લોકસભામાં વિરોધ પક્ષના નેતા રાહુલ ગાંધીએ સોમવારે પત્રકાર પરિષદ યોજીને કેન્દ્ર સરકાર અને મુખ્ય ચૂંટણી કમિશનર (CEC) જ્ઞાનેશ કુમાર પર આકરા પ્રહારો કર્યા હતા. રાહુલ ગાંધીએ દાવો કર્યો હતો કે સરકારના આશરે 200 અધિકારીઓ વિપક્ષના સંપર્કમાં છે અને તેમને અંદરની માહિતી આપી રહ્યા છે. તેમણે કહ્યું, ‘તમારી (મોદી) સરકારના 200 અધિકારીઓ અમારા સંપર્કમાં છે અને અમને માહિતી આપી રહ્યા છે… ED-CBI, વિદેશ મંત્રાલયના અંદરથી તમામ લોકો અમને ઇન્ફોર્મેશન આપી રહ્યા છે… તમારે જે કરવું હોય તે કરો… સત્ય અમારી સાથે છે.’

રાહુલ ગાંધીએ જણાવ્યું કે ચૂંટણી પ્રક્રિયા અને મતદાર યાદીને લઈને વિપક્ષ જે સવાલો ઉઠાવી રહ્યો છે, તેને દબાવવાનો પ્રયાસ કરવામાં આવી રહ્યો છે. તેમણે આરોપ લગાવ્યો કે કેન્દ્ર સરકાર મુખ્ય ચૂંટણી કમિશનર જ્ઞાનેશ કુમારનો બચાવ કરી રહી છે અને એ જ કારણે તેમની વિરુદ્ધ પ્રદર્શન કરનારાઓને દિલ્હી આવતા રોકવામાં આવી રહ્યા છે.

‘દિલ્હીને કિલ્લો બનાવી દેવામાં આવ્યું છે’

CEC જ્ઞાનેશ કુમાર વિરુદ્ધના પ્રદર્શનને લઈને દિલ્હીમાં સુરક્ષા વ્યવસ્થા પર સવાલો ઉઠાવતા રાહુલ ગાંધીએ કહ્યું કે લોકોને રાજધાનીમાં આવતા રોકવામાં આવી રહ્યા છે. તેમણે દાવો કર્યો કે ટ્રેન અને બસો દ્વારા આવી રહેલા લોકોને પણ રોકવામાં આવી રહ્યા છે અને સમગ્ર દિલ્હીને એક કિલ્લામાં ફેરવી દેવામાં આવ્યું છે. રાહુલ ગાંધીએ કહ્યું, ‘લોકોને દિલ્હી આવતા રોકવામાં આવી રહ્યા છે.. ટ્રેન, બસોને રોકવામાં આવી રહી છે… દિલ્હીને કિલ્લો બનાવી દેવામાં આવ્યું છે… બધી જગ્યાએ પોલીસ છે.’

’50 ટકા પોલીસકર્મીઓ અમારી સાથે’

રાહુલ ગાંધીએ દાવો કર્યો હતો કે દિલ્હી પોલીસ, CRPF અને ITBPના જવાનો વચ્ચે પણ યુવાનો પર થઈ રહેલી કાર્યવાહીને લઈને નારાજગી છે. તેમણે કહ્યું કે પોલીસકર્મીઓ તેમને જણાવી રહ્યા છે કે યુવાનોને કેમ મારવામાં આવી રહ્યા છે. રાહુલ ગાંધીએ દાવો કર્યો કે આશરે 50 ટકા પોલીસકર્મીઓ તેમના આંદોલનનું સમર્થન કરી રહ્યા છે. તેમણે ઉમેર્યું કે પોલીસ અને વહીવટીતંત્રના લોકો પણ સરકારના આ વલણથી પરેશાન છે.

‘સરકાર ઘણી મોટી ભૂલ કરી રહી છે’

રાહુલ ગાંધીએ આરોપ લગાવ્યો કે વોટ ચોરી વિરુદ્ધ વિપક્ષના આંદોલનને દબાવવાનો પ્રયાસ થઈ રહ્યો છે. રાહુલ ગાંધીએ ભાજપ અને RSS પર યુવાનો સામે કાર્યવાહી કરાવવાનો આરોપ પણ મૂક્યો હતો. તેમણે કહ્યું કે સરકાર પ્રદર્શનને રોકીને બહુ મોટી ભૂલ કરી રહી છે. તેમના મતે, વિપક્ષ આ આંદોલન દ્વારા જનતા સમક્ષ એ મુદ્દો લાવવા માંગે છે કે વડાપ્રધાન નરેન્દ્ર મોદી મુખ્ય ચૂંટણી કમિશનરનો બચાવ કેમ કરી રહ્યા છે.

‘જ્ઞાનેશ કુમાર રાજીનામું કેમ નથી આપી રહ્યા?’

રાહુલ ગાંધીએ આરોપ લગાવ્યો કે વિપક્ષને જંતર-મંતર સુધી જવાની મંજૂરી આપવામાં નથી આવતી અને પ્રદર્શન માટે યોગ્ય જગ્યા પણ ફાળવવામાં આવી નથી. રાહુલ ગાંધીએ કહ્યું કે વિપક્ષ ચૂંટણી પંચની નિષ્પક્ષતા અને મતદાર યાદીમાં કથિત ગેરરીતિઓ પર સવાલો ઉઠાવવાનું ચાલુ રાખશે. રાહુલ ગાંધીએ મુખ્ય ચૂંટણી કમિશનર જ્ઞાનેશ કુમારના રાજીનામાની માગણી દોહરાવી હતી. તેમણે જણાવ્યું કે વિપક્ષ ચૂંટણી પ્રક્રિયામાં કથિત અનિયમિતતાઓ અંગે સવાલો ઉઠાવી રહ્યો છે અને ચૂંટણી પંચે તેનો જવાબ આપવો જોઈએ.