ભાજપે ઉમેદવારી જાહેર કરતાં જ પવારે આપ્યા સંકેત: પ્રાજક્ત તનપુરેનું નામ ચર્ચામાં

(અમારા પ્રતિનિધિ તરફથી)
મુંબઈ: ભાજપના દિવંગત વિધાનસભ્ય શિવાજીરાવ કર્ડીલેના નિધન બાદ રાહુરી વિધાનસભા મતવિસ્તારમાં પેટાચૂંટણીની બિનવિરોધ કરવાના ભાજપના પ્રયાસો પર શરદ પવારે પાણી ફેરવી દીધું છે. ભાજપે આ બેઠક પરથી શિવાજીરાવના દીકરા અક્ષયને ઉમેદવારી આપવાની જાહેરાત કરી હતી, પરંતુ શરદ પવારના નેતૃત્વ હેઠળની રાષ્ટ્રવાદી કોંગ્રેસ પાર્ટી (શરદ પવાર જૂથ) પણ સક્રિય થઈ ગઈ છે. એવી માહિતી મળી રહી છે કે ભૂતપૂર્વ વિધાનસભ્ય પ્રાજક્ત તનપુરેનું નામ લગભગ નક્કી થઈ ગયું છે, અને સત્તાવાર જાહેરાત ટૂંક સમયમાં કરવામાં આવશે.

રાહુરી મતવિસ્તાર છેલ્લા કેટલાક વર્ષોથી ભાજપનો ગઢ માનવામાં આવે છે. શિવાજીરાવ કર્ડીલેના નેતૃત્વમાં, પાર્ટીએ અહીં મજબૂત પકડ સ્થાપિત કરી હતી. તેમના મૃત્યુ પછી પણ, ભાજપે આ પરંપરા ચાલુ રાખવા માટે અક્ષય કર્ડીલેમાં વિશ્ર્વાસ દર્શાવ્યો છે. તેઓ હાલમાં ‘શિવ નિર્ધાર યાત્રા’ દ્વારા મતદારો સાથે પોતાનો સંપર્ક વધારી રહ્યા છે.

બીજી તરફ, પ્રાજક્ત તનપુરેએ ‘જનાશીર્વાદ યાત્રા’ કાઢીને મતવિસ્તારમાં પોતાની પ્રવૃત્તિ વધારી છે. તેમની સંભવિત ઉમેદવારીને ધ્યાનમાં રાખીને, તેમણે પોતાની રાજકીય તાકાત બતાવવાનું શરૂ કરી દીધું છે.2019ની વિધાનસભા ચૂંટણીમાં, પ્રાજક્ત તાનપુરેએ શિવાજીરાવ કર્ડિલેને હરાવીને મોટી જીત મેળવી હતી. ત્યારબાદ, તેઓ મહા વિકાસ આઘાડી સરકારમાં ઉર્જા પ્રધાન બન્યા હતા. જોકે, એવું માનવામાં આવે છે કે તેઓ સ્થાનિક સ્તરે ઇચ્છિત અસર ઉભી કરવામાં નિષ્ફળ રહ્યા હતા.2024માં, શિવાજીરાવ કર્ડિલેએ જોરદાર વાપસી કરી હતી અને તનપુરેને 34 હજાર મતોથી હરાવ્યા હતા. આ જીત સાથે, ભાજપનો ગઢ ફરીથી મજબૂત બન્યો હતો.