કેનેડા: 18 વર્ષીય અનાહત સિંહે વર્લ્ડ સ્કવૉશ જુનિયર ચૅમ્પિયનશિપ 2026ના ગર્લ્સ સિંગલ્સ કેટેગરીનો ખિતાબ જીતીને નવો ઇતિહાસ રચ્યો છે. તેણે ફાઇનલ મુકાબલામાં ઇજિપ્તની રુકૈયા સલેમને સતત ત્રણ ગેમમાં 11-3, 11-7 અને 11-9થી હરાવીને પહેલી વાર ભારતને આ પ્રતિષ્ઠિત ટૂર્નામેન્ટનું જુનિયર વિશ્વ ટાઇટલ અપાવ્યું છે. આની સાથે જ અનાહત જુનિયર વર્લ્ડ ચૅમ્પિયન બનનાર ભારતની પહેલી સ્કવૉશ ખેલાડી બની ગઈ છે.

ફાઇનલમાં આક્રમક રમત બતાવી

ફાઇનલ મુકાબલામાં અનાહતે શરૂઆતથી જ આક્રમક રમત બતાવી. પહેલી ગેમમાં તેમણે પોતાના પ્રતિસ્પર્ધીને કોઈ તક ન આપી અને સરળતાથી લીડ (બઢત) બનાવી લીધી. બીજી ગેમમાં સલેમે વાપસીનો પ્રયાસ કર્યો, પરંતુ ભારતીય ખેલાડીએ દબાણમાં પણ સંયમ જાળવી રાખ્યો. ત્રીજા રાઉન્ડમાં મુકાબલો થોડો કઠિન રહ્યો, જોકે અનાહતે શાનદાર રમતનું પ્રદર્શન કરતા જીત મેળવી.

6 માંથી માત્ર 2 મેચમાં મળી હાર

અનાહતનો આ ખિતાબ એટલા માટે પણ ખાસ છે કારણ કે તેમણે સમગ્ર ટૂર્નામેન્ટમાં અત્યંત પ્રભાવશાળી પ્રદર્શન કર્યું. 6 મુકાબલા દરમિયાન તેણે માત્ર 2 ગેમ ગુમાવી. શરૂઆતના તબક્કામાં તેમણે ઓસ્ટ્રેલિયાની લિલી વિલ્સન, હૉન્ગ કૉન્ગની ક્લો લો અને મલેશિયાની ડૉયસ યે સાન લીને હરાવીને ક્વાર્ટર ફાઇનલમાં જગ્યા બનાવી. ત્યાર પછી ક્વાર્ટર ફાઇનલમાં ઇજિપ્તની હબીબા રિઝ્ક અને સેમિફાઇનલમાં બાર્બ સમેહને 3-1થી હરાવીને ફાઇનલમાં પહોંચી.

21 વર્ષ જૂનો રેકૉર્ડ તૂટ્યો

આ જીત સાથે અનાહતે ભારતના 21 વર્ષ જૂના રેકૉર્ડને પણ પાછળ રાખી દીધો. અગાઉ 2005માં જોશના ચિનપ્પા જુનિયર વર્લ્ડ ચૅમ્પિયનશિપની ફાઇનલ સુધી પહોંચી હતી, પરંતુ ખિતાબ જીતી શકી નહોતી. હવે અનાહતે ગોલ્ડ મેડલ જીતીને ભારતીય સ્કવૉશ ઇતિહાસમાં નવી સિદ્ધિ પ્રાપ્ત કરી છે.

અનાહતની આ જીત વધુ એક કારણસર યાદગાર બની ગઈ. ગર્લ્સ જુનિયર વર્લ્ડ ચૅમ્પિયનશિપમાં 2011થી સતત ઇજિપ્તના ખેલાડીઓનું વર્ચસ્વ રહ્યું હતું, પરંતુ ભારતીય ખેલાડીએ આ લાંબા વર્ચસ્વને ખતમ કરીને નવો ઇતિહાસ બનાવ્યો. ગત વર્ષે તેણે આ જ સ્પર્ધામાં કાંસ્ય પદક જીતીને 15 વર્ષ પછી ભારતને વ્યક્તિગત પદક અપાવ્યો હતો અને આ વખતે તેણે સિદ્ધિને વર્લ્ડ ટાઇટલમાં બદલી દીધી.

ઓલિમ્પિક 2028 આગામી લક્ષ્ય

હાલમાં અનાહત સિનિયર પીએસએ ટૂરની વિશ્વ રૅન્કિંગમાં ટૉપ-20 ખેલાડીઓમાં સામેલ છે. સ્કવૉશને લૉસ એંજિલિસ 2028 ઓલિમ્પિકમાં પહેલી વાર સામેલ કરવામાં આવશે અને આવી સ્થિતિમાં આ ઐતિહાસિક જીત તેના આત્મવિશ્વાસને નવી ઊંચાઈ આપી શકે છે. ભારતીય રમતપ્રેમીઓને હવે આશા હશે કે અનાહત જુનિયર લેવલની આ સફળતાને સિનિયર લેવલે અને ઓલિમ્પિક મંચ પર પણ દોહરાવીને દેશનું નામ વધુ રોશન કરશે.