(અમારા પ્રતિનિધિ તરફથી)
મુંબઈ: મહારાષ્ટ્રના રાજકારણમાં વધુ એક મોટો ઘટનાક્રમ જોવા મળ્યો છે. સ્વર્ગસ્થ અજિત પવારના પુત્ર પાર્થ પવાર મનસે પ્રમુખ રાજ ઠાકરેને મળવા દાદર સ્થિત શિવતીર્થ નિવાસસ્થાને પહોંચ્યા હતા. રાજ ઠાકરેને મળવા માટે પાર્થ પવારની અચાનક મુલાકાતથી રાજકીય વર્તુળોમાં વિવિધ ચર્ચાઓ શરૂ થઈ છે. થોડા દિવસો પહેલાં વિધાનસભ્ય રોહિત પવાર મનસે પ્રમુખ રાજ ઠાકરેને મળ્યા હતા. એવું કહેવાય છે કે આ બેઠકમાં અજિત પવારના વિમાનની દુર્ઘટના અંગે ચર્ચા થઈ હતી. ત્યારબાદ રાજે પણ આ મુદ્દે પ્રેસ કોન્ફરન્સ કરી હતી અને અજિત પવારની વિમાન દુર્ઘટના અંગે પ્રશ્ર્નો ઉઠાવ્યા હતા. અજિત પવાર જેવી વ્યક્તિ અકસ્માતમાં નિધન પામે છે અને સરકાર સાદો ગુનો નોંધતી નથી. રાજ ઠાકરેએ પૂછ્યું હતું કે એફઆઈઆર કેમ નોંધાતો નથી. ત્યારબાદ પાર્થ પવાર આજે રાજ ઠાકરેને મળવા શિવતીર્થ પહોંચ્યા હતા. આ બંને નેતાઓ શા માટે મળ્યા તે અંગે કોઈ સ્પષ્ટતા કરવામાં આવી નથી. રાજ ઠાકરેને મળ્યા પછી, પાર્થ પવાર કોઈ પ્રતિક્રિયા આપ્યા વિના નીકળી ગયા હતા. તેથી, આ મુલાકાત પાછળનું કારણ રહસ્યમાં છે.
બીજી એપ્રિલે રાજ્યસભાની સાત બેઠકો ખાલી થઈ રહી છે. તેમાંથી એક પાર્ટી દ્વારા પાર્થ પવારને તક આપવામાં આવી છે. પાર્થ પવાર રાજ્યસભામાં બિનહરીફ ચૂંટાશે એવું માનવામાં આવી રહ્યું છે. ત્યારબાદ પાર્થ પવાર પહેલીવાર રાજ ઠાકરેને મળવા ગયા છે. પાર્થ પવાર લગભગ દોઢ કલાક સુધી તેમના શિવતીર્થ નિવાસસ્થાને હતા. તેથી, આ બેઠકે બધાનું ધ્યાન ખેંચ્યું છે. એવું જોવા મળે છે કે અજિત પવારના વિમાન દુર્ઘટના અને ત્યારબાદ એનસીપીમાં થયેલા ઘટનાક્રમ પછી પાર્થ પવાર રાજકારણમાં સક્રિય થયા છે.
