ઇમ્ફાલ: દેશમાં જાતિગત હિંસાથી અશાંત બનેલા મણિપુરમાં કાયદો અને વ્યવસ્થાની સ્થિતિને વધુ મજબૂત બનાવવા માટે સેન્ટ્રલ રિઝર્વ પોલીસ ફોર્સ (CRPF) દ્વારા એક મોટા ઓપરેશનનું આયોજન કરવામાં આવ્યું છે. આ મિશન માટે ખાસ રીતે સજ્જ કોબ્રા કમાન્ડોની બે બટાલિયનને મણિપુર રવાના કરવામાં આવી છે.

આ કમાન્ડોઝને સ્થળની સંવેદનશીલતા અને ભૂતકાળના અનુભવોને ધ્યાનમાં રાખીને મણિપુર તથા સિલચર ખાતે 3 થી 4 અઠવાડિયાની વિશેષ પ્રિ-ઇન્ડક્શન ટ્રેનિંગ આપવામાં આવી રહી છે, જેથી તેઓ કોઈપણ પડકારજનક પરિસ્થિતિનો અસરકારક રીતે સામનો કરી શકે.

આ ઓપરેશનનો મુખ્ય ઉદ્દેશ્ય મણિપુરના સંવેદનશીલ વિસ્તારોમાંથી ગેરકાયદેસર હથિયારો જપ્ત કરવાનો છે. કોબ્રા કમાન્ડો સતત પેટ્રોલિંગ કરીને રાજ્યમાં ગુપ્ત માહિતી એકઠી કરશે અને શસ્ત્રો સાથે ફરતા અસામાજિક તત્વો સામે કડક કાર્યવાહી કરશે. આ અભિયાનને સફળ બનાવવા માટે કમાન્ડો ટીમોને બુલેટપ્રૂફ ગાડીઓ અને વિશેષ વ્યૂહાત્મક સૂચનાઓ પણ આપવામાં આવી છે, જેથી તેઓ કોઈપણ અવરોધ વિના પોતાની ફરજ બજાવી શકે.

ઓપરેશન દરમિયાન થતા વિરોધ કે ભીડને નિયંત્રિત કરવા માટે CRPFએ ખાસ વ્યવસ્થા કરી છે. હવે કોબ્રા કમાન્ડોની સાથે રેપિડ એક્શન ફોર્સ (RAF) ની યુનિટ્સને પણ તૈનાત કરવામાં આવી છે, જેનું કામ લો એન્ડ ઓર્ડરની સ્થિતિ જાળવી રાખવાનું રહેશે. કોબ્રા કમાન્ડો ઓપરેશન પર ધ્યાન કેન્દ્રિત કરશે, જ્યારે RAF ની ટુકડીઓ સ્થળ પર શાંતિ અને વ્યવસ્થા જાળવવામાં મદદ કરશે.

આ વખતે ઉપદ્રવીઓ કોઈ પણ પ્રકારની ચાલબાજીમાં સફળ નહીં થાય. અગાઉ જોવામાં આવ્યું હતું કે, સુરક્ષા દળોને રોકવા માટે અસામાજિક તત્વો મહિલાઓને ઢાલ તરીકે ઉપયોગ કરતા હતા. આવી પરિસ્થિતિને પહોંચી વળવા માટે હવે ખાસ ટ્રેનિંગ આપવામાં આવી છે અને ઓપરેશનમાં મહિલા કમાન્ડોનો પણ સમાવેશ કરવામાં આવ્યો છે. આ નવી વ્યૂહરચનાથી સુરક્ષા દળોને કોઈપણ પ્રકારના દબાણ કે અવરોધ વગર શાંતિ સ્થાપવામાં મદદ મળશે.