ગાંધીનગરઃ બનાસકાંઠા જિલ્લાના ડીસા ખાતે બની રહેલા એશિયાના પ્રથમ ડેઝર્ટ-થીમ આધારિત ડ્રાઇવ-થ્રુ નાઇટ સફારી અને વિશ્વસ્તરીય ઝૂઓલોજિકલ પાર્કને સેન્ટ્રલ ઝૂ ઓથોરિટી (CZA) તરફથી ઔપચારિક મંજૂરી આપવામાં આવી હતી. 103 હેક્ટરમાં રૂ. 542.14 કરોડના ખર્ચે ડેઝર્ટ ઝૂઓલોજિકલ પાર્ક અને નાઈટ સફારીને મંજૂરી મળતા ઉત્તર ગુજરાતમાં પણ પ્રવાસનને વેગ મળશે. ઉપરાંત સ્થાનિક સ્તરે રોજગારીની નવી તકો પણ ઉભી થશે.
83 પ્રજાતિના પ્રાણી-પક્ષી જોવા મળશે
વન અને પર્યાવરણ પ્રધાન અર્જુન મોઢવાડિયાએ જણાવ્યું હતું કે, આ પ્રોજેક્ટ CZA ની માર્ગદર્શિકા અનુસાર આયોજિત કરવામાં આવ્યો છે અને હવે ઓથોરિટી તરફથી ઔપચારિક મંજૂરી મેળવી લીધી છે. આધુનિક સંરક્ષણ સુવિધા તરીકે રચાયેલ આ પાર્કમાં 83 પ્રજાતિઓના આશરે 2,700 સ્થાનિક અને વિદેશી પ્રાણીઓ અને પક્ષીઓ વસવાટ કરશે.
શું હશે મુખ્ય આકર્ષણ
ડીસા મતવિસ્તારનું પ્રતિનિધિત્વ કરતા વન રાજ્ય પ્રધાન પ્રવીણ માળીએ જણાવ્યું હતું કે, મુલાકાતીઓને અનોખો વન્યજીવ અનુભવ આપવા ઉપરાંત, આ સુવિધા સંરક્ષણ પ્રજનન (કન્ઝર્વેશન બ્રીડિંગ), રેસ્ક્યુ અને પુનર્વસન, પર્યાવરણીય શિક્ષણ અને વૈજ્ઞાનિક વ્યાખ્યા માટેના કેન્દ્ર તરીકે કાર્ય કરશે. માળીએ વધુમાં ઉમેર્યું કે, મુખ્ય આકર્ષણ આંતરરાષ્ટ્રીય ધોરણની નાઇટ સફારી હશે, જે મુલાકાતીઓને સૂર્યાસ્ત પછી ખાસ ડિઝાઇન કરાયેલા એન્ક્લોઝરમાં નિશાચર વન્યજીવોને જોવાની તક આપશે. આ સંકુલમાં ડે ઝૂની સાથે પાંચ સમર્પિત નાઇટ સફારી ઝોન હશે.
ગુજરાતના પ્રવાસન ક્ષેત્રે શરૂ થશે એક નવો સ્વર્ણિમ અધ્યાય!
— CMO Gujarat (@CMOGuj) August 12, 2026
બનાસકાંઠાના ડીસા ખાતે આકાર પામવા જઈ રહ્યો છે એશિયાનો પ્રથમ ડેઝર્ટ-થીમ્ડ ડ્રાઇવ-થ્રુ નાઇટ સફારી પાર્ક અને ઝૂઓલોજિકલ પાર્ક.
માનનીય વડાપ્રધાન શ્રી નરેન્દ્રભાઈ મોદીના દિશાદર્શન અને મુખ્યમંત્રી શ્રી ભૂપેન્દ્રભાઈ પટેલના… pic.twitter.com/A7zOKAAgzJ
કેમ આ વિસ્તારની પસંદગી કરવામાં આવી
આ પાર્ક બનાસ નદી નજીક કુદરતી રેતીના ઢુવા નજીક આકાર લેશે. આ માટે 103 હેક્ટર જમીનની ફાળવણી કરવામાં આવી છે. આ વિસ્તાર રોડ તથા રેલ કનેક્ટિવિટી ધરાવતો હોવાથી તેની પસંદગી કરવામાં આવી છે.
કયા પ્રાણીઓ જોઈ શકાશે
સૂત્રોએ જણાવ્યું હતું કે, ઝૂમાં ચિંકારા, કાળિયાર, ઘુડખર (ભારતીય જંગલી ગધેડો), એશિયાટીક સિંહ અને દીપડા સહિતના સ્થાનિક વન્યજીવો મુખ્ય આકર્ષણ હશે. આ યોજનામાં શાકાહારી અને માંસાહારી પ્રાણીઓ માટે અલગ એન્ક્લોઝર, એવિયરી, રેપ્ટાઇલ હાઉસ, બટરફ્લાય પાર્ક, ઇન્ટરપ્રિટેશન સેન્ટર, ફૂડ કોર્ટ અને ગોલ્ફ કાર્ટ ટ્રાન્ઝિટનો સમાવેશ થાય છે.
પર્યાવરણીય અસરને ન્યૂનતમ કરવા માટે, પ્રોજેક્ટમાં ગ્રીન ટેક્નોલોજીનો સમાવેશ થાય છે, જેમાં રેનવોટર હાર્વેસ્ટિંગ, સિવેજ ટ્રીટમેન્ટ, સોલિડ વેસ્ટ મેનેજમેન્ટ, સોલાર પાવર જનરેશન અને સ્થાનિક ગ્રીન બફર ઝોન સામેલ છે. આ પાર્ક વડનગર, અંબાજી અને નડાબેટ જેવા સ્થળોની સાથે ઉત્તર ગુજરાતના પ્રાદેશિક પ્રવાસન સર્કિટને મજબૂત બનાવશે.
વૈશ્વિક રણ પ્રજાતિઓનો સમાવેશ કરવામાં આવશે
પ્રાણીસંગ્રહાલયના સ્થાનિક રણ વિભાગમાં હેણોતરો, ભારતીય વરુ, ડેઝર્ટ ફોક્સ, પટ્ટાવાળી ઝરખ, શિયાળ, સ્લોથ રીંછ, શેળો અને રણના સસલા જેવી પ્રજાતિઓ ઉપરાંત રેપ્ટાઇલ સફારી, રેનફોરેસ્ટ બાયોમ અને એક્વેરિયમ હશે.
આફ્રિકન ડેઝર્ટ ઝોનમાં આફ્રિકન ચિત્તો, આફ્રિકન સિંહ, બ્લેક રાઇનોસેરોસ (કાળો ગેંડો), ચિમ્પાન્ઝી, અંગોલન જિરાફ, ગ્રેવીઝ ઝીબ્રા, સ્સિમિટર ઓરિક્સ, ફેનેક ફોક્સ અને શાહમૃગ જોવા મળશે. ઑસ્ટ્રેલિયન ડેઝર્ટ એક્ઝિબિટ્સમાં કાંગારૂ, વોલાબીઝ અને ઇમુનો સમાવેશ થશે.
