પ્રતિમા અરોરા

આજકાલ યુવાનોમાં એક જ હાથમાં વિવિધ પ્રકારના બ્રેસલેટ પહેરવાનો ફેશન ક્રેઝ બની ગયો છે. આ માત્ર એક ટ્રેન્ડ નથી, પરંતુ પોતાની જાતને વ્યક્ત કરવાની એક નવી રીત પણ છે. એક જ હાથમાં બે થી છ કે તેથી વધુ બ્રેસલેટ પહેરવા, જે અલગ-અલગ શૈલી, મટિરિયલ અથવા રંગોના હોઈ શકે છે. 

મોટી ઉંમરના લોકોને આ જોવામાં કદાચ એક પ્રકારનું ગાંડપણ લાગે, પરંતુ યુવાનો માટે આ એક નવી ‘વાઇબ’ છે, જે આજકાલ ફેશન જગતમાં પોતાની આગવી રીતે લોકોનું ધ્યાન ખેંચી રહી છે.

આ ટ્રેન્ડ આટલો લોકપ્રિય કેમ છે?

આની પાછળનું સૌથી મોટું કારણ યુવાનોનો પોતાની પર્સનલ આઈડેન્ટિટી પ્રત્યેનો ક્રેઝ અથવા પોતાને અલગ દેખાડવાની રીત છે. કોઈ બિડ્સ તો કોઈ મેટલની ચેઈન પહેરે છે, કોઈ આધ્યાત્મિક દોરો બાંધે છે, તો કોઈ લક્ઝરી બ્રેસલેટ પહેરે છે. અને આમાંનું દરેક કોમ્બિનેશન પોતાની રીતે યુનિક હોય છે. 

જો આ ટ્રેન્ડ પર ધ્યાન આપીએ તો, તે એટલા માટે પણ સારી રીતે ચાલી રહ્યો છે કારણ કે તે અફોર્ડેબલ પણ છે અને સ્ટાઈલિશ પણ છે. કહેવાનો અર્થ એ છે કે યુવાનોમાં ભલે આજે અનેક પ્રકારના બ્રેસલેટ પહેરવાનો ક્રેઝ વધ્યો હોય, પરંતુ તે મોંઘી જ્વેલરીનો હિસ્સો નથી. સામાન્ય રીતે આ બ્રેસલેટ 100 થી 500 રૂપિયાની વચ્ચે હોય છે. હા, પણ તેનો લૂક ચોક્કસપણે ખૂબ જ ટ્રેન્ડી હોય છે. 

સૌથી મોટી વાત એ છે કે, આ દરેક પ્રકારના ડ્રેસ અથવા એમ કહીએ કે તમામ પ્રકારની ફેશનમાં હિટ અને ફિટ છે. પછી ભલે તે કુર્તા-પાયજામા હોય, ટી-શર્ટ અને ડેનિમ જીન્સ હોય કે પછી ફિટ લેધર જેકેટ કેમ ન હોય; દરેક આઉટફિટ સાથે આ બ્રેસલેટ મેચ થઈ જાય છે. એક નોંધવા જેવી વાત એ પણ છે કે, આજકાલ સાશ્યલ મીડિયામાં પણ એકસાથે અનેક બ્રેસલેટ પહેરવાનો ક્રેઝ છે. ઇન્સ્ટાગ્રામ રીલ્સ અને ઇન્ફ્લુએન્સર્સે આ ટ્રેન્ડને ખૂબ જ ઝડપથી લોકપ્રિય બનાવ્યો છે.

કયા બ્રેસલેટ ટ્રેન્ડમાં છે

આજકાલ યુવાનોમાં જે બ્રેસલેટ સૌથી વધુ ટ્રેન્ડમાં છે, તેમાં પહેલા નંબરે ‘બીડેડ બ્રેસલેટ’ છે, એટલે કે રુદ્રાક્ષ, સ્ટોન બીડ્સ અને કલરફુલ બીડ્સ; ખાસ કરીને છોકરાઓમાં આનું પ્રમાણ વધુ છે. છોકરાઓમાં જ અન્ય એક બ્રેસલેટ પણ ખૂબ લોકપ્રિય છે, તે છે ‘લેધર બ્રેસલેટ’. ત્રીજા નંબરે જે બ્રેસલેટ અત્યારે સૌથી વધુ લોકપ્રિય છે, તે મેટલ ચેઈન અથવા સિલ્વર ચેઈન અને ગોલ્ડ ફિનિશ ધરાવતા બ્રેસલેટ છે. સાથે જ દોરાવાળા બ્રેસલેટ, જેમ કે પરંપરાગત કલાવો-એટલે કે વિશિષ્ટ ધાર્મિક પ્રસંગોએ હાથમાં બાંધવામાં આવતો કેસરી કે ભગવો દોરો, આજકાલ યુવાનોમાં બ્રેસલેટ તરીકે ખૂબ લોકપ્રિય થઈ રહ્યો છે. 

