રાજકોટઃ ગુજરાતમાં જુગારના અડ્ડા પર રેડની ઘટનામાં 4 પોલીસ સસ્પેન્ડ કરવામાં આવ્યા હતા. જ્યારે 5ની ટ્રાન્સફર કરવામાં આવી હતી. ગીર સોમનાથના વેરાવળમાં ચાલતા જુગારધામ પર રેડ પાડવા ગયેલી સ્ટેટ મોનિટરિંગ સેલની ટીમ પર કરવામાં આવેલા હુમલાને લઈ આ કાર્યવાહી કરવામાં આવી હતી.
શું છે આખો કેસ
આ ઘટના 8 જુલાઈના રોજ બની હતી, એસએમસી દ્વારા વેરાવળના મોટા કોળીવાડા વિસ્તારમાં ભીખુ વાજાના નિવાસસ્થાને દરોડો પાડવામાં આવ્યો હતો. અહીં ગેરકાયદેસર જુગારધામ ચલાવવામાં આવી રહ્યું હતું. પોલીસના જણાવ્યા અનુસાર, દરોડા દરમિયાન ટીમ પર ટોળા દ્વારા કથિત રીતે હુમલો કરવામાં આવ્યો હતો, જેના કારણે ભીડને વિખેરવા માટે એસએમસીના એક અધિકારીને હવામાં બે રાઉન્ડ ફાયરિંગ કરવાની ફરજ પડી હતી. આ ઘટના બાદ, વેરાવળ સિટી પોલીસે ૩૪ આરોપીઓ સામે બે અલગ-અલગ એફઆઈઆર નોંધી હતી.
રવિવારના રોજ, ગીર સોમનાથના પોલીસ અધિક્ષક જયદીપસિંહ જાડેજાએ દરોડા દરમિયાન તેમની ફરજ બજાવવામાં કથિત બેદરકારી બદલ વેરાવળ સિટી પોલીસ સ્ટેશન સાથે જોડાયેલા સર્વેલન્સ સ્ક્વોડના ચાર સભ્યોને સસ્પેન્ડ કર્યા હતા. સસ્પેન્ડ કરાયેલા કર્મચારીઓમાં આસિસ્ટન્ટ સબ-ઇન્સ્પેક્ટર નરવણસિંહ ગોહિલ અને અજીતસિંહ પરમાર, તેમજ હેડ કોન્સ્ટેબલ નટુભા બસિયા અને પ્રદીપસિંહ ખેરનો સમાવેશ થતો હતો.
આ ઉપરાંત એસપીએ જાહેર હિતમાં પાંચ અધિકારીઓની લીવ રિઝર્વમાં બદલી પણ કરી હતી. જેમાં વેરાવળ સિટી પોલીસ ઇન્સ્પેક્ટર જે.એન. ગઢવી, લોકલ ક્રાઇમ બ્રાન્ચ ઇન-ચાર્જ પોલીસ ઇન્સ્પેક્ટર એસ.વી. રાજપૂત, એલસીબી પોલીસ સબ-ઇન્સ્પેક્ટર એચ.એલ. જેબલિયા અને એ.સી. સિંધવ, તેમજ વેરાવળ સિટી પોલીસ સબ-ઇન્સ્પેક્ટર પી.પી. પ્રજાપતિનો સમાવેશ થતો હતો.
પોલીસે જણાવ્યું હતું કે પોતાની ફરજ બજાવવામાં બેદરકાર જણાતા કર્મચારીઓ સામે વિભાગીય કાર્યવાહી શરૂ કરવામાં આવી છે, જ્યારે 34 આરોપીઓ સામે નોંધાયેલી બે એફઆઈઆરની તપાસ ચાલુ છે.
