નવી દિલ્હીઃ દેશની સૌથી મોટી સરકારી બેંક એસબીઆઈ (SBI) ના ગ્રાહકોએ બ્રાન્ચ (શાખા) ને લગતા પોતાના તમામ જરૂરી કામ આજે (22 મે, શુક્રવાર) જ પતાવી લેવા જોઈએ. આવું એટલા માટે, કારણ કે 23 મે થી 28 મે 2026 વચ્ચે SBIની બ્રાન્ચો સતત 6 દિવસ સુધી બંધ રહી શકે છે.

આનું મુખ્ય કારણ વીકેન્ડ (શનિ-રવિની રજા), કર્મચારીઓની પ્રસ્તાવિત બે દિવસની હડતાળ અને રિઝર્વ બેંક ઓફ ઇન્ડિયા (RBI) દ્વારા બકરી ઇદ (ઈદ-ઉલ-અઝહા) માટે જાહેર કરાયેલી બે દિવસની રજાઓ છે.

જાણો શા માટે 23થી 28 મે વચ્ચે બંધ રહી શકે છે SBI બેંક

23 મે થી 28 મે વચ્ચે બેંકોમાં કામકાજ પ્રભાવિત થવાના અલગ-અલગ કારણો છે…

વીકેન્ડની રજાઓ:

23 મે ના રોજ મહિનાનો ચોથો શનિવાર છે અને 24 મે ના રોજ રવિવાર છે. નિયમ મુજબ, દેશની તમામ બેંકોમાં દર મહિનાના બીજા અને ચોથા શનિવારે રજા હોય છે, જેના કારણે આ બે દિવસ બેંક બંધ રહેશે.

SBI સ્ટાફની હડતાળ:

ઓલ ઇન્ડિયા સ્ટેટ બેંક ઓફ ઇન્ડિયા સ્ટાફ ફેડરેશને પોતાની વિવિધ માંગણીઓને લઈને 25 અને 26 મે (સોમવાર અને મંગળવાર) ના રોજ દેશભરમાં બે દિવસની હડતાળની દરખાસ્ત (પ્રસ્તાવ) મૂકી છે. આનાથી બેંકોની કામગીરી પર સીધી અસર પડી શકે છે.

બકરી ઇદની રજા

ભારતના અલગ-અલગ રાજ્યોમાં બકરી ઇદનો તહેવાર અલગ-અલગ દિવસે ઉજવવામાં આવશે, જેના માટે આરબીઆઈ (RBI) એ બે દિવસની રજાઓ નક્કી કરી છે. દેશના મોટાભાગના ભાગોમાં 27 મે ના રોજ બકરીદના કારણે SBI બંધ રહેશે, જ્યારે કેટલાક ભાગોમાં 28 મે ના રોજ રજા રહેશે. વળી, જમ્મુ-કાશ્મીર કેન્દ્રશાસિત પ્રદેશમાં 27 અને 28 મે એમ બંને દિવસ બેંકો બંધ રહેશે.

શા માટે હડતાળ પર જવા માંગે છે SBI કર્મચારીઓ:

ઓલ ઇન્ડિયા સ્ટેટ બેંક ઓફ ઇન્ડિયા સ્ટાફ ફેડરેશન (AISBISF) એ પોતાની 16 માંગણીઓને લઈને હડતાળની જાહેરાત કરી છે. આ હડતાળ કર્મચારીઓના અધિકારોની રક્ષા, કામ કરવાની વધુ સારી સ્થિતિ નક્કી કરવા અને ગ્રાહકોના હિતોને ધ્યાનમાં રાખીને બોલાવવામાં આવી છે.

હડતાળની શું થશે અસર?

આ હડતાળ 'વર્કમેન કેટેગરી' (ક્લાર્ક અને અન્ય સ્ટાફ) ની છે, તેથી ચેક ક્લિયરિંગ, કેશ કાઉન્ટર અને પાસબુક અપડેટ જેવા કામો ઠપ રહી શકે છે.