વોશિંગ્ટનઃ ભારતીય-અમેરિકનો ફક્ત સાંસદ તરીકે ચૂંટાઈને અમેરિકામાં સત્તામાં હિસ્સો ઇચ્છતા નથી, પરંતુ ૩ નવેમ્બરના રોજ યોજાનારી મધ્યસત્રની ચૂંટણીમાં પોતાના હેતુને ટેકો આપનારા અન્ય લોકોનું સમર્થન પણ કરી રહ્યા છે. વર્તમાન અમેરિકન હાઉસ ઓફ રિપ્રેઝન્ટેટિવ્સમાં ભારતીય મૂળના છ સભ્યો છે, પરંતુ ઇલિનોઇસથી રાજા કૃષ્ણમૂર્તિ અને મિશિગનથી થાનેદારની પ્રાઈમરી ચૂંટણીમાં હારના કારણે આ સંખ્યા ઘટીને ચાર થઈ શકે છે.
ભારતીય-અમેરિકન કોંગ્રેસ સભ્ય રો ખન્ના (કેલિફોર્નિયા-17), પ્રમિલા જયપાલ (વોશિંગ્ટન-7), અમી બેરા (કેલિફોર્નિયા-3), અને સુહાસ સુબ્રમણ્યમ (વર્જિનિયા-10) ફરીથી ચૂંટણી લડી રહ્યા છે. અમેરિકાની મધ્યસત્ર ચૂંટણીઓ રાષ્ટ્રપતિના ચાર વર્ષના કાર્યકાળના મધ્યમાં યોજાય છે. જેમાં કોંગ્રેસના નીચલા ગૃહ, પ્રતિનિધિ ગૃહના તમામ 435 સભ્યો અને ઉપલા ગૃહ સેનેટના 100 સભ્યોમાંથી લગભગ એક તૃતીયાંશ સભ્યોને ચૂંટવામાં આવે છે.
આ ચૂંટણીઓમાં ઘણા રાજ્યોના ગવર્નરો અને વિધાનસભાઓની સાથે સાથે કેટલાક મેયર અને અન્ય સ્થાનિક અધિકારીઓની ચૂંટણીઓ સામેલ હોય છે. પરિણામો નક્કી કરે છે કે કયા પક્ષનું કોંગ્રેસ પર નિયંત્રણ રહેશે અને આ રાષ્ટ્રપતિની કાયદો પસાર કરવાની ક્ષમતાને અસર કરી શકે છે.
ઇમરજન્સી મેડિસિન ફિઝિશિયન અમીશ શાહ અમેરિકન કોંગ્રેસની ચૂંટણી માટે એરિઝોનાના પ્રથમ જિલ્લામાંથી ડેમોક્રેટિક ઉમેદવાર છે, જ્યારે પિયા ડંડિયા ફ્લોરિડાના 22મા જિલ્લામાંથી ચૂંટણી લડી રહ્યા છે.
પાંચ વખત કોંગ્રેસના સભ્ય રહેલા કૃષ્ણમૂર્તિ તેમના ગૃહ રાજ્ય ઇલિનોઇસમાંથી પ્રથમ હિન્દુ યુએસ સેનેટર બનવાની આશા રાખતા હતા, પરંતુ માર્ચમાં પ્રાઇમરી ચૂંટણીમાં સાથી ડેમોક્રેટ જૂલિયાના સ્ટ્રેટન સામે હારી ગયા હતા. મિશિગનના 13મા કોંગ્રેસનલ જિલ્લાની પ્રાઈમરી ચૂંટણીમાં થાનેદાર ડોનાવન મેકકિની સામે હારી ગયા હતા. મેકકિનીને ડેમોક્રેટિક સોશિયલિસ્ટ એલાયન્સ દ્વારા સમર્થન મળ્યું હતું જે ડેમોક્રેટિક પાર્ટીમાં નોંધપાત્ર પ્રભાવ ધરાવતું જૂથ છે.
બાયોટેક ઉદ્યોગસાહસિકમાંથી રાજકારણી બનેલા રિપબ્લિકન વિવેક રામાસ્વામી ઓહિયોના ગવર્નર માટે ચૂંટણી લડી રહ્યા છે. ડોનાલ્ડ ટ્રમ્પનું સમર્થન મળવા છતાં ડેમોક્રેટિક ઉમેદવાર એમી એક્ટન સામે રામાસ્વામીના અભિયાનને મુશ્કેલીઓનો સામનો કરવો પડી રહ્યો છે.
કેલિફોર્નિયાના કાર્ડિયોલોજીસ્ટ અને અમેરિકન ફોર હિંદુ પોલિટિકલ એક્શન કમિટીના સ્થાપક રોમેશ જાપ્રાએ પીટીઆઈને કહ્યું હતું કે "ચૂંટણીમાં ફક્ત ભારતીય-અમેરિકનોનું સમર્થન કરવું પુરતું નથી. આપણે એ લોકોનું પણ સમર્થન કરવું પડશે જે ભારતીય સમુદાય અને હિન્દુઓ પ્રત્યે સહાનુભૂતિ ધરાવે છે. "
