જકાર્તા: ઈન્ડોનેશિયાના મુખ્ય ટાપુ જાવા (Java Island) પરથી એક અત્યંત હૃદયદ્રાવક અને મોટી દુર્ઘટના પ્રકાશમાં આવી છે. રવિવારે બપોરે એક વ્યસ્ત હાઈવે પર લગ્ન પ્રસંગમાં હાજરી આપીને પરત ફરી રહેલા મહેમાનોની ખુલ્લી પીકઅપ વાનને બે ટ્રકોએ વચ્ચે કચડી નાખી હતી. આ ભયાનક અકસ્માતમાં 13 લોકોના ઘટનાસ્થળે જ કમકમાટીભર્યા મોત નીપજ્યા છે, જ્યારે અન્ય 5 લોકો ગંભીર રીતે ઈજાગ્રસ્ત થયા હોવાના અહેવાલ છે.
યુ-ટર્ન લેતી વખતે કાળ આંબી ગયો
સ્થાનિક ટ્રાફિક પોલીસના જણાવ્યા અનુસાર, આ કાળજું કંપાવી દેનારો અકસ્માત રવિવારે બપોરે ઇન્દ્રામાયુ રીજન્સીના કિયાજારન કુલોન ગામ પાસે ઉત્તરીય દરિયાકાંઠાના હાઇવે પર સર્જાયો હતો. મૃતકો પાડોશી ગામ પારેન ખાતે એક લગ્ન સમારોહ પતાવીને પોતાના ઘરે પરત ફરી રહ્યા હતા. પીકઅપ વાન જ્યારે હાઈવે પર બનેલા મીડિયન કટ પાસેથી યુ-ટર્ન લેવા માટે ધીમી પડી અને ઊભી રહી, બરાબર એ જ સમયે પાછળથી પૂરપાટ ઝડપે આવી રહેલી એક વિંગ-બોક્સ ટ્રકે તેને જોરદાર ટક્કર મારી હતી.
એક ટક્કર થઈ અને બીજી લેનમાંથી મોત આવ્યું
ટ્રકની ટક્કર એટલી પ્રચંડ હતી કે ખુલ્લી પીકઅપ વાન ફંગોળાઈને હાઈવેની સામેની લેનમાં જતી રહી હતી. કમનસીબે, એ જ સમયે સામેની લેનમાંથી આવી રહેલી બીજી એક ટ્રકે આ પીકઅપ વાનને ફરીથી જોરદાર અડફેટે લીધી હતી. બે ભારે વાહનો વચ્ચે કચડાઈ જવાને કારણે પીકઅપ વાનમાં સવાર એક ડઝનથી વધુ લોકો હાઈવે પર ફેંકાઈ ગયા હતા અને ગંભીર ઈજાઓ થવાને કારણે 13 લોકોના જીવ ચાલ્યા ગયા હતા.
ઈન્ડોનેશિયાના જાવા ટાપુ પર લગ્ન પ્રસંગમાંથી પરત ફરી રહેલા મહેમાનોની પીકઅપ વાનને બે ટ્રકોએ કચડી નાખતા 13 લોકોના કરુણ મોત#indonesia #Javahighwaycrash pic.twitter.com/KE32Q4zbFG
— MG Vimal ✍️ - વિમલ પ્રજાપતિ (@mgvimal_12) July 13, 2026
અકસ્માતના ચોક્કસ કારણોની તપાસ શરૂ કરવામાં આવી
ટ્રાફિક પોલીસે માહિતી આપી છે કે, અકસ્માતમાં ઘાયલ થયેલા 5 લોકોને તાત્કાલિક નજીકની હોસ્પિટલમાં ખસેડવામાં આવ્યા છે, જ્યાં કેટલાકની હાલત ગંભીર હોવાનું કહેવાય છે. હાલ પોલીસ અને વહીવટી તંત્ર દ્વારા અકસ્માતના ચોક્કસ કારણોની તપાસ કરવામાં આવી રહી છે. ઉલ્લેખનીય છે કે, ઈન્ડોનેશિયાના ટાપુઓ પર નબળા માર્ગ સુરક્ષાના નિયમો, ઓવરલોડેડ વાહનો અને ટ્રાફિક નિયમોના સરેઆમ ઉલ્લંઘનને કારણે આવા જીવલેણ અકસ્માતો અવારનવાર સામે આવતા રહે છે.
