તાશ્કંદઃ ઉઝબેકિસ્તાનના બે દિવસીય પ્રવાસે રહેલા વડા પ્રધાન મોદી શનિવારે મોડી રાત્રે તાશ્કંદ પહોંચ્યા હતા. જ્યાં પ્રમુખ શવકત મિર્ઝિયોયેવ દ્વારા તેમનું ઉષ્માભર્યું સ્વાગત કરવામાં આવ્યું હતું. ત્યારબાદ વડા પ્રધાન મોદી અને પ્રમુખ મિર્ઝિયોયેવ એક જ કારમાં મુસાફરી કરતાં જોવા મળ્યા હતા. જેને તેમની 'કાર ડિપ્લોમસી'ના તાજા ઉદાહરણ તરીકે જોવામાં આવી રહ્યું છે.

ઉઝબેકિસ્તાનના પ્રમુખ મિર્ઝિયોયેવની ઉપસ્થિતિમાં વડા પ્રધાન મોદીનું ઉષ્માભર્યું સ્વાગત કરવામાં આવ્યું હતું. આ દરમિયાન દેશનું રાષ્ટ્રગીત 'ઓઝબેકિસ્ટન રિસ્પબ્લિકસિનિંગ દાવ્લત મધિયસી' વગાડવામાં આવ્યું હતું. 

મોદીએ સોશિયલ મીડિયા પર ફોટા શેર કરતાં ઉષ્માભર્યા સ્વાગત માટે મિર્ઝિયોયેવનો આભાર માન્યો હતો. તેમણે કહ્યું કે તાશ્કંદ પહોંચવા પર પ્રમુખ શવકત મિર્ઝિયોયેવે ઉષ્માભર્યું સ્વાગત કર્યું હતું. આ ખાસ લાગણી માટે હું તેમનો આભારી છું.

Thank you Uzbekistan!

Gratitude to President Mirziyoyev for his warmth, attention to detail and personal commitment to the India-Uzbekistan friendship.@president_uz pic.twitter.com/HrAPuz4ROX

— Narendra Modi (@narendramodi) August 30, 2026

વડા પ્રધાન દ્વારા શેર કરવામાં આવેલા ફોટાઓમાં એક ફોટાએ તેના 'કાર ડિપ્લોમસી'ના ટ્રેન્ડની યાદો તાજી કરી હતી. બંને નેતાઓ એરપોર્ટથી રાષ્ટ્રપતિ ભવન સુધી એક કારમાં સાથે મુસાફરી કરતાં જોવા મળ્યા હતા, જ્યાં તેઓએ ડિનર મીટિંગ યોજી હતી. અન્ય તસવીરોમાં બંને નેતાઓ એકબીજાને ભેટતા જોવા મળ્યા હતા.

મોદીના 'કાર ડિપ્લોમસી'ના ટ્રેન્ડે ત્યારે જોર પકડ્યું હતું જ્યારે વડા પ્રધાન મોદી અને રશિયન પ્રમુખ વ્લાદિમીર પુતિને ૨૦૨૫માં ચીનના તિયાનજિનમાં એસસીઓ સમિટ દરમિયાન દ્વિપક્ષીય બેઠક માટે એક સાથે કારની સવારી કરી હતી.

A special welcome, wreath-laying at the Yangi Uzbekistan Monument and interaction with the Indian community…

Here are highlights from yesterday in Tashkent. pic.twitter.com/nQF54An3UB

— Narendra Modi (@narendramodi) August 30, 2026

આ પહેલી વખત નથી જ્યારે વડા પ્રધાન મોદી અન્ય વિશ્વ નેતા સાથે કાર શેર કરતાં જોવા મળ્યા હોય. ૨૦૨૫માં જોર્ડનના પ્રવાસ દરમિયાન મોદીએ ક્રાઉન પ્રિન્સ અલ હુસૈન બિન અબ્દુલ્લા દ્વિતીય સાથે કાર શેર કરી હતી. તેમજ ઇથોપિયાની મુલાકાત દરમિયાન ઇથોપિયન વડા પ્રધાને મોદીનું સ્વાગત કર્યાં બાદ એક જ કારમાં તેમને હોટલ સુધી પહોંચાડ્યા હતા.