દહેરાદૂન: ઉત્તરાખંડમાં ભારે ઉત્સાહ સાથે ચાર ધામ યાત્રા ચાલી રહી છે. જોકે,  આ વખતે ચારધામ યાત્રા રેકોર્ડ તોડી રહી છે. જેમાં અત્યાર સુધી કુલ 22. 75 લાખ શ્રદ્ધાળુઓએ દર્શન કર્યા છે.  જેમાં  8,75,000 લોકોએ કેદારનાથ ધામની મુલાકાત લીધી છે. જ્યારે 6,13,000 ભક્તો બદ્રીનાથ ધામ પહોંચ્યા છે. જ્યારે યમુનોત્રીમાં 3,87,000 અને ગંગોત્રી ધામમાં 3,85,000  શ્રદ્ધાળુઓએ દર્શન કર્યા  છે.

હેમકુંડ સાહિબમાં શ્રદ્ધાળુઓની સંખ્યા 12,000ને પાર 

જ્યારે રાજ્યના અન્ય એક ધાર્મિક સ્થળ  હેમકુંડ સાહિબમાં શ્રદ્ધાળુઓની સંખ્યા પણ 12,000 ને વટાવી ગઈ છે. જોકે, સરકાર અને વહીવટીતંત્ર મુસાફરો માટે વ્યવસ્થા કરવામાં સક્રિય છે. જૂન મહિના દરમિયાન શ્રદ્ધાળુઓની સંખ્યામાં  વધારો થવાની ધારણા છે.

અત્યાર સુધી કુલ 105 શ્રદ્ધાળુઓના મોત થયા

જોકે, શ્રદ્ધાળુઓની વધતી સંખ્યાની સાથે, સ્વાસ્થ્ય સંબંધિત સમસ્યાઓ પણ ઉભરી રહી છે - એવી સમસ્યાઓ જે ઘણા કિસ્સાઓમાં જીવલેણ સાબિત થઈ રહી છે. ચાર ધામ યાત્રા દરમિયાન, કેદારનાથ ધામમાં સૌથી વધુ મૃત્યુ નોંધાયા છે. જ્યાં અત્યાર સુધીમાં 50,  બદ્રીનાથ ધામમાં 30 , યમુનોત્રીમાં 15 અને ગંગોત્રી ધામમાં 10 શ્રદ્ધાળુઓના મોત થયા છે. નિષ્ણાતોના મતે, કેદારનાથ અને યમુનોત્રીની યાત્રાને સૌથી મુશ્કેલ માનવામાં આવે છે, જેમાં ઢાળવાળા ચઢાવ અને ઊંચાઈનો સમાવેશ થાય છે. અત્યાર સુધી કુલ 105 શ્રદ્ધાળુઓના મોત થયા છે. 

ચાર ધામ સમુદ્ર સપાટીથી આશરે 3000  મીટરથી વધુ ઊંચાઈ પર સ્થિત

આ ઉપરાંત ચાર ધામ સમુદ્ર સપાટીથી આશરે 3000  મીટરથી વધુ ઊંચાઈ પર સ્થિત છે. ઉચ્ચ હિમાલય ક્ષેત્રમાં સ્થિત હોવાથી અહીંનું હવામાન અત્યંત કઠોર અને અણધાર્યું છે. તેમજ ઓક્સિજનનું સ્તર ઓછું છે. જેમાં તાપમાન અચાનક ઘટી શકે છે  અને ગમે ત્યારે  વરસાદ અથવા હિમવર્ષા થઈ શકે છે.