ઝુરિક (સ્વિટઝરલૅન્ડ): તાજેતરમાં અમેરિકા, કૅનેડા અને મેક્સિકોમાં 23મા રોમાંચક ફૂટબૉલ વર્લ્ડ કપનું સફળ આયોજન કરનાર ફેડરેશન ઇન્ટરનેશનલ દ ફૂટબૉલ અસોસિએશન (FIFA)એ વિશ્વ કપ પૂરો થયાના નવ જ દિવસની અંદર મોટો અને ચોંકાવનારો નિર્ણય લીધો છે અને આ નિર્ણય સંબંધમાં અમેરિકાના પ્રમુખ ડૉનલ્ડ ટ્રમ્પ સાથે પણ આડકતરી રીતે એક કનેક્શન છે.

ફિફાએ જાહેરાત કરી છે કે એ પોતાની નવી કંપની સ્થાપશે અને એનો 21 ટકા હિસ્સો પ્રાઇવેટ ઇન્વેસ્ટર્સને વેચી દેશે.

ફિફાની નવી કંપનીનું શું હશે નામ?

ફિફાની નવી કંપની ફિફા ફૉર્વર્ડ એન્ટરપ્રાઇઝીસ (FFE) તરીકે ઓળખાશે. આ નવી કંપની રાબેતામુજબ દર ચાર વર્ષે વર્લ્ડ કપનું તેમ જ ક્લબ વર્લ્ડ કપનું આયોજન કરશે અને કમર્શિયલ કામકાજો પણ સંભાળશે.

ફિફાને કેટલો ઇક્વિટી હિસ્સો વેચવો છે?

ફિફાના બૅનર હેઠળ વિશ્વભરના 211 દેશ એના મેમ્બર છે. હવે આ વખતથી 211 દેશમાંથી 48 દેશની ટીમ વર્લ્ડ કપમાં ભાગ લે છે. 2030ના વર્લ્ડ કપમાં ટીમોની સંખ્યા કદાચ 64 ઉપર પહોંચશે. ફિફાને નવી કંપનીનો 21 ટકા ઈક્વિટી હિસ્સો વેચવો છે. એ સિવાયનો 79 ટકાનો બહુમત હિસ્સો ફિફા પોતાની પાસે રાખશે અને નવી કંપની સ્થપાઈ ગયા પછી પણ ફિફા જ વૈશ્વિક સંચાલક સંસ્થા ગણાશે.

ફિફાને કેટલા રૂપિયા જોઈએ છે?

ફિફા પોતાના 211 મેમ્બર-રાષ્ટ્ર્રમાં ફૂટબૉલના વિકાસ કાર્યો સંબંધમાં જેટલા ડોલરનો ખર્ચ કરે છે એ હવે ફિફા ત્રણગણો કરી નાખવા માગે છે. એ હેતુસર તેમ જ અન્ય કેટલાક કારણો બદલ ફિફા 21 ટકા ઈક્વિટી હિસ્સો વેચવા માગે છે. ફિફા પ્રાઇવેટ ઇન્વેસ્ટરોને 21 ટકા હિસ્સો વેચીને અંદાજે 4.2 અબજ ડોલર (આશરે 402 અબજ રૂપિયા) ઊભા કરવા માગે છે.

ફિફા નવા રોકાણ મારફત કરોડો રૂપિયા મળતા જ મેમ્બર રાષ્ટ્રોમાં વિકાસાર્થે વેચી દેવા માગે છે. નવા પ્રોજેક્ટમાં ફિફાની મુખ્ય સલાહકાર કંપની જેપી મોર્ગન છે. આ નવી યોજના તૈયાર કરવામાં સૌથી મોટી ભૂમિકા સ્વાભાવિક રીતે ફિફાના પ્રમુખ જિયાની ઇન્ફેન્ટિનોની છે. ફિફાની નવી યોજના માટેના સંભવિત ઇન્વેસ્ટર ગ્રૂપની આગેવાની અમેરિકાના પ્રમુખ ડૉનલ્ડ ટ્રમ્પના જમાઈ જેરીડ કુશનરના ભાઈ જોશુઆ કુશનરની છે.