મુંબઈ: શનિવારની રાત્રિ મુંબઈના મીરા ભાયંદર વિસ્તારમાં અચાનક લાગેલી વિકરાળ આગે અનેક ગરીબ પરિવારોના સપનાઓને રાખમાં ફેરવી દીધા હતા. આ અકસ્માત એટલો ભયાનક હતો કે જોતજોતામાં અનેક ઝૂંપડાઓ આગની લપેટમાં આવી ગયા હતા અને આસપાસના વિસ્તારમાં ભયનો માહોલ ફેલાઈ ગયો હતો.
આ કરુણ ઘટના મીરા ભાયંદરના ઈન્દ્રલોક ફેઝ-4 વિસ્તારમાં બની હતી. શનિવારે મોડી રાત્રે ઝૂંપડપટ્ટીમાં અચાનક આગ ફાટી નીકળી હતી, જેમાં દાઝી જવાથી બે નિર્દોષ બાળકો અને એક 40 વર્ષીય વ્યક્તિ સહિત કુલ ત્રણ લોકોના કમકમાટીભર્યા મોત નિપજ્યા છે. પ્રાથમિક તપાસમાં આગ લાગવાનું કારણ શોર્ટ સર્કિટ હોવાનું સામે આવ્યું છે, જેના કારણે ક્ષણભરમાં જ આગે રૌદ્ર સ્વરૂપ ધારણ કરી લીધું હતું.
આગની તીવ્રતા એટલી વધારે હતી કે ઝૂંપડાઓમાં રાખવામાં આવેલા ગેસ સિલિન્ડરોમાં એક પછી એક ધડાકા થવા લાગ્યા હતા. આ વિસ્ફોટોને કારણે લપેટો વધુ ઊંચે ઉઠી હતી અને આખા વિસ્તારમાં અફરાતફરી મચી ગઈ હતી. સ્થાનિક લોકોના જણાવ્યા મુજબ, આગ લાગતા જ લોકો જીવ બચાવવા દોડવા લાગ્યા હતા અને ચારેબાજુ ચીસ અને બૂમો સંભળાઈ રહી હતી. જોકે, ફાયર બ્રિગેડની સતર્કતાને કારણે સમય રહેતા અનેક સિલિન્ડરોને બહાર કાઢી લેવાયા હતા, જેથી મોટી હોનારત ટળી હતી.
ઘટનાની જાણ થતા જ પોલીસ અને ફાયર બ્રિગેડની અનેક ગાડીઓ ઘટનાસ્થળે પહોંચી ગઈ હતી. ફાયર ફાઈટરોએ કલાકોની ભારે જહેમત બાદ આગ પર કાબૂ મેળવ્યો હતો. આગ ઓલવાયા બાદ પણ પરિસ્થિતિ ગંભીર હતી, તેથી મોડી રાત્રે 1 વાગ્યા સુધી સર્ચ ઓપરેશન ચલાવવામાં આવ્યું હતું જેથી કોઈ અન્ય વ્યક્તિ કાટમાળમાં દબાયેલી ન હોય તે સુનિશ્ચિત કરી શકાય. હાલમાં પોલીસે અકસ્માતનો ગુનો નોંધી વધુ તપાસ હાથ ધરી છે.
આ આગમાં માત્ર જીવ જ નથી ગયા, પરંતુ અનેક પરિવારોના માથા પરથી છત પણ છીનવાઈ ગઈ છે. ગરીબ પરિવારોના ઘરવખરીનો સામાન બળીને ખાખ થઈ ગયો છે. સ્થાનિક વહીવટીતંત્ર દ્વારા અસરગ્રસ્તોને તાત્કાલિક સહાય પહોંચાડવાની કામગીરી શરૂ કરવામાં આવી છે. આ ઘટનાએ ફરી એકવાર ગીચ ઝૂંપડપટ્ટી વિસ્તારોમાં ફાયર સેફ્ટી અને વાયરિંગની નબળી વ્યવસ્થા સામે સવાલો ઉભા કર્યા છે.
