ભુજઃ કચ્છ જિલ્લામાં ચોમાસાના આગમનની આતુરતાપૂર્વક જોવાતી વાટ વચ્ચે હવામાનમાં સતત પલટો આવી રહ્યો છે. આજે સવારથી જ જિલ્લાના મોટા ભાગના વિસ્તારોમાં ધૂપ-છાંવનો માહોલ જોવા મળ્યો હતો. આકાશમાં વાદળો અને તડકાની સંતાકુકડી વચ્ચે પણ ગરમી અને અસહ્ય ઉકળાટનું જોર યથાવત્ રહ્યું હતું, જેના કારણે જિલ્લાવાસીઓ આકુળવ્યાકુળ બન્યા છે.

સ્થાનિક હવામાન કચેરીના નોંધાયેલા આંકડા મુજબ, ભુજ, કંડલા (એરપોર્ટ), કંડલા પોર્ટ અને નલિયા પંથકમાં મહત્તમ તાપમાન ૩૫ થી ૩૮ ડિગ્રી સેલ્સિયસની વચ્ચે નોંધાયું હતું, જ્યારે લઘુતમ તાપમાન ૨૭ થી ૨૯ ડિગ્રી સેલ્સિયસ આસપાસ રહ્યું હતું. આ ઉપરાંત, જિલ્લામાં સરેરાશ ૧૫ થી ૨૦ કિલોમીટર પ્રતિ કલાકની ઝડપે પવન ફૂંકાયો હતો. બપોરના સમયે તીવ્ર પવનના કારણે ધૂળની ડમરીઓ ઊડવાની સાથે ગરમ લૂનો પ્રભાવ પણ જોવા મળ્યો હતો, જેને પગલે જનજીવન પ્રભાવિત થયું હતું.

ગુજરાત સહિત દેશના ૧૩ રાજ્યોમાં હવામાન વિભાગે વરસાદનું એલર્ટ આપ્યું છે. સુરત, નવસારી, વલસાડ અને તાપીમાં મેઘમહેરની શક્યતા છે. અમદાવાદમાં વાદળછાયું વાતાવરણ રહેશે. જાણો તમારા વિસ્તારમાં આજે વરસાદ પડશે કે નહીં. વિગતવાર માહિતી માટે વીડિયો જુઓ. #GujaratWeather #Monsoon2026… pic.twitter.com/QxD8WAFc4O

— Mumbai Samachar Official (@Samachar_Mumbai) June 15, 2026

બીજી તરફ, ભારતીય હવામાન વિભાગ દ્વારા આગામી એક સપ્તાહ માટે જાહેર કરવામાં આવેલા વરતારા મુજબ કચ્છ જિલ્લામાં ભારે વરસાદ વરસવાની કોઈ શક્યતા દર્શાવવામાં આવી નથી. જોકે, આજે સવારથી જ આકાશમાં જોવા મળેલી વાદળોની આવન-જાવનને પગલે આગામી દિવસોમાં પ્રિ-મોન્સૂન વરસાદી ગતિવિધિઓ વેગ પકડે તેવી આશા સ્થાનિક સ્તરે પ્રબળ બની છે. હવામાનના વર્તમાન મિશ્ર મિજાજને જોતાં હાલ તુરંત લોકોને આ આકરા ઉકળાટ અને ગરમીમાંથી મુક્તિ મળે તેવા કોઈ ચિહ્નો દેખાતા નથી.

(ઉત્સવ વૈદ્ય)