મુંબઈઃ સપનાઓનું શહેર ગણાતા મુંબઈ અરબી સમુદ્રથી ઘેરાયેલો હોવાથી તેના દરિયાકિનારા ફરવા માટેના જાણીતા સ્થળો છે. કમનસીબે આ દરિયાકિનારાઓ માનવ-નિર્મિત કચરાથી વધુને વધુ કદરૂપા બની રહ્યા છે, જે એક ગંભીર પર્યાવરણીય પડકાર પણ ઊભો કરે છે.
આજે મુંબઈના જાણીતા જુહુ બીચ તાજેતરની ભરતી પછી ફરી એકવાર પ્લાસ્ટિક કચરા, કીચડ અને અન્ય કાટમાળથી ઢંકાઈ ગયો હતો. પરિણામે, પોલીસે બીચ બંધ કરી દીધો હતો અને લાઇફગાર્ડ્સે આ વિસ્તારમાં પેટ્રોલિંગ કરવું પડ્યું હતું.
દરિયામાં મોટી ભરતીઓ પછી મોટી માત્રામાં પ્લાસ્ટિક બોટલો, ફૂડ રેપર, થર્મોકોલ, ફેંકી દેવાયેલા ફૂટવેર, કાપડ, નાળિયેર અને અન્ય ઘરગથ્થું કચરો અરબી સમુદ્ર દ્વારા કિનારે ઢસડાઈ આવ્યો હતો જેના કારણે સવારના સમયે હરવા-ફરવા જનારાઓ, મુલાકાતીઓ અને સ્થાનિક વિક્રેતાઓ માટે અપ્રિય વાતાવરણ સર્જાયું હતું, જેના વીડિયો પણ વાયરલ થયા પછી લોકોએ ચિંતા પણ વ્યક્ત કરી હતી.
નિષ્ણાતોના મતે મોટા ભાગનો કચરો ગટર, નદીઓ અને નાળાઓમાંથી નીકળે છે જે ખાસ કરીને ચોમાસા દરમિયાન કચરો દરિયામાં લઈ જાય છે. પછી જોરદાર મોજા અને ભરતીની ગતિવિધિઓ સંચિત કાટમાળને દરિયા કિનારા પર પાછો ધકેલી દે છે, જે હકીકતમાં દરિયાની શહેરનો કચરો સાભાર પરત કરવાની રીત છે.
