મુંબઈ: થાણે જિલ્લાના મીરા-ભાયંદરમાં લગભગ 254.88 એકર જમીન બે બિલ્ડરોને ટ્રાન્સફર કરવાના બોમ્બે હાઇકોર્ટના આદેશ સામે મહારાષ્ટ્ર સરકાર સુપ્રીમ કોર્ટમાં જશે, એમ મહેસૂલ ખાતાના પ્રધાન ચંદ્રશેખર બાવનકુળેએ શનિવારે જણાવ્યું હતું.એક સત્તાવાર નિવેદન અનુસાર, કરોડો રૂપિયાની કિંમતની જમીનના સંદર્ભમાં બોમ્બે હાઇકોર્ટે ધ એસ્ટેટ ઇન્વેસ્ટમેન્ટ અને મીરા રિયલ એસ્ટેટ ડેવલપર્સની તરફેણમાં ચુકાદો આપ્યો હતો.
જમીન રાજ્ય સરકારની છે. અમે સુપ્રીમ કોર્ટ સમક્ષ સરકારનો પક્ષ મજબૂતીથી રજૂ કરીશું અને સુનિશ્ર્ચિત કરીશું કે જમીન સરકારી કબજામાં રહે, એમ બાવનકુળેએ 30 એપ્રિલના ચુકાદાને સ્પેશિયલ લીવ પિટિશન દ્વારા પડકારવાના નિર્ણયની જાહેરાત કરતી વખતે જણાવ્યું હતું.તેમણે કહ્યું હતું કે આ ચુકાદો અણધાર્યો હતો કારણ કે જમીન રાજ્ય સરકારની માલિકીની હતી, અને સુપ્રીમ કોર્ટમાં અપીલ દાખલ કરવા માટે નિર્દેશો જારી કરવામાં આવ્યા હતા.
આ કેસની પૃષ્ઠભૂમિ સમજાવતા, સત્તાવાર નિવેદનમાં કહેવામાં આવ્યું છે કે 1948થી જમીનના મહેસૂલ રેકોર્ડમાં સરકારની મંજૂરી વિના કથિત રીતે ફેરફારો કરવામાં આવ્યા હતા. શરૂઆતમાં, એસ્ટેટ ઇન્વેસ્ટમેન્ટ કંપની અને પછી મીરા સોલ્ટ વર્ક્સનું નામ ગેરકાયદે રીતે રેકોર્ડમાં દાખલ કરવામાં આવ્યું હતું, એવો દાવો કરવામાં આવ્યો હતો.‘1958માં જમીન પર મીઠાના અગરનો ઉપયોગ થવાને કારણે કેન્દ્રના મીઠા વિભાગનું નામ ઉમેરવામાં આવ્યું હતું. ત્યારબાદ, માલિકીનો વિવાદ સુપ્રીમ કોર્ટમાં પહોંચ્યો, જેણે થાણે જિલ્લા કલેક્ટર સમક્ષ અપીલ દાખલ કરવાનો નિર્દેશ આપ્યો.
2002માં, જિલ્લા કલેક્ટરે મીરા સોલ્ટ કંપનીના દાવાને ફગાવી દીધો હતો અને સમગ્ર જમીન સરકારને સોંપવાનો આદેશ આપ્યો હતો,’ એમ નિવેદનમાં કહેવામાં આવ્યું છે.જોકે, 2019માં કંપનીઓ અને કેન્દ્રના મીઠા કમિશનરે પ્રથમ અપીલ દ્વારા બોમ્બે હાઈકોર્ટ સમક્ષ આદેશને પડકાર્યો હતો. 30 એપ્રિલના રોજ હાઈકોર્ટે મીઠા કમિશનરની અપીલ ફગાવી દીધી અને જણાવ્યું કે જમીન મીરા સોલ્ટ વર્ક્સની છે, એમ આ નિવેદનમાં જણાવ્યું હતું.
સરકારે હાઈકોર્ટ સમક્ષ પ્રથમ અપીલની જાળવણી સંબંધિત મુદ્દો દાવો કર્યો હતો, પરંતુ આ મામલો યોગ્યતાના આધારે નક્કી કરવામાં આવ્યો હતો, જેના કારણે ખાનગી એન્ટિટી મીરા રિયલ એસ્ટેટ ડેવલપર્સ દ્વારા સરકારી જમીન પર પોતાનો દાવો જાળવી રાખવાની શક્યતા ઊભી થઈ હતી.મહારાષ્ટ્ર જમીન મહેસૂલ સંહિતા, 1966ની કલમ 29(3)(ભ)ની જોગવાઈઓનો ઉલ્લેખ કરતા, બાવનકુલેએ દાવો કર્યો હતો કે જમીન રાજ્ય સરકારની છે.
