મુંબઈઃ મહારાષ્ટ્રના મુખ્ય પ્રધાન દેવેન્દ્ર ફડણવીસે મહારાષ્ટ્રમાં પેટ્રોલ અને ડીઝલની અછત અંગેની ચિંતાઓને ફગાવી દીધી હતી અને લોકોને ગભરાટમાં બળતણ ન ખરીદવાની અપીલ કરી હતી.
નાગપુરમાં પોલીસ વાહનો માટે ઇંધણની અછત હોવાના એનસીપી (એસપી) નેતા જયંત પાટીલના દાવા અંગે પૂછવામાં આવતા, ફડણવીસે ભારપૂર્વક જણાવ્યું હતું કે રાજ્યમાં પેટ્રોલ કે ડીઝલની કોઈ અછત નથી. જોકે, તેમણે કહ્યું કે પૂરતી ઉપલબ્ધતા હોવા છતાં ગ્રાહકો દ્વારા ઇંધણનો બિનજરૂરી સ્ટોક કરવાથી પુરવઠામાં કામચલાઉ વિક્ષેપ પડ્યો છે.
"જો બધા લોકો એક જ સમયે બેંકમાંથી પૈસા ઉપાડવાનો પ્રયાસ કરે, તો બેંક પાસે તાત્કાલિક એટલી તરલતા નહીં હોય કારણ કે સિસ્ટમો સામાન્ય દૈનિક જરૂરિયાતો અનુસાર ડિઝાઇન કરવામાં આવી છે. આ જ વાત ઇંધણ પુરવઠા શૃંખલાઓને લાગુ પડે છે," તેમણે ભાર મૂક્યો.ફડણવીસે કહ્યું કે પેનિક ખરીદીથી ઇંધણ પુરવઠા શૃંખલામાં ખલેલ પહોંચી રહી છે.
મુખ્ય પ્રધાને રાજ્યના ભૂતપૂર્વ નાણાપ્રધાન જયંત પાટીલના ઇંધણની અછત અંગેના દાવાઓને ફગાવી દીધા હતા. "જયંત પાટીલે નાગપુર અંગે ગંભીર આરોપો લગાવ્યા હતા, જેમાં દાવો કરવામાં આવ્યો છે કે પોલીસ ગુનાની તપાસ કરી શકી નહોતી કારણ કે તેમની પાસે ડીઝલ નહોતું અને ડબલ એન્જિનવાળી સરકારનું ઇંધણ ખતમ થઈ ગયું છે. પોલીસ માટે પેટ્રોલ કે ડીઝલ અંગે ક્યાંય પણ આવો કોઈ મુદ્દો નથી," તેમણે જણાવ્યું હતું.
"આવી ખોટી માહિતી આપનાર વ્યક્તિ સામે પહેલાથી જ કાર્યવાહી કરવામાં આવી છે. મહારાષ્ટ્રમાં જરૂરી માત્રામાં પેટ્રોલ અને ડીઝલનો પુરવઠો ઉપલબ્ધ છે. આજે પાટીલે રાજ્યના કેટલાક ભાગોમાં ઇંધણની અછતના અહેવાલો પર સરકાર પર નિશાન સાધ્યું અને પૂછ્યું કે શું "ડબલ-એન્જિન સરકારના એન્જિનમાં પણ તેલ ખતમ થઈ ગયું છે". તેમણે એક્સ પરની એક પોસ્ટમાં, પેટ્રોલ અને ડીઝલની અછત સાથે જોડાયેલી શ્રેણીબદ્ધ ઘટનાઓનો ઉલ્લેખ કર્યો હતો .