આમાં એક તરફ જ્યાં પરંપરાગત લૂક મળે છે, તો બીજી તરફ કેઝ્યુઅલ લૂક પણ ઊભરીને સામે આવે છે. નાનાં-નાનાં ચિહ્નો અથવા પેન્ડન્ટ્સ સાથેના ‘ચાર્મ બ્રેસલેટ’ પણ આજકાલ માર્કેટમાં આવી રહ્યા છે, જેના કારણે તે યુવાનોમાં ખૂબ જ હિટ છે.

આખરે, તેને કેવી રીતે સ્ટાઇલ કરવા?

બ્રેસલેટનું સ્ટાઇલિંગ કરવું ખૂબ જ જરૂરી છે, તો જ આ એક્સેસરીઝ સસ્તી હોવા છતાં ખાસ બની જાય છે. સ્ટાઇલિંગ કરવાની સૌથી સરળ રીત એ છે કે બે કે ત્રણ સિમ્પલ બ્રેસલેટ અને તેની વચ્ચે એક ભભકદાર એટલે કે ‘બોલ્ડ’ બ્રેસલેટને મિક્સ કરીને પહેરવા. 

આ બ્રેસલેટનો કલર કોન્ટ્રાસ્ટ હોય અથવા તો બધા જ રંગો એકબીજાને કોમ્પ્લીમેન્ટ કરતા હોય, બંને સ્થિતિમાં આ કોમ્બિનેશન આકર્ષક લાગે છે. જો ઘડિયાળ સાથે બ્રેસલેટ પહેરવા હોય, તો મેચિંગ અને બેલેન્સિંગ બ્રેસલેટ જ પહેરવા જોઈએ. એવી રીતે ન પહેરો કે બંને વસ્તુઓ એકબીજાને ‘ઓવરક્રાઉડ’ કરે. 

કહેવાનો અર્થ એ છે કે, ઘડિયાળ સાથે એવું બ્રેસલેટ ન પહેરો જે વારંવાર ઘડિયાળને છુપાવી દે, અથવા ઘડિયાળ એટલી હેવી ન હોવી જોઈએ કે બ્રેસલેટ પર કોઈનું ધ્યાન જ ન જાય. અને હા, જેમ આજકાલ અલગ-અલગ પ્રસંગો મુજબ અલગ-અલગ ફેશન અને ડિઝાઇનના આઉટફિટ ચલણમાં છે, તેવી જ રીતે જો અલગ-અલગ પ્રસંગો પર અલગ-અલગ બ્રેસલેટ પહેરવામાં આવે, તો તે ‘સોનામાં સુગંધ ભળે’ તેવી સ્થિતિ હશે.

આ ભૂલોથી બચો

જ્યાં ઓછા ખર્ચમાં સ્ટાઇલિશ અને નવા કોમ્બિનેશન સાથે બ્રેસલેટ યુવાનોની ખાસ એક્સેસરીઝ બનીને ઊભરી રહ્યા છે, ત્યાં જો થોડું ધ્યાન રાખવામાં ન આવે અને તેનું કોમ્બિનેશન બગડી જાય, તો તે માત્ર સામાન્ય જ નહીં પણ કંટાળાજનક પણ લાગે છે. કહેવાનો અર્થ એ છે કે, જ્યારે પણ બ્રેસલેટ પહેરો ત્યારે આ બાબતોનું ખાસ ધ્યાન રાખવું જોઈએ.

*વધારે પડતા અને ભારે બ્રેસલેટ પસંદ ન કરો.
*દરેક બ્રેસલેટનો એક અલગ જ અંદાજ હોય છે, તેથી આ કોમ્બિનેશન પરફેક્ટ છે અને પહેરવામાં સારું લાગે છે.
*ખૂબ જ ચમકતા બ્રેસલેટ પહેરવાનું ટાળો.
*બ્રેસલેટ ત્યારે જ સારા લાગે છે જ્યારે તેની ડિઝાઇન તેમજ રંગનું મિશ્રણ સારું હોય.
*એક વાત ક્યારેય ભૂલશો નહીં કે બ્રેસલેટ પહેરતી વખતે તે ખૂબ ઢીલું કે ખૂબ ટાઈટ ન હોવું જોઈએ.

આજનો યુવાન માત્ર કપડાં જ નથી પહેરતો, પરંતુ પોતાના હાથો દ્વારા પોતાની એક ઓળખ પણ ડિઝાઈન કરી રહ્યો હોય છે. તેથી જ ‘બ્રેસલેટ સ્ટેકિંગ’ ખાસ બની જાય છે, કારણ કે તે એક તરફ જ્યાં સસ્તું અને સ્ટાઇલિશ છે, ત્યાં બીજી તરફ દરેક હાથના બ્રેસલેટ તે હાથના માલિકની પોતાની પર્સનાલિટીની કહાની કહે છે.