(અમારા પ્રતિનિધિ તરફથી)

મુંબઈ: મહારાષ્ટ્રમાં સ્થાનિક સ્વરાજ્ય સંસ્થાઓમાંથી ચૂંટાઈ આવતા વિધાન પરિષદના સભ્યો માટેની ચૂંટણી માટે મહાયુતિમાં મોટી ખેંચતાણ ચાલી રહી હોવાનું જોવા મળી રહ્યું છે. કેટલીક બેઠકો પર હજુ પણ ડખો ચાલી રહ્યો છે. પરંપરાગત બેઠકોની અદલાબદલીની ચર્ચા થઈ રહી છે, પરંતુ એવું લાગે છે કે તેના માટે પણ રાજકીય સમીકરણ ગોઠવવા માટે ઘણા પ્રયાસો થઈ રહ્યા છે. છત્રપતિ સંભાજીનગર પછી જળગાંવની બેઠક પર પણ આવી જ મૂંઝવણ ઊભી થઈ છે. પાણી પુરવઠા ખાતાના પ્રધાન ગુલાબરાવ પાટીલ પોતાના પુત્રને વિધાન પરિષદની ટિકિટ અપાવવા માટે જોરશોરથી મેદાનમાં ઉતર્યા છે. બીજી તરફ, પ્રધાન ગિરીશ મહાજન પણ મેદાનમાં ઉતર્યા છે. શું જળગાંવની બેઠક પર દિલ્હીમાં રાજકારણ ગરમાઈ રહ્યું છે? એવી ચર્ચા રાજકીય વર્તુળોમાં ચાલી રહી છે. 

ગિરીશ મહાજન પણ દિલ્હીમાં

નાયબ મુખ્ય પ્રધાન એકનાથ શિંદે તાત્કાલિક દિલ્હી જવા રવાના થયા હતા. જોકે તેઓ વિધાનસભા પરિષદની બેઠકોની વહેંચણી અંગે દિલ્હી ગયા હતા કે અન્ય કારણોસર તે હજુ સ્પષ્ટ કરવામાં આવ્યું નથી, પરંતુ તેમની દિલ્હી મુલાકાતથી રાજ્યમાં અનેક અટકળો શરૂ થઈ ગઈ છે. તેમના પગલે ભાજપના પ્રધાન ગિરીશ મહાજન દિલ્હી જવા રવાના થયા હતા. વિધાન પરિષદની ચૂંટણીની પૃષ્ઠભૂમિમાં રાજ્યમાં રાજકીય ગતિવિધિઓએ વેગ પકડ્યો છે. ભાજપના સંકટમોચક ગણાતા ગિરીશ મહાજન શિંદેને અનુસરીને દિલ્હી જવા રવાના થયા એ બાબતને મહત્ત્વની માનવામાં આવી રહી છે. 

બેઠકો માટેનો ઝઘડો ચાલુ છે

ગિરીશ મહાજને રવિવારે જણાવ્યું હતું કે તેઓ દિલ્હી જઈ રહ્યા છે, પરંતુ  તેમણે એવું પણ નિવેદન આપ્યું હતું કે હું ટિકિટ માટે નથી જતો. વિધાન પરિષદ માટે અરજીઓ દાખલ કરવાની પ્રક્રિયા સોમવારથી શરૂ થશે અને દિવસો ઓછા હોવાથી, બેઠકો માટેના વિવાદને ઉકેલવા માટે નેતાઓ દિલ્હીના દરબારમાં જવાની ચર્ચા છે. સૂત્રોએ એવી માહિતી આપી છે કે શિવસેના તરફથી એકનાથ શિંદે અને ભાજપ તરફથી ગિરીશ મહાજન દિલ્હીમાં વિધાન પરિષદની બેઠકો અંગે પોતાનો કેસ રજૂ કરશે.

શિવસેનાને જોઈએ સાત બેઠકો 

એવું જાણવા મળ્યું છે કે પ્રારંભિક વાતચીતમાં ચર્ચા કરાયેલ ફોર્મ્યુલામાં કુલ 17 બેઠકોમાંથી 12 ભાજપ, શિવસેના 3 અને એનસીપી 2 બેઠકોની ગોઠવણ કરવામાં આવી હતી. બીજી તરફ શિવસેના રાજ્યમાં સાત બેઠકો લડવા પર મક્કમ છે અને હવે એવી માહિતી આવી રહી છે કે ભાજપ ફક્ત ત્રણથી ચાર બેઠકો આપવાની તૈયાર છે. 

