દમણ: ગુજરાત નજીક કેન્દ્રશાસિત પ્રદેશ દમણના દરિયાકાંઠે સર્જાયેલી એક ગંભીર દરિયાઈ આપત્તિમાં ઇન્ડિયન કોસ્ટ ગાર્ડ દ્વારા ઉત્તમ કામગીરી કરવામાં આવી છે. નવસારીના કૃષ્ણપુરથી ઓખા બંદર તરફ જઈ રહેલી 'જય માલા' નામની ફિશિંગ બોટમાં અચાનક ટેકનિકલ ખામી સર્જાતા તે પાણીમાં ડૂબવા લાગી હતી. ધોલાઈ બંદરથી આશરે બે નોટિકલ માઈલ દૂર ફસાયેલી આ બોટમાં સવાર નવ જેટલા માછીમારોના પ્રાણ જોખમમાં મુકાયા હતા. આ અંગે કટોકટીનો સંદેશ મળતા જ દમણ કોસ્ટ ગાર્ડે તાત્કાલિક ધોરણે ત્વરિત બચાવ અભિયાન શરૂ કર્યું હતું.
Daman: The Coast Guard successfully rescued nine fishermen who were stranded at sea in the Union Territory of Daman. The fishermen were aboard a boat from Navsari that developed a technical fault and began taking on water, putting their lives at risk. The boat, Jai Mala, was… pic.twitter.com/pagkTpZfwh
— IANS (@ians_india) August 18, 2026
કોસ્ટ ગાર્ડ એર સ્ટેશન, દમણના પાયલોટ બલવિંદર સિંહે સમગ્ર ઘટનાની માહિતી આપતા જણાવ્યું હતું કે, બોટમાં ઘણા કલાકોથી પાણી ભરાઈ જવાના કારણે તે ડૂબી જવાની અણી પર હતી અને તેમાં સવાર તમામ ખલાસીઓનો જીવ જોખમમાં મુકાયો હતો. કટોકટીનો આ એલર્ટ મળતાની સાથે જ એર સ્ટેશન દ્વારા વિના વિલંબે ચેતક હેલિકોપ્ટરને રવાના કરવામાં આવ્યું હતું. કોસ્ટ ગાર્ડની સમયસૂચકતા અને સચોટ આયોજનને કારણે દરિયાના વચ્ચે ફસાયેલા તમામ નવ માછીમારોના જીવ બચાવી લેવામાં સફળતા મળી હતી.
હેલિકોપ્ટર દ્વારા રેસ્ક્યુ કરાયા બાદ તમામ માછીમારોએ રાહતનો શ્વાસ લીધો હતો. બચેલા માછીમારો પૈકી એક જણે પોતાની આપવીતી જણાવતા કહ્યું હતું કે, બોટનું એન્જિન બગડી જવાથી અચાનક બંધ થઈ ગયું હતું અને બોટમાં પાણી ભરાવા લાગ્યું હતું, પરંતુ સમયસર હેલિકોપ્ટર આવી પહોંચતા અમારો આબાદ બચાવ થયો છે અને હવે અમે સુરક્ષિત છીએ. તમામ સુરક્ષિત માછીમારોને દમણ લાવ્યા બાદ તેમની તબીબી તપાસ કરવામાં આવી હતી અને તેમને જરૂરી સારવાર પણ પૂરી પાડવામાં આવી હતી.
