(અમારા પ્રતિનિધિ તરફથી)

મુંબઈ: મુંબઈ મેટ્રો રૂટ પાંચના બીજા તબક્કાનું કામ હજી શરૂ થયું નથી તે પહેલાં જ આ મેટ્રોના કામમાં 1427 કરોડ રૂપિયાનો વધારો થઈ ગયો હોવાનું જાણવા મળ્યું છે. હવે આ મેટ્રો પાછળ અગાઉના 8416 કરોડ રૂપિયાને સ્થાને 9843 કરોડ રૂપિયાનો ખર્ચ કરવામાં આવશે. રાજ્ય સરકાર દ્વારા મુંબઈ મેટ્રો માર્ગ-5, પ્રોજેક્ટ તબક્કો-2 (ધામણકર નાકાથી દુર્ગાડી ચોક) અને મુંબઈ મેટ્રો-5અ (દુર્ગાડી-આધારવાડી-ખડકપાડા-કલ્યાણ અને ભોઈરવાડી-ઉલ્હાસનગર (મુંબઈ મેટ્રો રૂટ-5નો વિસ્તાર) પ્રકલ્પના વિસ્તૃત અહેવાલનો અમલ કરવા અને આ રૂટના બંને તબક્કા માટે સુધારિત કિંમતને માન્યતા આપવા માટે બુધવારે એક સરકારી આદેશ બહાર પાડવામાં આવ્યો હતો. 

રાજ્ય સરકાર દ્વારા ભિવંડી મેટ્રોનું કામ એમએમઆરડીએના માધ્યમથી કરવામાં આવી રહ્યું છે. 24.9 કિ.મી. લાંબા આ રૂટ પર 17 એલિવેટેડ સ્ટેશનનો સમાવેશ થતો હતો.  આ આદેશમાં જણાવ્યા મુજબ ભિવંડી મેટ્રોના પહેલા તબક્કાનું (થાણેથી ભિવંડી) કામ અંતિમ તબક્કામાં પહોંચી ગયું છે. આ માર્ગના નિર્માણ વખતે પુનર્વસનની આવશ્યકતા ન હોવાથી કામ ઝડપથી પૂર્ણ થયું હતું, પરંતુ આ જ રૂટના બીજા તબક્કામાં (ભિવંડીથી કલ્યાણ) મોટા પ્રમાણમાં બાંધકામો આવેલા હોવાથી તેમના પુનર્વસનની જવાબદારીઓ નિર્માણ થઈ રહી છે. આ બધી બાબતને ધ્યાનમાં રાખીને એવો નિર્ણય લેવામાં આવ્યો છે કે બીજા તબક્કાને અંડર-ગ્રાઉન્ડ કરવામાં આવે અને તેથી આ તબક્કાના બાંધકામ ખર્ચમાં 1427 કરોડ રૂપિયાનો વધારો થઈ રહ્યો છે. આ ખર્ચના વધારાને અત્યારે સૈદ્ધાંતિક માન્યતા આપવામાં આવી હોવાનું રાજ્ય સરકાર દ્વારા બુધવારે બહાર પાડવામાં આવેલા સરકારી આદેશમાં જણાવવામાં આવ્યું છે. 

ભિવંડી શહેરમાં હાલની ટ્રાફિક પરિસ્થિતિને ધ્યાનમાં રાખીને અને જો હાલના ફ્લાયઓવરને તોડી પાડવામાં આવે અને તેના સ્થાને સંયુક્ત માળખું (ફ્લાયઓવર + મેટ્રો) પ્રસ્તાવિત કરવામાં આવે, તો બાંધકામ સમયગાળા દરમિયાન ટ્રાફિકમાં મોટો અવરોધ ઊભો થશે અને ભિવંડી શહેરમાં ટ્રાફિક પરિસ્થિતિ વધુ ખરાબ થશે તેવી પ્રબળ શક્યતાને ધ્યાનમાં રાખીને, ભિવંડી શહેરના દુર્ગાડી નાકાથી ટેમઘર સુધી આંશિક રીતે ભૂગર્ભ મેટ્રો બનાવવાનો નિર્ણય લેવામાં આવ્યો, તેમજ રાંજનોલી જંકશન અને દુર્ગાડી ચોક વચ્ચે દ્વિ-સ્તરીય સંકલિત માળખામાં (ફ્લાયઓવર સહિત) એલિવેટેડ મેટ્રો બનાવવાનો નિર્ણય લેવામાં આવ્યો હતો.

