મુંબઈઃ થાણે ઇન્ટિગ્રલ રિંગ મેટ્રો પ્રોજેક્ટ માટે થાણે મ્યુનિસિપલ કોર્પોરેશન (ટીએમસી) દ્વારા આપવામાં આવેલી વૃક્ષ કાપવાની પરવાનગીઓને પડકારતી જાહેર હિતની અરજી (પીઆઈએલ) બોમ્બે હાઈ કોર્ટમાં દાખલ કરવામાં આવી છે, જેમાં આરોપ મૂકવામાં આવ્યો છે કે નાગરિક વહીવટીતંત્રે ફરજિયાત વૈધાનિક વૃક્ષ સત્તામંડળની રચના કર્યા વિના મનસ્વી રીતે કાર્ય કર્યું છે.
અરજીમાં આક્ષેપ કરવામાં આવ્યો છે કે, 'માહિતી અધિકાર અધિનિયમ' (આરટીઆઈ) અનુસાર, કમિશનરે કાયદેસરના સત્તામંડળની રચના વગર થાણેમાં ૪,૬૦૦થી વધુ વૃક્ષોને કાપવાની પરવાનગીઓ એકપક્ષીય રીતે આપી દીધી છે. અરજીમાં દલીલ કરવામાં આવી છે કે યોગ્ય રીતે રચાયેલ 'વૃક્ષ સત્તામંડળ' ના અભાવે આપેલી મંજૂરીઓ કાયદેસર રીતે ટકી શકે તેમ નથી.
જાન્યુઆરી-ફેબ્રુઆરી ૨૦૨૬માં નવી ચૂંટાયેલી નગરપાલિકા અસ્તિત્વમાં આવી હોવા છતાં, નાગરિક વહીવટીતંત્રે હજુ સુધી વૈધાનિક સત્તામંડળની રચના કરી નથી, તેવો દાવો અરજદારે કર્યો છે. અરજીમાં એવો પણ આક્ષેપ કરવામાં આવ્યો છે કે કાયદા હેઠળ જરૂરી જાહેર સૂચના અસ્પષ્ટ હતી અને તેમાં નાગરિકોને વાંધા ઉઠાવવા માટે પૂરતી માહિતી આપવામાં આવી નહોતી.
વૃક્ષોની ઉંમર, પ્રજાતિ અને ચોક્કસ સ્થાન જેવી વિગતો તેમાં દર્શાવવામાં આવી નહોતી, જેના કારણે પ્રક્રિયા નબળી પડી છે. વધુમાં, નાશિક હાઈવેને અડીને આવેલા સાકે-ખારેગાંવ પટ્ટા પર વૃક્ષોના પુનઃરોપણ માટેની જગ્યાની પસંદગી સામે પણ પ્રશ્નો ઉઠાવવામાં આવ્યા છે. એવો આક્ષેપ કરવામાં આવ્યો છે કે આ સ્થળ નક્કી કરતી વખતે જમીનનું પરીક્ષણ કે પર્યાવરણીય મૂલ્યાંકન કરવામાં આવ્યું નથી.
પર્યાવરણવાદીઓએ ચેતવણી આપી છે કે મહારાષ્ટ્રમાં શહેરી તાપમાનમાં વધારો, અનિયમિત વરસાદ અને ભૂગર્ભ જળની અછત જેવી પરિસ્થિતિઓ વચ્ચે, વૃક્ષો કાપવાની સૂચિત કાર્યવાહીના લાંબાગાળાના પરિણામો આવી શકે છે.
અરજીમાં માંગ કરવામાં આવી છે કે ટીએમસીને તાત્કાલિક કાયદાકીય રીતે સુસંગત વૃક્ષ સત્તામંડળની રચના કરવા, વૃક્ષ કાપવાની પરવાનગી રદ કરવા અને સ્વતંત્ર નિષ્ણાત સમિતિ મૂલ્યાંકન રજૂ ન કરે ત્યાં સુધી થાણેમાં વૃક્ષ કાપવા અને પ્રત્યારોપણ પર વચગાળાનો પ્રતિબંધ લાદવાનો નિર્દેશ આપવામાં આવે.