રાજકીય વર્તુળોમાં એવી ચર્ચા છે કે વિધાન પરિષદની બેઠકોનો વિવાદ હવે દિલ્હીના દરબારમાં ઉકેલાશે. નાશિક અને જળગાંવની વિધાન પરિષદની બેઠકો પર ભાજપ અને શિવસેના વચ્ચે ખેંચતાણ જોવા મળી રહી છે.

ભાજપની બંધ બારણે મળેલી બેઠક

વિધાનસભા પરિષદની ચૂંટણીનું રણશિંગુ વાગતાની સાથે જ જળગાંવમાં રાજકીય વાતાવરણ ગરમાવા લાગ્યું છે. શાસક મહાયુતિના ઘટક પક્ષો વચ્ચે જળગાંવ વિધાન પરિષદની બેઠક પર દાવો કરવા માટે ખેંચતાણ શરૂ થઈ ગઈ છે. આ પૃષ્ઠભૂમિમાં, જામનેરમાં ભાજપના સંકટમોચક અને ગ્રામીણ વિકાસ ખાતાના પ્રધાન ગિરીશ મહાજનના નિવાસસ્થાને ભાજપના ટોચના વિધાનસભ્યો અને સાંસદોની ખૂબ જ મહત્વપૂર્ણ બેઠક યોજાઈ હતી. આ બેઠક બંધ બારણે યોજાઈ હતી. બે કલાક સુધી ચાલેલી આ ગુપ્ત બેઠકથી જળગાંવના રાજકીય વર્તુળોમાં ગરમાગરમ ચર્ચાઓ શરૂ થઈ ગઈ છે.

સૂત્રો દ્વારા આપવામાં આવેલી માહિતી અનુસાર, આ બેઠકમાં મુખ્યત્વે જળગાંવના ભાજપના વિધાનસભ્ય સુરેશ ભોલે, વિધાનસભ્ય મંગેશ ચવ્હાણ અને સાંસદ સ્મિતા વાઘ હાજર રહ્યા હતા. બધા જ જનપ્રતિનિધિઓએ ગિરીશ મહાજન સમક્ષ એવી માંગણી કરી છે કે ભાજપે કોઈપણ સંજોગોમાં જળગાંવ વિધાન પરિષદની બેઠક પર ચૂંટણી લડવી જોઈએ. આ બેઠકમાં એવું જાણવા મળ્યું હતું કે જળગાંવમાં ભાજપની મોટી તાકાત છે અને પાર્ટી પાસે 10 થી વધુ રસ ધરાવતા ઉમેદવારો મેદાનમાં ઉતરવા માટે તૈયાર છે.

શિવસેનાના દાવાને કારણે ભાજપ સાવધ

શિવસેના શિંદે જૂથે પણ જળગાંવ વિધાન પરિષદની બેઠક પર પોતાનો મજબૂત દાવો રજૂ કર્યો છે. શિવસેનાના ગુલાબરાવ પાટીલે જાહેરમા એવી માંગ કરી છે કે આ બેઠક શિવસેનાને આપવામાં આવે અને પ્રતાપરાવ પાટીલને ઉમેદવારી આપવામાં આવે. માહિતી બહાર આવી રહી છે કે ભાજપે તાત્કાલિક આ આંતરિક બેઠક યોજી હતી અને ઘટક પક્ષે સીધો આ બેઠક પર દાવો કર્યો હોવાથી તેની રણનીતિ બનાવવાનું શરૂ કર્યું હતું.

આ બેઠક પછી મીડિયા સાથે વાત કરતા મંત્રી ગિરીશ મહાજને દાવો કર્યો હતો કે મહાયુતિમાં કોઈ વિવાદ નથી. જોકે, તેમણે સ્પષ્ટ સંકેત આપ્યો હતો કે ભાજપ જલગાંવ બેઠક પર આગ્રહી છે. અમે રાજ્યમાં મહાયુતિ તરીકે સાથે મળીને લડી રહ્યા છીએ. વરિષ્ઠ નેતાઓ બેઠક વિતરણ પર નજીકથી નજર રાખી રહ્યા છે અને ત્રણેય પક્ષોના ટોચના નેતાઓ સાથે બેસીને તેની ચર્ચા કરશે. કુલ 17 બેઠકોની વહેંચણીનો પ્રશ્ર્ન છે, કોણ ક્યાંથી ચૂંટણી લડશે તેના આધારે બેઠકોનું વિતરણ કરવામાં આવશે.