અગાઉ, મુંબઈ મેટ્રો રૂટ-5 ના એલિવેટેડ રૂટને કાપુરબાવડી, થાણેથી ભિવંડી શહેરના થાણે-ભિવંડી રોડ થઈને રાજીવ ગાંધી ચોક, ભિવંડી વાયા કલ્યાણ રોડથી રાંજનોલીથી દુર્ગાડી અને પછી કલ્યાણ શહેરથી કલ્યાણ શીળ રોડ થઈને કલ્યાણ એપીએમસી સુધી ચલાવવાનો પ્રસ્તાવ મૂકવામાં આવ્યો હતો. સુધારેલા પ્રોજેક્ટ રિપોર્ટમાં, મુંબઈ મેટ્રો રૂટ-5 (થાણે-ભિવંડી-કલ્યાણ)ના એલાઈનમેન્ટમાં ફેરફાર કરવાનો અને દુર્ગાડી મેટ્રો સ્ટેશન પર મેટ્રો રૂટ-5ના દુર્ગાડી ચોકથી કલ્યાણ એપીએમસી/કલ્યાણ મેટ્રો સ્ટેશન સુધીના રૂટને સમાપ્ત કરવાનો અને દુર્ગાડી સ્ટેશનથી મેટ્રો રૂટ-5અ શરૂ કરવાનો પ્રસ્તાવ મૂકવામાં આવ્યો છે. એટલે કે, મેટ્રો રૂટ-5ના સેક્શનને દુર્ગાડીથી કલ્યાણ એપીએમસી/કલ્યાણ મેટ્રો સ્ટેશન (હવે મુંબઈ-આગ્રા રૂટ) સુધી લંબાવવાનો પ્રસ્તાવ મૂકવામાં આવ્યો છે. ઉપરોક્ત સેક્શનને મુંબઈ મેટ્રો-5અ (દુર્ગાડી-આધારવાડી-ખડકપાડા-કલ્યાણ) તરીકે લંબાવવાનો અને મેટ્રો રૂટ-5ને ભોઈરવાડીથી ઉલ્હાસનગર સુધી લંબાવવાનો પ્રસ્તાવ મૂકવામાં આવ્યો છે. તે મુજબ, ઓથોરિટીએ રૂ. 6248.33 કરોડના ખર્ચે મુંબઈ મેટ્રો રૂટ-5અ અને મેટ્રો રૂટ-5 ના એક્સટેન્શનને મંજૂરી આપી છે. 4063.80 કરોડ રૂપિયાના સંપૂર્ણ પ્રોજેક્ટ ખર્ચનો પ્રોજેક્ટ રિપોર્ટ સરકારને મંજૂરી માટે સુપરત કરવામાં આવ્યો છે. તે મુજબ, મુંબઈ મેટ્રો રૂટ-5 ફેઝ-1 (કપુરબાવડી-ધામણકર નાકા) અને ફેઝ-2 (ધામણકર નાકા-દુર્ગાડી ચોક)નો પ્રોજેક્ટ રિપોર્ટ સુધારેલા ખર્ચે સબમિટ કરવામાં આવ્યો હતો અને મુંબઈ મેટ્રો રૂટ-5અ (દુર્ગાડી-આધારવાડી-ખડકપાડા-કલ્યાણ) અને મેટ્રો રૂટ-5 એક્સટેન્શન (ભોઇરવાડી-ઉલ્હાસનગર)નો પ્રોજેક્ટ રિપોર્ટ ઉપરોક્ત પ્રોજેક્ટના અમલ માટે મંજૂરી માટે સરકારની વિચારણા હેઠળ હતો.