કિશ્તવાડ: જમ્મુ ડિવિઝનના ડોડામાં ભૂસ્ખલન (જમીન ધસી પડવી) બાદ રાહત કામગીરી શરૂ કરી દેવામાં આવી છે. કિશ્તવાડ અને ડોડા જિલ્લામાં રવિવારે રાત્રે વાદળ ફાટવાને કારણે કાદવ અને પથ્થરોનું જાણે કે પૂર આવી ગયું, જેની લપેટમાં નિર્માણાધીન ક્વાર જલ વિદ્યુત પરિયોજના (હાઇડ્રોઇલેક્ટ્રિક પ્રોજેક્ટ) પાસે ઉભેલા વાહનો અને અન્ય બાંધકામના સાધનો દબાઈ ગયા હતા. મંગળવારે પણ તેની અસર જોવા મળી હતી, નેશનલ હાઈવે 244 હાલમાં બંધ છે. રાહત કામગીરી શરૂ કરી દેવામાં આવી છે.

બાંધકામની સામગ્રીને નુકસાન

ભારે વરસાદના કારણે બાંધકામની સામગ્રીને પણ નુકસાન પહોંચ્યું છે. રાહતની વાત એ રહી કે તે સમયે પરિયોજના સ્થળ પર કોઈ હાજર નહોતું. ડોડા-કિશ્તવાડ હાઈવેને નુકસાન થયું છે. કાદવ, ખડકો અને કાટમાળ જમા થવાને કારણે હાઈવે બંધ કરી દેવામાં આવ્યો છે. ભૂસ્ખલનની ઘટના બાદ અધિકારીઓ ઘટનાસ્થળે પહોંચી ગયા હતા. તેમણે રસ્તાની સફાઈ અને સમારકામનું કામ શરૂ કરી દીધું હતું. અધિકારીઓએ જણાવ્યું કે પરિસ્થિતિ નિયંત્રણમાં છે. સોમવારે આખો દિવસ હવામાન સાફ રહ્યું હતું.

જિલ્લાના અન્ય કોઈ વિસ્તારમાંથી આવી ઘટનાની માહિતી મળી નથી. સંબંધિત અધિકારીઓના જણાવ્યા અનુસાર ડોડા જિલ્લાના પ્રેમ નગરના ઉપરના વિસ્તારમાં પણ વાદળ ફાટવાને કારણે ભારે નુકસાન થયું છે. બજારમાં પૂર જેવી સ્થિતિ સર્જાયેલી છે.

વાહનો કાટમાળ નીચે દબાયા

મોટી સંખ્યામાં વાહનો કાટમાળ નીચે દબાયા છે. બજારને અડીને આવેલા નાળામાં વધુ પાણી અને કાટમાળ આવવાને કારણે નીચાણવાળા વિસ્તારના કેટલાક મકાનો અને મંદિરને નુકસાન પહોંચ્યું છે. કિશ્તવાડમાં નિર્માણાધીન 540 મેગાવોટના ક્વાર હાઇડ્રોઇલેક્ટ્રિક પાવર પ્રોજેક્ટના ટનલ વિસ્તારની નજીક વાદળ ફાટવાને કારણે પરિયોજના વિસ્તારમાં મોટી માત્રામાં કાદવ અને ખડકો આવી ગયા છે, જેમાં ઘણા ટ્રક, ડોઝર અને અન્ય બાંધકામના સાધનો દબાઈ ગયા છે.

ફસાયેલા વાહનોને બહાર કાઢવા અને પ્રભાવિત સ્થળ પરથી કાટમાળ હટાવવાનું અભિયાન ચાલી રહ્યું છે. મુસાફરોને હાઈવે પર જવાનું ટાળવા અને સત્તાવાર ટ્રાફિક એડવાઇઝરી (વાહનોની અવરજવર અંગેની સૂચનાઓ)નું પાલન કરવાની સલાહ આપવામાં આવી છે.

કેન્દ્રીય મંત્રી જિતેન્દ્ર સિંહે માહિતી આપી હતી કે આ ઘટનામાં કોઈ પણ પ્રકારની જાનહાનિ થઈ નથી. રિયાસી જિલ્લાના ઊંચાણવાળા વિસ્તારોમાંથી પૂર આવવાની ઘટનાઓના સમાચાર મળ્યા છે. ચેનાનીના બપ્પ ગામ નજીક વરસાદના કારણે માનતલાઈ-લાટી રોડનો એક ભાગ અચાનક ધસી પડ્યો હતો. જેના કારણે આ માર્ગ બંધ થઈ ગયો છે.