સુરેન્દ્રનગરની જીવાદોરી સમાન વઢવાણ ભોગાવો-૨ (ધોળીધજા) ડેમ ઓવરફ્લો થયો છે.  વધતા જળસ્તરને પગલે તંત્ર દ્વારા સુરેન્દ્રનગર સીટી, વઢવાણ સીટી, જોરાવરનગર અને રતનપર સહિત આસપાસના નીચાણવાળા ગ્રામ્ય વિસ્તારો જેવા કે મેમકા, ભડિયાદ, સાંકળી, ખમીસણા, નાના કેરાળા, નટવરગઢ, દોલાતપર, શિયાણી, રામરાજપર, પરનાળા અને જાંબુ ગામના તમામ નાગરિકોને એલર્ટ રહેવા જણાવાયું છે.

સ્ટેટ ઈમરજન્સી ઓપરેશન સેન્ટર, ગાંધીનગર મુજબ બપોરે 12 થી 2 કલાકના સમયગાળામાં રાજ્યમાં 141 તાલુકામાં વરસાદ વરસ્યો હતો. મોરબીના હળવદમાં બે કલાકમાં સૌથી વધુ 2.36 ઇંચ વરસાદ પડ્યો હતો. સાબરકાંઠાના ઈડરમાં 1.57 ઇંચ,  મોરબીના માળીયામાં 1.50 ઇંચ, ખેડાના કપડવંજમાં 1.10 ઇંચ, ખેડાના કઠલાલમાં 1.02 ઇંચ વરસાદ પડ્યો હતો. 136 તાલુકામાં એક ઇંચથી ઓછો વરસાદ ખાબક્યો હતો.

સિંચાઈ વિભાગ દ્વારા જાહેર કરાયેલી માહિતી મુજબ, જામનગર જિલ્લામાં ઉમિયાસાગર ડેમ 54.69% જ્યારે રણજીતસાગર ડેમ 36.13% ભરાયો છે. જિલ્લાના 25 મુખ્ય જળાશયોમાં કુલ 1,510.32 Mcft પાણીનો સંગ્રહ કરવામાં આવ્યો છે, જે કુલ સંગ્રહ ક્ષમતાના 11.51 ટકા જેટલો છે.

વડોદરા જિલ્લામાં ભારે વરસાદના પગલે ડભોઇ તાલુકાના રાજલી અને બહેરામપુરામાં ઢાઢર નદીના પાણી વધતાં 79 ગ્રામજનોને સુરક્ષિત રીતે સ્થાનિક શાળામાં ખસેડવામાં આવ્યા છે.

રાજયમાં છેલ્લા 24 કલાકમાં 255 તાલુકામાં વરસાદ વરસ્યો છે. એક તાલુકામાં 24 ઇંચથી વધારે, ત્રણ તાલુકામાં 16 ઇંચથી વધારે, ત્રણ તાલુકામાં 13 ઇંચથી વધારે, છ તાલુકામાં 10 ઇંચથી વધારે વરસાદ ખાબક્યો હતો. સુરતના અંબિકામાં સૌથી વધુ 24.06 ઇંચ વરસાદ ખાબક્યો છે.

અમદાવાદઃ હવામાન વિભાગે આજે રાજ્યમાં ભારેથી અતિભારે વરસાદની આગાહી કરી છે. આજે અમદાવાદ, રાજકોટ, બોટાદ, આણંદ, સુરેન્દ્રનગર અને ભાવનગર જિલ્લામાં ભારેથી અતિભારે વરસાદની આગાહીને લઈ રેડ એલર્ટ જાહેર કરવામાં આવ્યું છે. આ સાથે પાટણ, ગાંધીનગર અને અમરેલી સહિત રાજ્યના 11 જિલ્લામાં ઓરેન્જ એલર્ટ જાહેર કરવામાં આવ્યું છે.