મુંબઈ: મહારાષ્ટ્ર સરકાર રાષ્ટ્રીયસ્તરના વિવિધ પ્રયાસોને ટેકો આપવા અને અદ્યતન ટેકનોલોજી દ્વારા આર્થિક વિકાસને મજબૂત બનાવવા માટે એક જીઓ-ટેકનોલોજી એપ્લિકેશન સેન્ટર સ્થાપશે, એમ મુખ્ય પ્રધાન દેવેન્દ્ર ફડણવીસે જણાવ્યું હતું.

વિધાનસભામાં 2026-27 માટે રાજ્યનું બજેટ રજૂ કરતા ફડણવીસે  જણાવ્યું હતું કે પ્રસ્તાવિત મહારાષ્ટ્ર જીઓટેકનોલોજી એપ્લિકેશન સેન્ટર રાષ્ટ્રીય સ્તરની પહેલોનું કાર્યક્ષમ આયોજન અને અમલીકરણ કરવામાં મદદ કરશે અને રાજ્યના આર્થિક વિકાસને ટેકો આપશે. સરકારનો ઉદ્દેશ્ય રાજ્યમાં અસરકારક શાસન સુનિશ્ચિત કરવા અને અદ્યતન ટેકનોલોજીકલ માળખાગત સુવિધાઓ બનાવવા માટે તમામ નાગરિક અને વ્યવસાયિક સેવાઓનું ડિજિટાઇઝેશન કરવાનો છે.

તેમણે વધુમાં એમ પણ જણાવ્યું હતું કે 'રાજ્ય સરકાર 100 ટકા જમીન વ્યવહારોનું કોમ્પ્યુટરાઇઝેશન કરવાની, સંપૂર્ણપણે ઇલેક્ટ્રોનિક ઓફિસ સિસ્ટમ અપનાવવાની અને પેપરલેસ સરકારી કામગીરી તરફ આગળ વધવાની યોજના ધરાવે છે.'

સીએમએ અસરકારક નીતિનિર્માણ, ઝડપી નિર્ણય લેવા અને વધુ જવાબદારી સુનિશ્ચિત કરવા માટે ઇલેક્ટ્રોનિક્સ, માહિતી ટેકનોલોજી અને કૃત્રિમ બુદ્ધિમત્તાના સ્વતંત્ર વિભાગની રચનાની જાહેરાત  કરી ઉમેર્યું કે આ વિભાગને પર્યાપ્ત ટેકનિકલ જ્ઞાન ધરાવતા લોકોથી સજ્જ સમર્પિત કમિશનરેટ દ્વારા સમર્થન આપવામાં આવશે.

ફડણવીસે જણાવ્યું હતું કે, રાજ્યમાં માહિતી ટેકનોલોજી અને આર્ટિફિશિયલ ઇન્ટેલિજન્સ ઇકોસિસ્ટમને મજબૂત બનાવવા માટે સરકારે ઓપનએઆઈ અને સર્વમ એઆઈ જેવી વૈશ્વિક અને રાષ્ટ્રીય સંસ્થાઓ સાથે હસ્તાક્ષર કર્યા છે. 

બજેટ ભાષણમાં સીએમએ એમ પણ જણાવ્યું હતું કે ઉભરતી ટેકનોલોજીઓમાં સંશોધન, નવીનતા અને વિકાસને પ્રોત્સાહન આપવા માટે ઇન્ડિયન ઇન્સ્ટિટ્યૂટ ઓફ ટેકનોલોજી બોમ્બે અને ભારતજેન સાથે સમજૂતી કરાર પર હસ્તાક્ષર કરવામાં આવ્યા છે. 

રાજ્ય સરકાર મહારાષ્ટ્રને આર્ટિફિશિયલ ઇન્ટેલિજન્સ, ક્વોન્ટમ કમ્પ્યુટિંગ, ડ્રોન, ઓટોનોમસ વાહનો અને ડીપ ટેકનોલોજી જેવી ફ્રન્ટીયર ટેકનોલોજી માટે વિશ્વ કક્ષાના હબ તરીકે વિકસાવવા માટે ખાસ નીતિઓ રજૂ કરવાની યોજના ધરાવે છે.  
(પીટીઆઈ)