લખનઉઃ સરકારી બાબુઓ ભ્રષ્ટાચારમાં હદ વટાવી રહ્યાં છે. 100 રૂપિયાથી લઈને 1 કરોડ રૂપિયા સુધી લાંચનાં કિસ્સાઓ છાશવારે પ્રકાશમાં આવતા રહે છે. આ દરમિયાન એક નવી ઘટના પ્રકાશમાં આવી છે. ઉત્તર પ્રદેશમાં નિવૃત્ત ARTOના ઘરેથી માત્ર એક બે કરોડ રૂપિયા નહીં પરંતુ 1.62 કરોડ રૂપિયા રોકડા, 13 કિલો સોનું, 9 કિલો ચાંદી અને હીરા ઘરેણા મળી આવ્યાં છે. આની બજાર કિંમત 20 કરોડ રૂપિયાની આસપાસ થાય છે. આ બધુ જ નિવૃ્ત્ત ARTOના ઘરેથી રેડ દરમિયાન મળી આવ્યું છે.
વિજિલન્સે 26 કલાક સુધી આ તપાસ ચાલુ રાખી
વધારે વિગતે વાત કરવામાં આવે તો, વિજિલન્સના દરોડો દરમિયાન નિવૃત્ત સહાયક સંભાગીય પરિવહન અધિકારી લલિત કુમારના લખનઉ ખાતે આવેલા ઘરમાંથી સોનું, ચાંદી, હીરા અને રોકડ મળી આવી છે. વિજિલન્સ વિભાગ દ્વારા 26 કલાક સુધી આ દરોડાની કાર્યવાહી કરવામાં આવી હતી. લલિત કુમારે આ રોકડ રકમ રેડ ફિલ્મના રાજા સાહેબની જેમ અલગ અલગ રૂમની દીવાલોમાં છુપાવીને રાખી હતી. જ્યારે વિજિલન્સે અમય પટનાયકની જેમ ખૂણે ખૂણેથી રોકડ શોધી કાઢી હતી. રોકડ સાથે સાથે મકાન, ફ્લેટ અને ખેતીની જમીનના દસ્તાવેજો પણ મળી આવ્યાં છે. આ સાથે કુલ વિજિલન્સ વિભાગ દ્વારા કુલ મળીને 35 કરોડ રૂપિયાની સંપત્તિ જપ્ત કરવામાં આવી છે.
કોણ છે નિવૃત્ત ARTO લલિત કુમાર?
લલિત કુમાર મૂળ તો રાયબરેલીના રહેવાસી છે. લલિત કુમાર સામે 2024માં કાનપુરમાં ફરજ પર હતા ત્યારે ભ્રષ્ટાચારની ફરિયાદ નોંધાઈ હતી. ત્યારે તેઓ આરટીઓ ઓફિસમાં સંભાગીય નિરીક્ષક તરીકે ફરજ બજાવતા હતાં. તે પછીથી તેમની પાસે કાર્યવાહી શરૂ કરી દેવામાં આવી હતી. આ તપાસ દરમિયાન આવક કરતા તેમનો ખર્ચ વધારે હતી, આ બાબતે લલિત કુમારે કોઈ સ્પષ્ટતા કરી નથી. સંતોષાકરક જવાબ ના મળતા હવે આવક કરતા વધુ સંપત્તિના કેસમાં તેમના સામે કાર્યવાહી શરૂ કરવામાં આવી છે.
ઉત્તર પ્રદેશમાં નિવૃત ARTOના ઘરેથી 13 કિલો સોનું, 9 કિલો ચાંદી અને 1.62 કરોડ રૂપિયા મળી આવ્યાં
— MG Vimal ✍️ - વિમલ પ્રજાપતિ (@mgvimal_12) July 9, 2026
નિવૃત ARTOનું નામ લલિત કુમાર છે #Lalitkumar #UP #VigilanceRaid pic.twitter.com/zfGb4tcZdr
ઘરેથી ફ્લેટ, મકાન અને જમીનના દસ્તાવેજ મળ્યાં
વિજિલેન્સની ટીમને લલિત કુમારના ઘરેથી અલીગંજ, વૃંદાવન યોજના, ઈસ્માઈલગંજ, મોહનલાલગંજ અને બાકલગંજ સહિતાના વિસ્તારોમાં પ્લોટ, ખેતીની જમીન અને મકાન હોવાના દસ્તાવેજો મળી આવ્યાં છે. આ સાથે નોઈડામાં બે ફ્લેટ અને રાયબરેલીમાં જમીન હોવાના પણ પુરાવા મળ્યાં છે. તેની કુલ બજાર કિંમત 13 કરોડ રૂપિયા થાય છે. આ સાથે સાથે લલિત કુમારે ટોયોટા ઇનોવા અને હ્યુન્ડાઇ i20 કાર, રિવોલ્વર, બેંક, પોસ્ટ ઓફિસ, મ્યુચ્યુઅલ ફંડ અને ફિક્સ્ડ ડિપોઝિટમાં એક કરોડ રૂપિયાથી વધુનું રોકાણ કર્યું હોવાનું પણ પ્રકાશમાં આવ્યું છે. આ સમગ્ર મામલે હવે આગળની તપાસ શરૂ કરી દેવામાં આવી છે.
