અયોધ્યામાં રામ મંદિર દાન ચોરીના વિવાદ વચ્ચે એક મહિલા શ્રદ્ધાળુએ  ચાર કરોડનું દાન આપ્યું છે. તેમજ વિનંતી કરી છે કે આ ભંડોળનો ઉપયોગ સ્ટાફનો પગાર અને સુવિધા વધારવા માટે કરવા જણાવ્યું છે.

કેન્દ્રીય મંત્રી નીતિન ગડકરીએ નાગપુર જિલ્લાના કાટોલમાં એક કાર્યક્રમમાં જણાવ્યું હતું કે હું  છેલ્લા 30 વર્ષથી જાહેર જીવનમાં સક્રિય છે. હવે હું  વધુ કામ કરી શકું તેમ નથી અને નવી પેઢીને તક આપવી જોઈએ.આ નિવેદન બાદ રાજકીય વર્તુળોમાં તેમના રાજકીય સંન્યાસની અટકળો તેજ બની છે.

રાજકોટનાં સુપ્રસિદ્ધ જન્માષ્ટમીના લોકમેળા-૨૦૨૬નું નામ જાહેર કરવામાં આવ્યું છે. જિલ્લા વહીવટી તંત્ર દ્વારા "વિરાસતથી વિકાસ” નામકરણ કરવામાં આવ્યું છે. આ મેળો આગામી તારીખ 2 થી 6 સપ્ટેમ્બર સુધી યોજાશે, જેમાં લાખોની સંખ્યામાં રાજકોટ અને સૌરાષ્ટ્રના લોકો ભાગ લેશે.

પંજાબમાં આગામી વર્ષે યોજાનારી વિધાનસભા ચૂંટણી મુદ્દે ભાજપે મોટી જાહેરાત કરી છે. આ અંગે પાર્ટીના વરિષ્ઠ નેતા બી.એલ. સંતોષે જણાવ્યું હતું કે  ભાજપ પંજાબની તમામ 117 બેઠકો પર એકલા હાથે ચૂંટણી લડશે.

ભારતમાં ખાંડ ભાવમાં અચાનક વધારા બાદ લોકો દ્વારા મોટાપાયે ખરીદી કરવામાં આવી રહી છે. આ દરમિયાન ઇન્ડિયન સુગર એન્ડ બાયો-એનર્જી મેન્યુફેક્ચરર્સ એસોસિએશને ખાંડની ઉપલબ્ધતા અંગે સ્પષ્ટતા કરી છે. તેમજ કહ્યું કે ખાંડની કોઈ અછત નથી.

કેન્દ્ર શાસિત પ્રદેશ લદ્દાખમાં ગૃહ મંત્રાલયે સુરક્ષા વ્યવસ્થામાં વધારો કર્યો છે. જેમાં લદ્દાખમાં વધુ 12 સીઆરપીએફની કંપની તૈનાત કરવાનો નિર્ણય લેવામાં આવ્યો છે. સુરક્ષા વ્યવસ્થાના અચાનક વધારા અંગે સત્તાવાર રીતે કોઇ માહિતી આપવામાં આવી નથી.

ભારતમાં વન નેશન વન ઇલેક્શન બિલ મુદ્દે કવાયત તેજ કરવામાં આવી છે.  બંધારણના 129માં સુધારા અંગે જેપીસી દ્વારા વિચાર-વિમર્શ કરવામાં આવી રહ્યો છે. જેમાં સત્તાધારી પક્ષ ઉપરાંત વિપક્ષ નેતાઓ પણ સામેલ થઇ રહ્યા છે.

