(અમારા પ્રતિનિધિ તરફથી)
મુંબઈ: મહારાષ્ટ્રના મુખ્ય પ્રધાન દેવેન્દ્ર ફડણવીસે શનિવારે શિવસેના (યુબીટી)ના પ્રમુખ ઉદ્ધવ ઠાકરે સાથે ગુપ્ત મુલાકાતના અહેવાલોને નકારી કાઢ્યા હતા. જ્યારે બે નેતાઓએ મુંબઈમાં મુખ્ય પ્રધાનના સત્તાવાર નિવાસસ્થાને ચર્ચા કરી હોવાના અહેવાલો રાતથી ફરી રહ્યા છે. 

‘ઉદ્ધવ ઠાકરે સાથે ગુપ્ત મુલાકાતનું કારણ શું છે? અમારી પાસે ગુપ્ત રીતે ચર્ચા કરવા માટે આવા કોઈ વિષયો નથી. જો ઉદ્ધવ ઠાકરે મને મળવા માંગતા હોય તો પણ અમે ખુલ્લેઆમ મળી શકીએ છીએ. આવી કોઈ મુલાકાત થઈ નથી,’ એમ ફડણવીસે ત્ર્યંબકેશ્ર્વરમાં ભગવાન શિવના દર્શન કર્યા પછી પત્રકારોને જણાવ્યું હતું.

તેમણે કહ્યું હતું, કે કેટલાક લોકો જાણી જોઈને ખોટા સમાચાર ફેલાવી રહ્યા છે, અને ઉમેર્યું કે આવા (સોશિયલ મીડિયા) હેન્ડલ્સને નોટિસ મોકલવામાં આવશે. ‘આવા ફેક ન્યૂઝ એકાઉન્ટ્સ સામે કાર્યવાહી કરવામાં આવશે,’ એમ તેમણે કહ્યું હતું. 

અગાઉ, વંચિત બહુજન આઘાડી (વીબીએ) સાથે જોડાયેલા એક મીડિયા હાઉસે દાવો કર્યો હતો કે ફડણવીસ અને ઠાકરે બુધવારે મધ્યરાત્રિએ મુંબઈમાં મુખ્ય પ્રધાનના સત્તાવાર નિવાસસ્થાન ‘વર્ષા’ ખાતે મળ્યા હતા.
છત્રપતિ શિવાજી મહારાજ અને સમર્થ રામદાસ વચ્ચેની ઐતિહાસિક મુલાકાત અંગે ધીરેન્દ્ર શાસ્ત્રીની ટિપ્પણી અંગેના પ્રશ્ર્નના જવાબમાં મુખ્ય પ્રધાને  કહ્યું હતું કે , ‘આપણે ઇતિહાસમાં કે ઉપલબ્ધ પુસ્તકોમાં એવું કોઈ ઉદાહરણ નથી.’

‘આવા દાવાઓને સમર્થન આપતો કોઈ ઐતિહાસિક પુરાવો નથી,’ તેમણે ઉમેર્યું. શાસ્ત્રીએ અહેવાલ મુજબ દાવો કર્યો હતો કે મુલાકાત દરમિયાન શિવાજી મહારાજે સમર્થ રામદાસને કહ્યું હતું કે તેઓ જવાબદારીઓ અને યુદ્ધનો ત્યાગ કરવા માંગે છે અને તેમનો મુગટ અર્પણ કર્યો હતો. જવાબમાં, સમર્થ રામદાસે ફરીથી શિવાજી મહારાજના માથા પર મુગટ રાખ્યો અને તેમને તેમના રાજ્યની સંભાળ રાખવા કહ્યું હતું. 

મહાન વ્યક્તિત્વો વિશેની વાર્તાઓ ઘણીવાર સમય જતાં અલગ અલગ રીતે વિકસિત થાય છે તે નોંધીને, ફડણવીસે રામાયણ અને મહાભારતના ઉદાહરણો ટાંકતા કહ્યું કે વિવિધ પ્રદેશોમાં વિવિધ લોક સંસ્કરણો અસ્તિત્વમાં છે.
તેમણે કહ્યું કે લોકોએ બિનજરૂરી વિવાદ ટાળવો જોઈએ અને જવાબદારીપૂર્વક પ્રતિક્રિયા આપવી જોઈએ.

‘પ્રતિક્રિયા કરતા પહેલા લોકોએ વસ્તુઓને યોગ્ય રીતે સમજવી જોઈએ. બિનજરૂરી અરાજકતા ઊભી કરવી યોગ્ય નથી,’ એમ તેમણે કહ્યું હતું. 17મી સદીના સંત-કવિ, સમર્થ રામદાસે સમાજના વિવિધ વર્ગોમાં ધર્મ અને આધ્યાત્મિકતાને પુનર્જીવિત કરવા માટે એક આધ્યાત્મિક ચળવળ શરૂ કરી હતી. લોકોનો એક વર્ગ માને છે કે તેઓ શિવાજી મહારાજના આધ્યાત્મિક ગુરુ હતા, પરંતુ કેટલાક ઇતિહાસકારો આ દાવાને નકારી કાઢે છે.

શાસ્ત્રીના અહેવાલ મુજબના નિવેદન કે લોકોએ ચાર બાળકોને જન્મ આપવો જોઈએ અને તેમાંથી એકને આરએસએસને સમર્પિત કરવું જોઈએ, તે અંગે પૂછવામાં આવતા, ફડણવીસે કહ્યું, ‘ઘણા લોકો પોતાના વિચારો વ્યક્ત કરે છે, અને આપણે તેને યોગ્ય સંદર્ભમાં લેવું જોઈએ.’

‘તેમનો (શાસ્ત્રી) કહેવાનો અર્થ એ હતો કે આરએસએસ હિન્દુ સંસ્કૃતિ અને સનાતન પરંપરાને જીવંત રાખવા માટે કામ કરી રહ્યું છે, તેથી ઘરના એક પુત્રએ સંઘમાં જોડાવું જોઈએ,’ એમ ફડણવીસે કહ્યું હતું. 
શાસ્ત્રીએ એક દિવસ પહેલા નાગપુરમાં શિલાન્યાસ સમારોહમાં આ કથિત ટિપ્પણીઓ કરી હતી.

ફડણવીસે એમ પણ કહ્યું હતું કે નાસિકમાં આગામી કુંભ મેળાને લગતું રાજ્ય સરકારનું ચાલુ કાર્ય સંતોષકારક રીતે આગળ વધી રહ્યું છે પરંતુ તેને ઝડપી બનાવવાની જરૂર છે. તેમણે કહ્યું હતું કે ધાર્મિક નેતાઓ અને અખાડાઓ સાથે સંકલન બેઠકોની સંખ્યા અને આવર્તન વધારવું જોઈએ, ઉમેર્યું હતું કે સાંસ્કૃતિક જાગૃતિ સાથે જોડાયેલ નદીના પુનર્જીવન અને જળ સંરક્ષણ પહેલ માટે તૈયારીઓ ચાલી રહી છે.