માર્ચની શરૂઆત થતાની સાથે જ સૂર્યદેવે પોતાનો અસલ મિજાજ બતાવવાનું શરૂ કરી દીધું છે. વધતા જતા તાપમાન અને આકરા તડકાની સૌથી સીધી અસર આપણી ત્વચા પર પડતી હોય છે. ગરમ પવનો અને સૂર્યના કિરણોને કારણે સ્કીન ટેન થવી, શુષ્ક બનવી અને નિસ્તેજ થઈ જવી જેવી સમસ્યાઓ સામાન્ય છે. આવી સ્થિતિમાં, ઉનાળાની આ ઋતુમાં ત્વચાની યોગ્ય કાળજી લેવી માત્ર ફેશન નથી, પરંતુ સ્વાસ્થ્ય માટે પણ અનિવાર્ય બની ગઈ છે.

ઉનાળામાં જ્યારે પણ બહાર નીકળવાનું હોય, ત્યારે તેના 15-20 મિનિટ પહેલા ચહેરા પર સનસ્ક્રીન લગાવવું ખૂબ જ જરૂરી છે. ભલે તમે ઘરની અંદર હોવ, તો પણ SPF 50 કે તેથી વધુ ક્ષમતા ધરાવતું સનસ્ક્રીન લગાવવાનું ભૂલશો નહીં. ખાસ કરીને બપોરે 11 થી 4 વાગ્યા સુધી જ્યારે તાપમાન ચરમસીમા પર હોય, ત્યારે બહાર જવાનું ટાળવું જોઈએ. જો નીકળવું જ પડે, તો છત્રી, સનગ્લાસ અને કેપનો ઉપયોગ કરીને સ્કીનને સીધા તડકાથી બચાવવી જોઈએ.

ત્વચાની કુદરતી ચમક જાળવી રાખવા માટે માત્ર બહારથી જ નહીં, પરંતુ અંદરથી પણ શરીરને સ્વસ્થ રાખવું જરૂરી છે. ઉનાળામાં દિવસ દરમિયાન પુષ્કળ પાણી પીવું જોઈએ. પાણી ઉપરાંત નારિયેળ પાણી, છાશ અને ફળોના તાજા જ્યુસનું સેવન કરવાથી શરીર હાઈડ્રેટ રહેશે અને સ્કીન પર ગ્લો જળવાઈ રહેશે. ત્વચાને ઠંડક આપવા માટે એલોવેરા જેલ અથવા ગુલાબજળનો ઉપયોગ શ્રેષ્ઠ સાબિત થાય છે. ધૂળ અને પરસેવો સાફ કરવા માટે સમયાંતરે ઠંડા પાણીથી ચહેરો ધોતા રહેવું જોઈએ.

આ ઋતુમાં કપડાની પસંદગી પણ સ્કીન હેલ્થ પર અસર કરે છે. ચામડી પર રેશિઝ ન પડે તે માટે સુતરાઉ (કોટન) જેવા હળવા અને ઢીલા કપડાં પહેરવા જોઈએ જેથી ત્વચાને પૂરતી હવા મળી રહે. આ ઉપરાંત, ઉનાળામાં ભારે ક્રીમ કે હેવી મેકઅપ કરવાનું ટાળવું જોઈએ, કારણ કે તેનાથી ત્વચાના છિદ્રો બંધ થઈ શકે છે. જેલ-બેઝ્ડ મોઇશ્ચરાઇઝર આ હવામાન માટે સૌથી વધુ અનુકૂળ રહે છે. જો સનબર્ન જેવી સમસ્યા થાય, તો એલોવેરા જેલ લગાવીને ત્વચાને રાહત આપી શકાય છે.

ડિસ્ક્લેમર: આ આર્ટિકલમાં આપવામાં આવેલી માહિતી સામાન્ય જાણકારી માટે છે. કોઈપણ પ્રોડક્ટનો ઉપયોગ કરતા પહેલા અથવા સ્કીનની ગંભીર સમસ્યા માટે નિષ્ણાત ડોક્ટરની સલાહ લેવી હિતાવહ છે.