આજના ડિજિટલ સમય અને આધુનિક લાઈફસ્ટાઈલની દોડધામમાં માણસ માત્ર અન્ય લોકોના સંબંધોથી જ નહીં, પરંતુ ધીમે ધીમે પોતાનાથી પણ દૂર થઈ રહ્યો છે. આજના સ્પર્ધાત્મક યુગમાં એ સૌથી વધુ જરૂરી છે કે તમે તમારી જાતને પ્રાથમિકતા આપો, જેને 'સેલ્ફ લવ' (Self Love) કહેવામાં આવે છે. પોતાની જાતને મહત્વ આપવાથી અને પોતાનું ધ્યાન રાખવાથી માત્ર તમારા કામમાં પ્રોડક્ટિવિટી જ નથી વધતી, પરંતુ તમારા પ્રોફેશનલ અને પર્સનલ સંબંધોમાં પણ સકારાત્મક સુધારો જોવા મળે છે.

તમને શું ગમે છે? શું નથી ગમતું?
સેલ્ફ લવની શરૂઆત કરવા માટે સૌથી પહેલા પોતાની લાગણીઓને સમજવી અત્યંત જરૂરી છે. તમને શું ગમે છે અને શું નથી ગમતું, તે તમારાથી વધુ સારી રીતે અન્ય કોઈ સમજી શકે નહીં. ફરવા જવું હોય, કંઈક નવું શીખવું હોય કે પોતાની જાતને કોઈ ટ્રીટ આપવી હોય; જે પણ વસ્તુઓ તમને ખુશી આપે છે તે જાતે જ પૂરી કરો અને તેના માટે ક્યારેય અન્ય લોકો પર નિર્ભર ન રહો. આ ઉપરાંત, પોતાની જાતના સાચા મિત્ર બનો. કામ કે સંબંધોને નિભાવવાના કોઈ અનાવશ્યક દબાણમાં આવ્યા વિના તમારા શરીર અને મન સાથે નરમાશથી પેશ આવો.

'ના' કહેતા શીખો
પોતાની જાતને પ્રેમ કરવાનો અર્થ પોતાના સ્વાસ્થ્ય અને ફિટનેસનું પૂરતું ધ્યાન રાખવો પણ છે. યોગ્ય ડાયેટ લેવાની સાથે ફિટ રહેવા માટે યોગા, જિમ કે ડાન્સ ક્લાસમાં જોડાવું જોઈએ અને નિયમિત હેલ્થ ચેકઅપને ક્યારેય નજરઅંદાજ ન કરવું જોઈએ. આ સાથે જ, જીવનમાં અમુક મર્યાદાઓ નક્કી કરી 'ના' કહેતા શીખવું પણ એટલું જ અગત્યનું છે. જો તમારી પાસે સમય ન હોય અથવા કોઈ કામ કરવાની ઈચ્છા ન હોય, તો સામેવાળાને ખોટું લાગશે તેવા સંકોચ અને અપરાધભાવ વિના અત્યંત શાલીનતાથી ના પાડવાની આદત કેળવો.

દરેક વ્યક્તિમાં કંઈક ખાસિયત અને કેટલીક ખામીઓ રહેલી હોય છે, તેથી ક્યારેય પણ પોતાની સરખામણી અન્ય લોકો સાથે કરવી જોઈએ નહીં. વડીલો હંમેશા કહે છે કે ઈશ્વરે બનાવેલી દરેક રચના સુંદર છે. પોતાની જાત પર કામ કરવું અને તેને નિખારવી જરૂરી છે, પરંતુ અન્ય લોકો સાથે સરખામણી કરવાથી માત્ર લઘુતાગ્રંથિ જ જન્મે છે. જો તમારે સાચા અર્થમાં પોતાની જાત સાથે પ્રેમ કરવો હોય, તો અન્યની સરખામણી કરવાને બદલે માત્ર પોતાના વ્યક્તિત્વને વધુ બહેતર બનાવવા પર જ ધ્યાન કેન્દ્રિત કરો.