મુંબઈ: મુંબઈમાં છેલ્લા કેટલાક દિવસોથી વિદ્યાર્થીઓનું વિરોધ પ્રદર્શન ચાલી રહ્યું છે. આ વિરોધ પ્રદર્શનોમાંથી  એક ચોંકાવનારો વીડિયો સામે આવ્યો છે, અને પોલીસે આ બાબતની નોંધ લીધી છે.

મુંબઈમાં પ્રદર્શન દરમિયાન વિરોધ કરી રહેલા વિદ્યાર્થીઓને ધમકી આપનાર પોલીસ અધિકારીની તપાસ કરવાની જાહેરાત કરવામાં આવી છે. મુંબઈ પોલીસે આ જાહેરાત કરી હતી અને વીડિયો વાયરલ થયા બાદ તપાસનો આદેશ આપ્યો હતો. તેમણે સ્પષ્ટતા કરી હતી કે તપાસ દરમિયાન તથ્યો અને પુરાવાના આધારે કાર્યવાહી કરવામાં આવશે.

મુંબઈમાં ત્રણ દિવસથી ચાલી રહેલા વિદ્યાર્થી વિરોધ પ્રદર્શન દરમિયાન, વિદ્યાર્થીઓની વિવિધ સ્થળોએથી અટકાયત કરવામાં આવી છે અને પોલીસની ગાડીમાં વિરોધ સ્થળોથી દૂર લઈ જવામાં આવ્યા છે. આવી જ એક ઘટના દરમિયાન, વિરોધ કરી રહેલા વિદ્યાર્થીઓને પોલીસની ગાડીમાં બેસાડ્યા પછી, વાહન ચલાવતા અધિકારીએ તેમને ધમકી આપી હતી. વિદ્યાર્થીઓએ સમગ્ર ઘટના તેમના મોબાઇલ ફોનમાં કેદ કરી હતી.

વાઈરલ વીડિયોમાં, પોલીસ અધિકારી પાછળની સીટ પર બેઠેલા અટકાયત કરાયેલા વિદ્યાર્થીઓને ચેતવણી આપતા જોવા મળે છે, "જો તમે ફરીથી અહીં જોવા મળે, તો તમારા માટે મારાથી ખરાબ કોઈ નહીં હોય." આનો જવાબ આપતા વિદ્યાર્થીઓ કહે છે, "ના, ના... બિલકુલ નહીં." ત્યારબાદ અધિકારી તેમને ધમકી આપતા કહે છે, "જો તમે ફરીથી અહીં જોવા મળ્યા, તો હું તમારા ખિસ્સામાં 50 ગ્રામ પાવડરના પેકેટ મૂકી દઈશ. તમારું આખું જીવન બરબાદ થઈ જશે; તમને જામીન પણ નહીં મળે." 

આ ઘટનાનો વીડિયો સોશિયલ મીડિયા પર વાયરલ થયા પછી, પોલીસે તેની તપાસનો આદેશ આપ્યો. ધારાસભ્ય રોહિત પવારે પણ વાયરલ વીડિયો પોસ્ટ કર્યો અને આ ઘટના અંગે પોતાનો વાંધો વ્યક્ત કર્યો. "આંદોલનને કચડી નાખવા માટે વિરોધીઓને ખોટા કેસમાં ફસાવવાની વાત આવે ત્યારે ભાજપ સાથે કોઈ મેળ ખાતું નથી. બીજા કયા પુરાવાની જરૂર છે? શું આ પોલીસ અધિકારી છે કે ડ્રગ્સ તસ્કર? સરકારે પહેલા આ અધિકારી સામે કેસ નોંધવો જોઈએ અને તપાસ કરવી જોઈએ. 

હવેથી, શાંતિપૂર્ણ રીતે વિરોધ કરી રહેલા વિદ્યાર્થીઓને ફસાવવાના કોઈપણ પ્રયાસને કોઈ સહન કરશે નહીં!" રોહિત પવારે જણાવ્યું હતું. હવે, પોલીસે આ મામલાની તપાસ શરૂ કરી છે.

આ મુદ્દા પર માહિતી આપતાં, મુંબઈ પોલીસના ડીસીપી (ઓપરેશન્સ) વિભાગના અધિકારીએ જણાવ્યું કે, "મુંબઈ પોલીસે આ મામલે તપાસનો આદેશ આપ્યો છે, અને હકીકતોની ચકાસણી કર્યા પછી કાર્યવાહી કરવામાં આવશે. તપાસ પૂર્ણ ન થાય ત્યાં સુધી સંબંધિત ડ્રાઇવરને તેના વર્તમાન પોસ્ટિંગના સ્થળેથી દૂર કરવામાં આવ્યો છે."