જેરુસલેમ: ભારતના વડાપ્રધાન નરેન્દ્ર મોદી બુધવાર 25 ફેબ્રુઆરીથી બે દિવસીય ઈઝરાયલના ઐતિહાસિક પ્રવાસે પહોંચી ગયા છે. આ મુલાકાત માત્ર બે દેશો વચ્ચેના રાજદ્વારી સંબંધો પૂરતી સીમિત નથી, પરંતુ તે બદલાતા વૈશ્વિક સમીકરણોમાં ભારત અને ઈઝરાયલની અતૂટ મિત્રતાનો પુરાવો છે. વડાપ્રધાન મોદીની આ મુલાકાતથી સંરક્ષણ, કૃષિ અને ટેકનોલોજીના ક્ષેત્રમાં સહયોગના નવા દ્વાર ખુલવાની અપેક્ષા છે. પશ્ચિમ એશિયામાં ભારતના વધતા પ્રભાવ અને ઈઝરાયલ સાથેની ગાઢ વ્યૂહાત્મક ભાગીદારી માટે આ યાત્રા અત્યંત મહત્વની માનવામાં આવી રહી છે.
PM મોદીનો કાર્યક્રમ
વડાપ્રધાન મોદી બુધવારે બપોરે 12:45 કલાકે બેન ગુરિયન ઈન્ટરનેશનલ એરપોર્ટ પર ઉતરણ કરશે, જ્યાં ઈઝરાયલના પીએમ બેન્જામિન નેતન્યાહુ અને તેમના પત્ની સારા પોતે પ્રોટોકોલ તોડીને તેમનું સ્વાગત કર્યું. આ મુલાકાત દરમિયાન મોદી ઈઝરાયલના રાષ્ટ્રપતિ આઈઝેક હર્ઝોગને પણ મળશે. બંને દેશો વચ્ચે વિજ્ઞાન, સંરક્ષણ, જળ વ્યવસ્થાપન અને કૃષિ જેવા ક્ષેત્રોમાં થયેલી પ્રગતિની સમીક્ષા કરવામાં આવશે. આ યાત્રાનો મુખ્ય હેતુ દ્વિપક્ષીય સંબંધોને વધુ ઊંચાઈ પર લઈ જવાનો અને પરસ્પર હિતના વૈશ્વિક મુદ્દાઓ પર મંથન કરવાનો છે.
વડાપ્રધાન મોદી આ મુલાકાત દરમિયાન ઈઝરાયલની સંસદ 'નેસેટ'ને સંબોધિત કરશે, જે એક દુર્લભ સન્માન છે. નેસેટને સંબોધિત કરનારા તેઓ ભારતના પ્રથમ વડાપ્રધાન બનશે. પીએમ મોદી નેસેટ પ્લેનમ (સર્વોચ્ચ ગવર્નિંગ બોડી) સમક્ષ પોતાનું પ્રવચન આપશે, જે ભારત અને ઈઝરાયલના ગાઢ સંબંધોનું પ્રતીક છે. આ ઉપરાંત, તેઓ જેરૂસલેમમાં એક ઈનોવેશન ઈવેન્ટમાં ભાગ લેશે અને હોલોકોસ્ટ મેમોરિયલ સેન્ટર 'યાદ વાશેમ'ની મુલાકાત લઈને શહીદોને શ્રદ્ધાંજલિ પણ આપશે.
વડાપ્રધાનની મુલાકાતની સાથે જ ભારત અને ઈઝરાયલ વચ્ચે ફ્રી ટ્રેડ એગ્રીમેન્ટ (FTA) માટે વાટાઘાટોનો પ્રથમ રાઉન્ડ નવી દિલ્હીમાં શરૂ થયો હતો. 23 થી 26 ફેબ્રુઆરી સુધી ચાલનારી આ બેઠકમાં બંને દેશો વેપારી વસ્તુઓ પરના આયાત શુલ્ક ઘટાડવા અને રોકાણને પ્રોત્સાહન આપવા પર ચર્ચા કરી રહ્યા છે. આ કરાર થવાથી બંને દેશો વચ્ચે ટેકનોલોજી અને સેવાઓના આદાનપ્રદાનમાં સરળતા રહેશે અને વેપારીઓને નવા બજારો મળશે. વાણિજ્ય મંત્રાલયના જણાવ્યા અનુસાર, આ સમજૂતીથી દ્વિપક્ષીય વેપારના આંકડામાં મોટો ઉછાળો આવી શકે છે.
ગુરુવારે પીએમ મોદી અને નેતન્યાહુ વચ્ચે ઉચ્ચ સ્તરીય બેઠક યોજાશે, જેમાં મહત્વના કરારો પર હસ્તાક્ષર કરવામાં આવશે અને સંયુક્ત નિવેદન જારી કરાશે. પીએમ મોદી ઈઝરાયલમાં રહેતા ભારતીય પ્રવાસી સમુદાયને પણ મળશે અને તેમની સાથે સંવાદ કરશે. વિદેશી ધરતી પર ભારતીય ડાયસ્પોરા સાથેનો આ સંવાદ હંમેશા આકર્ષણનું કેન્દ્ર રહે છે. તમામ સત્તાવાર કાર્યક્રમો પૂર્ણ કરી પીએમ મોદી ગુરુવારે બપોરે 2 વાગ્યે ભારત પરત ફરવા રવાના થશે.
