(અમારા પ્રતિનિધિ તરફથી)
મુંબઈ: મુંબઈ મહાનગર પાલિકાના નાણાકીય વર્ષ ૨૦૨૬-૨૭ ના  બજેટમાં મુંબઈના પાણીના માળખાને વધુ સક્ષમ કરવા માટે ૬,૪૭૫ કરોડનું જંગી ભંડોળ ફાળવવામાં આવ્યુ  છે, જેમાં મનોરી ખાતે પ્રસ્તાવિત ડિસેલિનેશન પ્લાન્ટ અને ગાર્ગાઈ ડેમ પ્રોજેક્ટનો સમાવેશ થાય છે. શહેરના લાંબા ગાળાના પાણીના ભવિષ્યને સુરક્ષિત કરવા માટે આ મહત્વાકાંક્ષી પહેલ છે.

મુંબઈમાં ડિસેલિનેશન પ્લાન્ટનો પ્રસ્તાવ સૌપ્રથમ ૨૦૦૭ માં રજૂ કરવામાં આવ્યો હતો. ફેબ્રુઆરી ૨૦૨૧ માં પાલિકાએ વિગતવાર પ્રોજેક્ટ રિપોર્ટ તૈયાર કરવા માટે એક ઇઝરાયેલી કંપનીની નિમણૂક કરી, જેની ડિઝાઇન સમીક્ષા જાન્યુઆરી ૨૦૨૨માં પૂર્ણ થઈ હતી. 
 પાલિકા પ્રશાસન  હવે પશ્ચિમ ઉપનગરમાં મનોરી ખાતે પ્લાન્ટનું નિર્માણ કરશે જેની પ્રારંભિક ક્ષમતા ૨૦૦ મિલિયન લિટર પ્રતિ દિવસ (એમ એલ ડી) હશે, જે ૪૦૦ એમ એલ ડી  સુધી વધારી શકાય છે. આ પ્રોજેક્ટ ૪૮ મહિનાનો નિર્ધારિત પૂર્ણ કરવાની રહેશે.  ૨૦૨૬-૨૭ ના બજેટમાં ૫૦૦ કરોડ રૂપિયાની જોગવાઈ કરવામાં આવી છે.

નવા પુરવઠાને હાલના વિતરણ નેટવર્ક સાથે સાંકળવા માટે, મનોરીના પમ્પિંગ સ્ટેશનથી ચારકોપ અને આગળ મહાવીર નગર (કાંદિવલી) સુધી ૭.૦૫ કિમી લાંબી, ૨.૫ મીટર વ્યાસની પાણી પરિવહન ટનલનો પ્રસ્તાવ મૂકવામાં આવ્યો છે. આ મહત્વપૂર્ણ પરિવહન માળખા માટે ૨૦૨૬-૨૭ ના બજેટમાં વધારાના રૂ. ૨૭૦ કરોડની જોગવાઈ કરવામાં આવી છે.

ગાર્ગાઈ પ્રોજેક્ટ...

પાલઘર જિલ્લામાં ગાર્ગાઈ નદી પર ગાર્ગાઈ ડેમ પ્રોજેક્ટ માટે પાલિકાએ   ટેન્ડર બહાર પાડ્યું છે, જે ૨૦૧૪ માં મિડલ વૈતરણા ડેમ પૂર્ણ થયા પછી લગભગ એક દાયકાથી ચર્ચા હેઠળ છે. મુંબઈના આઠમા જળ સ્ત્રોત તરીકે કલ્પના કરાયેલ,  ગાર્ગાઈ ડેમ શહેરના પુરવઠામાં રૂ. ૩,૦૪૦ કરોડના અંદાજિત ખર્ચે ૪૪૦ એમએલડીનો વધારો કરશે તેવી અપેક્ષા છે. જાન્યુઆરી ૨૦૨૬માં ટેન્ડર મંગાવવામાં આવ્યું હતું, જેમાં માર્ચ ૨૦૨૬ સુધીમાં જમીન પર કામ શરૂ થવાનું હતું. નાણાકીય વર્ષ ૨૦૨૬-૨૭ માટે રૂ. ૪૩૭.૫૧ કરોડની બજેટ જોગવાઈ રાખવામાં આવી છે. વધુમાં, પાલિકાએ રેએ પાલઘર જિલ્લામાં પ્રસ્તાવિત પિંજલ ડેમ પ્રોજેક્ટ માટે રૂ. ૧ લાખની ટોકન ફાળવણી કરી છે. એકવાર અમલમાં મુકાયા પછી, પિંજલ ડેમ મુંબઈના દૈનિક પાણી પુરવઠામાં ૮૬૫ એમએલડીનો વધારો કરવાનો અંદાજ છે.

પાણીની ટનલ...
મુંબઈ-નાશિક હાઇવેના વિસ્તરણને સરળ બનાવવા અને લાંબા ગાળાની પાણી સુરક્ષાને મજબૂત બનાવવા માટે, પાલિકાએ યેવાઈ માસ્ટર બેલેન્સિંગ જળાશયથી કાશેળી સુધી પાણી પુરવઠા ટનલ બનાવવાનો પ્રસ્તાવ મૂક્યો છે. તરલી ખાતે શાફ્ટ ખોદકામ હાલમાં ચાલી રહ્યું છે અને માર્ચ ૨૦૨૬ સુધીમાં પૂર્ણ થવાની ધારણા છે, જેમાં મુખ્ય ટનલ બનાવવાનું કામ ઓક્ટોબર ૨૦૨૬ સુધીમાં શરૂ થવાની ધારણા છે. નાણાકીય વર્ષ ૨૦૨૬-૨૭માં આ પ્રોજેક્ટ માટે રૂ. ૭૯૦ કરોડની બજેટ જોગવાઈ રાખવામાં આવી છે. આ ઉપરાંત, પાલિકાએ  થાણે શહેરના કાશેલીથી મુલુંડ ઓક્ટ્રોય નાકા સુધી ૭.૧૩  કિમી લાંબી, ૪.૫મીટર વ્યાસની પાણી પરિવહન ટનલનો પ્રસ્તાવ મૂક્યો છે. મુલુંડ અને કાશેળી ખાતે શાફ્ટનું ખોદકામ ચાલુ છે. બંને શાફ્ટ વચ્ચે ટનલ બનાવવાનું કામ જૂન 2026 સુધીમાં શરૂ થવાનું છે અને ઓક્ટોબર 2030 સુધીમાં પૂર્ણ કરવાનું લક્ષ્ય છે. આ ઇન્ફ્રાસ્ટ્રક્ચર પ્રોજેક્ટ માટે ૨૦૨૬-૨૭ના બજેટમાં રૂ. ૬૪૦ કરોડની જોગવાઈ ફાળવવામાં આવી છે.