સામે કપડાં ઉતારતી હતી. પોલીસને આવો જ એક વીડિયો મળ્યા બાદ તેનું મૂળ શોધવાનું શરૂ કરતાં આ રેકેટ પ્રકાશમાં આવ્યું હતું. તપાસ તેમને પઢિયાર સુધી લઈ ગઈ, જેણે આ કામગીરી શરૂ કરતા પહેલા વ્યાપક ઓનલાઈન રિસર્ચ કર્યું હતું.

ધોરણ 10 પાસ પઢિયાર અગાઉ એક ટ્રાવેલ એજન્સીમાં કામ કરતો હતો, જ્યાં તેનું કામ સંભવિત ગ્રાહકોને કોલ કરવાનું હતું. લગભગ બે વર્ષ પહેલા તેણે નોકરી ગુમાવી દીધી હતી અને બેરોજગારીના ગાળા દરમિયાન, ઝડપી પૈસા કમાવવાના રસ્તા તરીકે તેણે કથિત રીતે આ ન્યૂડ વીડિયો કોલ સેન્ટર શરૂ કરવાનો નિર્ણય લીધો હતો.

પોલીસના જણાવ્યા પ્રમાણે પઢિયારે સેન્ટર શરૂ કરતા પહેલા તેણે ઓનલાઈન રિસર્ચ કર્યું હતું. તેણે એક ફ્લેટ પણ ખરીદ્યો હતો જ્યાંથી આ વીડિયો કોલ કરવામાં આવતા હતા. પઢિયાર પરણેલો છે અને તે જ વિસ્તારના અન્ય એક ફ્લેટમાં પોતાના પરિવાર સાથે રહે છે. તપાસકર્તાઓએ તેના માટે કામ કરતી ચાર મહિલાઓની ઓળખ કરી લીધી છે અને અન્ય લોકો સામેલ હતા કે કેમ તેની તપાસ કરી રહ્યા છે.

ગ્રાહકો સાથે સંપર્ક કરીને તેમની માંગણી મુજબ યુવતીઓ મારફતે ન્યૂડ વીડિયો કોલ કરાવવામાં આવતો હતો. આ કાળા કારોબારમાંથી મળતી રકમ આરોપી અને યુવતી વચ્ચે 50-50 ટકાના ધોરણે વહેંચાઈ જતી હતી. આરોપીએ વડોદરામાં 11 લાખ રૂપિયાનો ફ્લેટ ખરીદી અશ્લીલતાનો ધંધો શરૂ કર્યો હતો.
આરોપી 10 પાસ હોવા છતા એપીકે ફાઈલની મદદથી એપ બનાવી ગ્રાહકોને આકર્ષતો હતો. તેમજ રિચાર્જ કરાવડાવી બેલેન્સ ખર્ચ કરાવતો હતો. 

આ ઉપરાંત  આરોપીએ  તેની સાથે નોકરી કરતી યુવતીને પણ આ ધંધામાં કામ કરવા માટે બોલાવી હતી. મૂળ ગાઝિયાબાદની યુવતી એરહોસ્ટેસનો અભ્યાસ કરતી હતી. જેની પણ પોલીસે પૂછપરછ શરૂ કરી હતી. તપાસ દરમિયાન અનેક ચોંકાવનારી વિગતો સામે આવી શકે છે.