14 સબસ્ટેશન અને 28 સિસ્મોમીટર સાથે વિદ્યુતીકરણ પૂર્ણતાના આરે

મુંબઈ: મુંબઈ અમદાવાદ વચ્ચે બુલેટ ટ્રેનના પ્રકલ્પમાં અનેક અવરોધો વચ્ચે ઝડપથી પૂરો કરવા માટે રેલવે કમર કસી રહ્યું છે. આ પ્રકલ્પના ભાગરૂપે NHSRCL (નેશનલ હાઈ સ્પીડ રેલ કોર્પોરેશન લિમિટેડ) એક પછી એક મહત્વના કામને પાર પાડી રહ્યુ છે, એમ અધિકારીએ જણાવ્યું હતું.

NHSRCLના ૫૦૮ કિમી લાંબા મુંબઈ-અમદાવાદ બુલેટ ટ્રેન કોરિડોર પર ભારતના પ્રથમ હાઇ-સ્પીડ ૨×૨૫ kV ઓવરહેડ ટ્રેક્શન સિસ્ટમ સાથે વિદ્યુતીકરણનું કાર્ય વેગ પકડી રહ્યું છે. બુલેટ ટ્રેન કોરિડોરમાં ટ્રેન કલાકના 320 કિલોમીટરની ઝડપથી દોડાવાશે. આ નેટવર્ક ૩૨૦ કિમી પ્રતિ કલાકની ઝડપે ચાલતી ટ્રેનોને ૧૪ ટ્રેક્શન સબસ્ટેશન, ૩૧ સ્વિચિંગ પોસ્ટ અને ૧૬ ડિસ્ટ્રિબ્યુશન સબસ્ટેશન દ્વારા પાવર આપશે. 

૫૦૮ કિમી લાંબા મુંબઈ-અમદાવાદ બુલેટ ટ્રેન કોરિડોર પર વિદ્યુતીકરણ કાર્ય ઝડપથી પૂર્ણતાને આરે પહોંચી રહ્યું છે કારણ કે બાંધકામ અને ટ્રેક બિછાવવાની પ્રક્રિયા પણ ઝડપથી આગળ વધી રહી છે. નેશનલ હાઇ સ્પીડ રેલ કોર્પોરેશન લિમિટેડ (NHSRCL)ભારતની પ્રથમ હાઇ-સ્પીડ ૨×૨૫ kV ઓવરહેડ ટ્રેક્શન સિસ્ટમ સ્થાપિત કરી રહ્યું છે, જે ૩૨૦ કિમી પ્રતિ કલાકની ઝડપે દોડતી ટ્રેનોને અવિરત વીજ પુરવઠો પૂરો પાડશે. આ પ્રોજેક્ટ સ્વદેશી ઉત્પાદનમાં પણ એક મોટું પગલું છે, જેમાં ઘણા મુખ્ય વિદ્યુત ઘટકો હવે ભારતમાં નિર્માણ કરાઈ રહ્યા છે.

14 ટ્રેક્શન સબસ્ટેશનમાંથી વીજળી પૂરી પાડવામાં આવશે 
વીજ પુરવઠા નેટવર્કના ભાગરૂપે રાષ્ટ્રીય ગ્રીડમાંથી ખાસ ડિઝાઇન કરેલા ગ્રીડ સબસ્ટેશન અને પછી સમગ્ર મહારાષ્ટ્ર અને ગુજરાતમાં ૧૪ ટ્રેક્શન સબસ્ટેશનમાંથી વીજળી પૂરી પાડવામાં આવશે. આમાંથી પાંચ સબસ્ટેશન મહારાષ્ટ્ર, મુંબઈ, થાણે, વિરાર, બોઇસર અને થાણે ડેપોમાં સ્થિત છે જ્યારે નવ સબસ્ટેશન ગુજરાતમાં છે. કોરિડોરમાં સતત વીજળી જાળવવા અને ખામીઓને ઝડપથી દૂર કરવા માટે ૩૧ સ્વિચિંગ પોસ્ટ પણ હશે, સાથે સ્ટેશનો, સિગ્નલિંગ સિસ્ટમ્સ અને જાળવણી સુવિધાઓને વીજળી પૂરી પાડવા માટે ૧૬ ડિસ્ટ્રિબ્યુશન સબસ્ટેશન પણ હશે.

ઝડપી વીજ પુરવઠો પહોંચાડશે
ઓવરહેડ ઇલેક્ટ્રિફિકેશન સિસ્ટમને ડેપો સહિત ૧,૧૨૫ ટ્રેક કિમીમાં લગભગ ૨૨,૦૦૦ સ્ટીલ માસ્ટ અને ૨૫,૭૦૦થી વધુ કેન્ટીલીવર એસેમ્બલી દ્વારા સપોર્ટ આપવામાં આવશે. NHSRCL એ જણાવ્યું હતું કે ભારતમાં પહેલીવાર રજૂ કરવામાં આવી રહેલી અદ્યતન કમ્પાઉન્ડ કેટેનરી સિસ્ટમ ખૂબ જ વધુ ઝડપે મુસાફરી કરતી ટ્રેનો દ્વારા સરળ અને સતત વીજ આપૂર્તિ સુનિશ્ચિત કરશે. આ પ્રોજેક્ટથી સરકારની મેક ઈન ઈન્ડિયા પહેલને પણ પ્રોત્સાહન મળ્યું છે, જેમાં મુખ્ય ટ્રાન્સફોર્મર્સ, ક્રોસ આર્મ્સ, ફીડર વાયર અને અનેક ટ્રેક્શન અને ઇલેક્ટ્રો-મિકેનિકલ ઘટકોનું નિર્માણ  સ્થાનિક સ્તરે મોટા પાયે થઈ રહ્યું છે.
 
28 સિસ્મોમીટરથી સજ્જ કરાશે
આ પ્રકલ્પની ખાસ વાત એ છે કે  બધા 14 ટ્રેક્શન સબસ્ટેશન ભૂકંપ શોધક સિસ્મોમીટરથી સજ્જ હશે, જે ભૂકંપની ઘટના બને તો તાત્કાલિક રક્ષણાત્મક કાર્યવાહી શરૂ કરવા સક્ષમ હશે. કુલ મળીને મહારાષ્ટ્ર અને ગુજરાતમાં 28 સિસ્મોમીટર સ્થાપિત કરવામાં આવશે, જ્યારે સુરક્ષા અને વિશ્વસનીય કામગીરી સુનિશ્ચિત કરવા માટે સમગ્ર વિદ્યુત નેટવર્કનું વાસ્તવિક સમયમાં કેન્દ્રિય નિયંત્રણ કેન્દ્ર દ્વારા નિરીક્ષણ કરવામાં આવશે.