જમ્મુ-કાશ્મીર: જમ્મુ-કાશ્મીરના માતા વૈષ્ણો દેવી શ્રાઈનમાં 500 કરોડ રૂપિયાથી વધુની નકલી ચાંદીના ચઢાવા મામલે જમ્મુ કોર્ટ કડક વલણ અપનાવી રહી છે. કોર્ટે ક્રાઈમ બ્રાન્ચના તપાસ અધિકારીને જરૂરી રેકોર્ડ સાથે હાજર થવા જણાવ્યું છે. આ મામલાની આગામી સુનાવણી 29 જુલાઈએ થશે. જમ્મુના ચીફ જ્યુડિશિયલ મેજિસ્ટ્રેટ મુનીશ કુમાર મન્હાસની અદાલતે ક્રાઈમ બ્રાન્ચના તપાસ અધિકારીને જરૂરી રેકોર્ડ સાથે આગામી સુનાવણીમાં વ્યક્તિગત રીતે હાજર રહેવાનો નિર્દેશ આપ્યો છે.

ચાંદીના ચઢાવામાં કથિત ભેળસેળની તપાસની માંગ

વકીલ દીપક શર્મા દ્વારા દાખલ કરવામાં આવેલી અરજી પર સુનાવણી દરમિયાન આ નિર્દેશ આપવામાં આવ્યો હતો. વકીલે અગાઉ ઇન્સ્પેક્ટર જનરલ ઓફ પોલીસ (ક્રાઇમ બ્રાન્ચ, જમ્મુ) અને સિનિયર સુપરિટેન્ડન્ટ ઓફ પોલીસ (ક્રાઇમ બ્રાન્ચ, ઇકોનોમિક ઓફેન્સ વિંગ, જમ્મુ) સમક્ષ વિગતવાર ફરિયાદ નોંધાવી હતી. ફરિયાદમાં શ્રી માતા વૈષ્ણો દેવી શ્રાઈનમાં ભક્તો દ્વારા ચઢાવવામાં આવેલા ચાંદીના ચઢાવામાં કથિત ભેળસેળ કરવા, તેને બદલવા અને સંભવિત ઉચાપત કરવાના મામલે FIR નોંધવા તેમજ વ્યાપક તપાસની માંગ કરવામાં આવી હતી.

વકીલ દીપકે 9 મે 2026ના રોજ આપેલી ફરિયાદમાં ગંભીર ગુનાહિત કૃત્યોના આક્ષેપો કર્યા હતા, જેમાં ગુનાહિત કાવતરું, છેતરપિંડી, વિશ્વાસઘાત, ઉચાપત, રેકોર્ડમાં હેરાફેરી અને કેડમિયમયુક્ત સામગ્રીની સંભવિત ખરીદી કે ઉપયોગનો સમાવેશ થાય છે. ક્રાઈમ બ્રાન્ચ તરફથી કોઈ અસરકારક કાર્યવાહી ન થતાં, ફરિયાદકર્તાએ જમ્મુના ચીફ જ્યુડિશિયલ મેજિસ્ટ્રેટની કોર્ટના દ્વાર ખખડાવ્યા હતા. તેમણે આ મામલે કાર્યવાહીનો રિપોર્ટ રજૂ કરવા, FIR દાખલ કરવા અને તપાસ માટે યોગ્ય નિર્દેશ આપવાની માંગ કરી છે.

ક્રાઈમ બ્રાન્ચ જવાબદારીમાંથી બચી શકે નહીં

અદાલતના નિર્દેશ બાદ, ક્રાઈમ બ્રાન્ચે એક સ્ટેટસ રિપોર્ટ દાખલ કર્યો હતો, જેમાં જણાવવામાં આવ્યું કે ફરિયાદને શરૂઆતમાં મંજૂરી માટે શ્રીનગર સ્થિત ક્રાઈમ હેડક્વાર્ટર મોકલવામાં આવી હતી. મંજૂરી મળ્યા પછી, તેને યોગ્ય કાર્યવાહી માટે ઝોનલ પોલીસ હેડક્વાર્ટર, જમ્મુ મોકલી દેવાઈ હતી. વકીલ દીપક શર્માએ આજે સ્ટેટસ રિપોર્ટ પર વિગતવાર વાંધાઓ નોંધાવતા દલીલ કરી હતી કે ફરિયાદને માત્ર વહીવટી રીતે આગળ ધપાવવી, તેને ગંભીર ગુનાહિત બાબતોની માહિતી મળવા પર કરવામાં આવતી કાયદાકીય કાર્યવાહી ન ગણી શકાય. તેમણે જણાવ્યું કે ક્રાઈમ બ્રાન્ચ, ઇકોનોમિક ઓફેન્સ વિંગ, જમ્મુ, પોતે ગૃહ વિભાગના સંબંધિત જાહેરનામા હેઠળ એક નોટિફાઇડ (અધિસૂચિત) પોલીસ સ્ટેશન છે, અને તેના પોલીસ અધિક્ષક (SP) સ્ટેશન હાઉસ ઓફિસર (SHO) તરીકે કામ કરે છે.