અમેરિકી રાષ્ટ્રપતિ ડોનાલ્ડ ટ્રમ્પે ભારત વિરોધી ઇલ્હાન ઉમરને સંપૂર્ણપણે બેઇમાન અને ખરાબ વ્યક્તિ ગણાવી, જ્યારે ફેડરલ ઓથોરિટીએ વોશિંગ્ટન, ડીસીમાં આવેલા તેમના ઘર પર દરોડો પાડ્યો. ટ્રમ્પે જણાવ્યું કે ન્યાય વિભાગ (જસ્ટિસ ડિપાર્ટમેન્ટ) ઇલ્હાન ઉમરના કેસની તપાસ કરી રહ્યો છે. આ અગાઉ ટ્રમ્પ કટાક્ષ કરી ચૂક્યા છે કે ઉમર ગેરકાયદેસર રીતે અમેરિકા આવી હતી અને અહીં પ્રવેશ મેળવવા માટે તેમણે પોતાના ભાઈ સાથે લગ્ન કર્યા હતા.

આ દરમિયાન, ન્યાય વિભાગે જણાવ્યું કે આ દરોડો ચાલી રહેલી એક ફેડરલ તપાસનો ભાગ છે. બીજી તરફ, આ કેસ સાથે સંકળાયેલી એક વ્યક્તિના જણાવ્યા અનુસાર, આ તપાસ કથિત ઇમિગ્રેશન છેતરપિંડી (ફ્રોડ) સાથે જોડાયેલી છે.

ઇલ્હાન ઉમરે ટ્રમ્પ વહીવટીતંત્ર પર રાજકીય રીતે ડરાવવા-ધમકાવવાનો આરોપ પણ લગાવ્યો છે અને કહ્યું કે સરકારનો ઉપયોગ રાજકીય વિરોધીઓ સામે હથિયાર તરીકે કરવામાં આવી રહ્યો છે.

જણાવી દઈએ કે, અમેરિકી ન્યાય વિભાગના જણાવ્યા અનુસાર, 'હોમલેન્ડ સિક્યુરિટી ઇન્વેસ્ટિગેશન્સ' (HSI) દ્વારા કોર્ટ દ્વારા જારી કરાયેલા વોરંટના આધારે આ દરોડો પાડવામાં આવ્યો હતો. વોશિંગ્ટનમાં સોમવારે ઇલ્હાન ઉમરના ઘરની બહાર HSI ના જેકેટ પહેરેલા ઘણા એજન્ટો જોવા મળ્યા હતા.

જસ્ટિસ ડિપાર્ટમેન્ટના પ્રવકતાએ  પુષ્ટિ કરતા કહ્યું કે વોશિંગ્ટન ડીસીમાં જસ્ટિસ ડિપાર્ટમેન્ટ તરફથી સુરક્ષિત કરાયેલા અદાલતી વોરંટ હેઠળ કાર્યવાહી કરવામાં આવી છે. આ કાર્યવાહી ફેડરલ ઇન્વેસ્ટિગેશનનો હિસ્સો છે.

તે બીજી તરફ ઇલ્હાન ઉમરે સોશિયલ મીડિયા પ્લેટફોર્મ 'એક્સ' પર એક પોસ્ટમાં જણાવ્યું, 'હું ઠીક છું. કોઈ ભૂલ ન કરશો... આ રાજકીય દુશ્મનોને નિશાન બનાવવાનો અને ફેડરલ કાયદા અમલીકરણ એજન્સીઓનો હથિયાર તરીકે ઉપયોગ કરવાનો પ્રયાસ છે. દસ વર્ષથી, ટ્રમ્પ મારા પર પાયાવિહોણા જૂઠાણાં અને બદનામ કરવાના અભિયાનો ચલાવીને મને નિશાન બનાવી રહ્યા છે. આ તેમના રાજકીય ડરાવવા-ધમકાવવાના અભિયાનમાં માત્ર સૌથી નવું પગલું છે. હું ચૂપ નહીં રહું.'