સંયુક્ત આરબ અમીરાતે (UAE) ઇરાનની સાથે બધા વેપાર, કારોબારી લેવડદેવડ અને નાણાકીય લેવડ-દેવડ નેકસ્ટ આદેશ સુધી રોકી દીધા છે. UAEનો આ નિર્ણય ઇરાન સાથે જોડાયેલા એક નવા મિસાઇલ વિવાદ બાદ આવ્યો છે. આનાથી બન્ને દેશો વચ્ચે હાલમાં સુધરી રહેલા સંબંધોને મોટો ઝટકો લાગ્યો છે. UAE ના રક્ષા મંત્રાલયના જણાવ્યા અનુસાર મંગળવારે તેની એર ડિફેન્સ સિસ્ટમે ઇરાનથી છોડવામાં આવેલી બે બેલેસ્ટિક મિસાઇલની શોધ કરી. આ મિસાઇલો UAE તરફ આવી રહી હતી. ત્યારબાદ UAEના લોકોના મોબાઇલ ફોન પર કેટલાક સમય માટે મિસાઇલ જોખમનું એલર્ટ મોકલવામાં આવ્યું.
UAEનું કહેવું છે કે તેની તપાસમાં સામે આવ્યું છે કે બંને મિસાઇલો દરિયાઈ જહાજોને નિશાન બનાવવા માટે છોડવામાં આવી હતી. એક મિસાઇલ UAEના પ્રાદેશિક જળવિસ્તારની બહાર સમુદ્રમાં પડી, જ્યારે બીજી UAEના પ્રાદેશિક જળવિસ્તારમાં પડી હતી. UAEના જણાવ્યા અનુસાર, આ ઘટનામાં કોઈ નુકસાન કે કોઈ ઘાયલ થયાના અહેવાલ નથી. જોકે, ઈરાને મિસાઈલ છોડવાનો ઈનકાર કર્યો છે. ઈરાની વિદેશ મંત્રાલયના પ્રવક્તા ઈસ્માઈલ બઘાઈએ UAEના આરોપોને પાયાવિહોણા ગણાવ્યા હતા અને ક્ષેત્રના દેશોને આવા આરોપો લગાવવાથી બચવા જણાવ્યું હતું.
UAEએ આર્થિક સંબંધો કેમ તોડ્યા?
મિસાઇલ ઘટના બાદ UAEના વિદેશ મંત્રાલયે ઈરાન સામે મોટું આર્થિક પગલું ભર્યું છે. મંત્રાલયના સંચાર નિર્દેશક અફરા અલ હમેલીએ જણાવ્યું કે ક્ષેત્રમાં વધતો તણાવ શાંતિ અને સુરક્ષા માટે જોખમ ઊભું કરી રહ્યો છે. આ કારણોસર ઈરાન સાથેનો તમામ વેપાર, વાણિજ્યિક આદાન-પ્રદાન અને નાણાકીય વ્યવહારો રોકી દેવામાં આવ્યા છે. આ પ્રતિબંધ ક્યાં સુધી ચાલુ રહેશે તેની કોઈ ચોક્કસ તારીખ જણાવવામાં આવી નથી.