દેશમાં કોમ્યુનિકેશનના વધતાં વ્યાપ વચ્ચે મોબાઈલ ફોનનો ઉપયોગ સતત વધી રહ્યો છે. તેમજ મોબાઈલમાં સિમ કાર્ડ મેળવવા માટે ચોક્કસ દસ્તાવેજોની જરૂર પડે  છે. જેના થકી સીમ કાર્ડ યુઝર્સની માહિતી મેળવી શકાય  છે. આ ઉપરાંત આજ કાલ સિમ કાર્ડના દૂરઉપયોગના કિસ્સા પણ વધી રહ્યા છે. જેના પગલે કેન્દ્ર સરકારે આજથી  સિમ કાર્ડ ખરીદવાના નિયમોમાં ફેરફાર કર્યા છે.

સ્ટેટ ઈમરજન્સી ઓપરેશન સેન્ટર, ગાંધીનગર મુજબ સવારે 10થી બપોરના 12 કલાકના સમયગાળામાં 7 તાલુકામાં વરસાદ વરસ્યો હતો. તાપીના ડોલવણમાં સૌથી વધુ 0.39 ઇંચ વરસાદ વરસ્યો હતો.

ડેડીયાપાડાના ધારાસભ્ય ચૈતર વસાવા વન વિભાગના કર્મચારીને માર મારવાના કેસમાં સજા કાપી રહ્યા છે. આ કેસમાં ચૈતર વસાવાએ ગુજરાત હાઈ કોર્ટમાં જામીન અરજી કરી હતી. હાઈ કોર્ટે ચૈતર વસાવાને જામીન આપવાનો ઈનકાર કરતા અરજી નામંજૂર કરી હતી.

ભારત-શ્રીલંકા બીજી ટેસ્ટનો આજે બીજો દિવસ છે. લંચ સમયે ટીમ ઈન્ડિયાનો સ્કોર 419/6 છે. પંત 66 રન (ચાર ચોગ્ગા, બે છગ્ગા) અને ધ્રુવ જુરેલ 59 રન (પાંચ ચોગ્ગા) સાથે રમતમાં છે.

નાગપુરઃ મહારાષ્ટ્રના નાગપુરમાં ક્લોરિન ગેસ લીક થવાની ઘટના પ્રકાશમાં આવી છે. ક્લોરિન ગેસ લીક ​​થવાને કારણે ઘણા લોકો બીમાર પડ્યા હોવાથી તેમને સારવાર માટે હોસ્પિટલ ખસેડવામાં આવ્યાં છે. આ સમગ્ર ઘટના નાગપુરના ગોધનીનગર પંચાયતમાં બની હોવાનું સૂત્રોએ જણાવ્યું છે. આ ગેસ લીક થવાના કારણે કુલ 40થી વધારે લોકોને શ્વાસ લેવામાં તકલીફ પડી હોવાથી તેમને હોસ્પિટલ ખસેડવામાં આવ્યાં છે.

આજે શ્રાવણ માસનો બીજા સોમવાર છે. સોમનાથ મહાદેવના દર્શન માટે ભક્તોનું ઘોડાપૂર ઉમટ્યું છે. રાત્રે ત્રણ વાગ્યાથી મંદિરના દ્વાર ખોલવામાં આવ્યા હતા, જ્યારે વહેલી સવારે ચાર વાગ્યાથી દર્શન શરૂ થયા હતા. જય સોમનાથના નાદથી મંદિર પરિસર ગુંજી ઉઠ્યું હતું.

મહારાષ્ટ્રના અમરાવતીમાં આજે સવારે મહિલા હોસ્પિટલના નવજાત શિશુ વોર્ડમાં ભીષણ આગ લાગવાથી ગભરાટ અને અરાજકતા ફેલાઈ ગઈ. આગમાં દાઝી જવાથી ત્રણ નવજાત શિશુઓના મોત થયાનું પ્રકાશમાં આવ્યું છે. સવારે 3:30 વાગ્યે વેન્ટિલેટરમાં અચાનક વિસ્ફોટ થવાથી આગ લાગી હતી. વોર્ડમાં 39 નવજાત શિશુઓ હતા, જેમાંથી 36 ને બચાવી લેવામાં આવ્યા હતા, જ્યારે ત્રણના મોત થયા હતા.