દેશભરમાં એક્સપ્રેસવે અને ફ્લાયઓવર્સનું વિશાળ નેટવર્ક ઝડપથી ઊભું કરનારા કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરી (Nitin Gadkari) મુંબઈ-ગોવા નેશનલ હાઈવે (NH-66)ના નિર્માણમાં થઈ રહેલા અતિશય વિલંબને લઈને અત્યંત નારાજ અને વ્યથિત જોવા મળ્યા છે.

એક કાર્યક્રમ દરમિયાન ગડકરીએ જાહેરમાં પોતાની પીડા વ્યક્ત કરતાં સ્પષ્ટ શબ્દોમાં જણાવ્યું હતું કે, મેં દેશભરમાં લાખો કરોડ રૂપિયાના રોડ પ્રોજેક્ટ્સ સમયસર પૂરા કર્યા, પરંતુ મુંબઈ-ગોવા હાઈવેનું કામ 14 વર્ષ પછી પણ પૂરું ન થઈ શક્યું તે મારા માટે અત્યંત શરમજનક બાબત છે. હવે આ હાઈવેનું કામ પૂરું થશે તો પણ હું તેના ઉદ્ઘાટન સમારોહમાં હાજરી નહીં આપું.

14 વર્ષથી અટકેલા પ્રોજેક્ટ પર કેન્દ્રીય મંત્રીનો બળાપો:

મુંબઈ-ગોવા હાઈવેનું ફોર-લેનિંગ કામ વર્ષ 2011માં શરૂ કરવામાં આવ્યું હતું. એક દાયકાથી વધુ સમય વીતી ગયો હોવા છતાં કોંકણ પટ્ટાના આ મહત્વપૂર્ણ હાઈવેનું કામ હજુ અધૂરું છે. દર વર્ષે ગણેશોત્સવ દરમિયાન મુંબઈથી કોંકણ અને ગોવા જતાં લાખો ગણેશભક્તો અને મુસાફરોને ખાડાવાળા રસ્તા અને ટ્રાફિક જામના કારણે કલાકો સુધી ભારે હાલાકી ભોગવવી પડે છે, જેને લઈને ગડકરીએ ભારે દુઃખ વ્યક્ત કર્યું હતું.

કોન્ટ્રાક્ટર્સ, એન્જિનિયર્સ અને સિસ્ટમ પર સવાલ:

જમીન સંપાદન અને કાનૂની અડચણો: ગડકરીએ જણાવ્યું કે જમીન સંપાદન, પર્યાવરણીય મંજૂરીઓ, કોર્ટ કેસ અને નબળા કોન્ટ્રાક્ટરોના કારણે પ્રોજેક્ટ સતત લંબાયો છે.
બ્લેકલિસ્ટિંગ અને કડક કાર્યવાહી: અગાઉ કામ છોડીને ભાગી ગયેલા કે ધીમી ગતિએ કામ કરનારા કોન્ટ્રાક્ટરોને બ્લેકલિસ્ટ કરવામાં આવ્યા છે. સાથે જ સંબંધિત એન્જિનિયરો અને ઓથોરિટીઓને બાકી રહેલા પેચનું કામ યુદ્ધના ધોરણે પૂર્ણ કરવા આદેશ અપાયો છે.

આગામી સમયમર્યાદા પર ભાર:

મુંબઈ-ગોવા હાઈવેના મોટાભાગના પેકેજનું કામ હવે અંતિમ તબક્કામાં છે, પરંતુ જ્યાં સુધી પ્રવાસીઓ માટે સમગ્ર રસ્તો સંપૂર્ણપણે સ્મૂથ અને સુરક્ષિત નહીં બને ત્યાં સુધી સંતોષ નહીં મળે તેમ ગડકરીએ સ્પષ્ટ કર્યું હતું.