ભોપાલઃ ભાજપના ધારાસભ્યની કાર ધોવા ફાયર બ્રિગેડનો બંબો બોલાવાયો હતો. તેમજ 3 ફાયરમેને કાર ધોવા કામે લગાડ્યા હતા. આ અંગેનો વીડિયો સોશિયલ મીડિયામાં વાયરલ થયો હતો.
શું છે સમગ્ર મામલો
મધ્યપ્રદેશના સિંગરોલી બેઠકના ભાજપના ધારાસભ્ય રામનિવાસ શાહના સરકારી બંગલા બહાર ફાયર બ્રિગેડનો બંબો બોલાવીને તેમની પર્સનલ કાર ધોવામાં આવી હાવોનો વીડિયો વાયરલ થયો હતો. સરકારી તંત્રનો દુરુપયોગ કરવામાં આવતો હોવાનો કોઈ જાગૃત નાગરિકે વીડિયો ઉતારીને સોશિયલ મીડિયામાં વાયરલ કર્યો હતો.
વીડિયો સામે આવ્યા બાદ સોશિયલ મીડિયા પર સરકારી સંસાધનોના ઉપયોગને લઈને ચર્ચા શરૂ થઈ ગઈ છે. લોકો પૂછી રહ્યા છે કે આખરે ફાયર બ્રિગેડનું વાહન ધારાસભ્યના નિવાસસ્થાને કયા કામ માટે પહોંચ્યું હતું અને શું કાર ધોવા માટે સરકારી વાહનનો ઉપયોગ કરવામાં આવ્યો હતો? જોકે, વીડિયો સામે આવ્યા પછી પણ ધારાસભ્ય તરફથી હજુ સુધી કોઈ સ્પષ્ટતા સામે આવી નથી. તેથી વાયરલ વીડિયોના આધારે લગાવવામાં આવી રહેલા આરોપોની સત્તાવાર પુષ્ટિની રાહ જોવાઈ રહી છે.
मध्यप्रदेश में फ़ायर ब्रिगेड वालो के पास अब बस एक ही काम बचा है बीजेपी के माननीय विधायक जी की कार वाशिंग का...!
— Keshav Chand Yadav (@keshavyadaviyc) August 25, 2026
सिंगरौली में विधायक जी की कार वाशिंग फ़ायर ब्रिगेड की गाड़ी से हो रही है pic.twitter.com/wgMZbKMsDe
સિંગરોલી વિધાનસભાના ભાજપના ધારાસભ્ય રામનિવાસ શાહનું સરકારી આવાસ બિલોંજીમાં આવેલું છે. વીડિયોમાં આ જ આવાસની બહાર રસ્તા પર ફાયર બ્રિગેડનું વાહન ઊભેલું દેખાય છે. તેની પાસે ત્રણ કર્મચારીઓ નજરે પડે છે, જેઓ ફાયર બ્રિગેડના પાઇપથી એક કારને પાણીથી ધોઈ રહ્યા છે. આ વીડિયો કોઈ સ્થાનિક વ્યક્તિએ રેકોર્ડ કર્યો હતો અને ત્યારબાદ તે સોશિયલ મીડિયા પર વાયરલ થયો હતો.
વીડિયો વાયરલ થયા બાદ સૌથી મોટો સવાલ એ જ ઊભો થઈ રહ્યો છે કે ફાયર બ્રિગેડ જેવા કટોકટીના સંસાધનનો ઉપયોગ ખાનગી વાહનની સફાઈ માટે કેવી રીતે અને કોની મંજૂરીથી થયો? આગ લાગવા કે અન્ય કોઈ કટોકટીની સ્થિતિમાં આ વાહનનો ઉપયોગ લોકોની મદદ માટે કરવામાં આવે છે. આવા સંજોગોમાં તેના ઉપયોગને લઈને જવાબદારીનો પ્રશ્ન મહત્વનો બની જાય છે.
કમિશનરે શું કહ્યું?
મીડિયા સાથે વાત કરતા સિંગરોલી નગર નિગમના કમિશનર સવિતા પ્રધાને જણાવ્યું કે તેમને આ મામલાની કોઈ જાણકારી નથી અને તેમને આ વીડિયો અંગે પહેલીવાર માહિતી મળી છે. હવે એ જોવું મહત્ત્વનું રહેશે કે નગર નિગમ કે સંબંધિત વિભાગ આ વીડિયોની તપાસ કરાવે છે કે નહીં.
