અમદાવાદ: જાન્યુઆરી પૂર્ણ થવાના સમયે દેશના વાતાવરણમાં ફરી એકવાર પલટો આવ્યો છે. ઉત્તર ભારતના પહાડી વિસ્તારોમાં થઈ રહેલી હિમવર્ષાની અસર હવે મેદાની પ્રદેશોમાં જોવા મળી રહી છે. શિયાળાના અંતિમ તબક્કામાં કુદરત જાણે રૌદ્ર સ્વરૂપ ધારણ કરવાની હોય તેમ વરસાદ અને તેજ પવનના કારણે જનજીવન પ્રભાવિત થવાની શક્યતા છે. હવામાન વિભાગના જણાવ્યા અનુસાર, આગામી થોડા કલાકો દેશના અનેક રાજ્યો માટે ભારે સાબિત થઈ શકે છે.
ભારતીય હવામાન વિભાગ (IMD) દ્વારા જાહેર કરવામાં આવેલી આગાહી મુજબ, દેશના આઠ રાજ્યોમાં અચાનક વાતાવરણ પલટાશે. ઉત્તર પ્રદેશ, બિહાર, હરિયાણા અને મધ્ય પ્રદેશ જેવા રાજ્યોમાં વાવાઝોડા સાથે ભારે વરસાદની ચેતવણી આપવામાં આવી છે. પહાડી રાજ્ય ઉત્તરાખંડમાં તો પવનની ગતિ 60 કિમી પ્રતિ કલાક સુધી પહોંચી શકે છે, જેની સાથે કરા પડવાની પણ સંભાવના છે. આ બદલાવને કારણે દૈનિક પ્રવૃત્તિઓ અને વાહનવ્યવહાર પર માઠી અસર પડી શકે છે.
સમગ્ર દેશમાં થઈ રહેલા આ ફેરફારની અસર ગુજરાતના હવામાન પર પણ જોવા મળશે. વેધર મેપ મુજબ, આગામી 24 કલાકમાં રાજ્યના લઘુત્તમ તાપમાનમાં 3°C થી 5°C નો નોંધપાત્ર ઘટાડો થઈ શકે છે, જેના કારણે રાત્રિના સમયે ઠંડીનું જોર વધશે. જોકે, આ ઘટાડો ટૂંકા ગાળાનો રહેશે અને ત્યારબાદ ત્રણ દિવસમાં તાપમાનમાં ધીમે-ધીમે 2°C થી 4°C નો વધારો થતાં ઠંડીમાં થોડી રાહત મળવાની પણ શક્યતા છે.
હવામાન વિભાગે માત્ર વરસાદ જ નહીં, પણ વીજળી પડવા અને કરા પડવાની પણ આશંકા વ્યક્ત કરી છે. ખાસ કરીને સિક્કિમ અને ઉત્તરાખંડના ઊંચાઈવાળા ભાગોમાં હિમવર્ષા ચાલુ રહેતા મેદાની વિસ્તારોમાં શીત લહેર જેવી સ્થિતિ સર્જાશે. મહારાષ્ટ્ર અને છત્તીસગઢમાં પણ ભારે પવન સાથે હળવો વરસાદ પડવાની આગાહી છે. આ આકસ્મિક મોસમી ફેરફારને કારણે ખેતીના પાકને પણ નુકસાન થવાની ભીતિ સેવાઈ રહી છે, જેને પગલે સાવચેતી રાખવા સૂચન કરવામાં આવ્યું છે.
